Nyiɛkpɔɔ We Mblɛ Pe Pɔlɛfɛɛnlɛ Fiŋge Ndie Tini
2
Yire mblɛ e sisam peejawala wrui dɛŋglɛ na,
mbe ndram paan saan,
na nyiŋge se,
mbe e yiri
mbe yi pe kre,
e atɛ, ŋgi na hin?
Ee jaŋga ni
mbe nyjɛ e chaa pe.
2 Trɛ nyjɛ e chaa,
yire e shio jaŋga na,
kalonyi nyjɛ kee yi tna e pan,
yire e shio leele pan.
Na pe yirɛ shio na yaa.
3 Ki tia o Tafun Nyiɛkpɔɔ yo mbo,
“Ni paan na kanyana kpɔɔ ni e na,
a yaa jaa shɔ ki nu.
Kie ti mbe yaa nyaari
mbe jɛŋgi na. Ŋgi na hin?
Katala kpɔɔ titi ble yi.
4 Ki ble kre, leele we na
kre fooro mɛɛ ŋga koni,
mbra woni e na,
mbra e pini mbra tɛɛ,
mbra yuu mbo,
‘O dɔɔya aŋga.
O Tafun Nyiɛkpɔɔ,
u o tra kre shɔ o pan,
mu ki wru mu le
o loŋgoolo kɛɛ.’”
5 Kena e wa wa tra ta,
o Tafun Nyiɛkpɔɔ leele
pre lawee na.
Kafinɛ Kee Nyanyofɛɛnlɛ
6 A leele pre kee nyanyofɛɛnlɛ pre na kna mbo,
“Maa yire kee nyjɛ yo mbe o loo.
Nyiɛkpɔɔ wa ti nyifɛɛrɛ o gbo,
kena mu kee nyjɛ mu kpali yire ti
mbe loo.”
7 Yire Jacob nanae,
kena ki fna pe yo o pan na
Nyiɛkpɔɔ krɔ kun na o ni ra?
Ɔɔhɔn, wa ki pe ma.
Nyiɛkpɔɔ wre ma u frakafɛɛnlɛ
pini chichie kree?
8 O Tafun Nyiɛkpɔɔ yo mbo,
“E wii na ni leele pre ni,
na e loŋgoolo lɛ,
e tia pe pe na leele mblɛ
pe yiri ŋunɔ na lee,
na jawa na yaka
wa pe ta katoo lɛ,
jaa na ee wa na pe sri,
mbe pe yirɛ shɔ pe pan.
9 Nyjila kro nu,
e ni leele pre lekuchiɛlɛ nini
pe kalonyi chichiele nu,
na pe biile krɔ yirɛ nyjɛ
Nyiɛkpɔɔ pe ŋga
yire shio pe pan.
10 E yiri e sɛ,
wuuhaa ka n wa e pan mna.
Ŋgi na hin?
E sisam nyjɛ e pini yire,
yi tra kre tɔ nɛɛrɛ ni,
mu ki kla kia jaa gbeele na.
11 Pre leele mblɛ,
kafinɛ Nyiɛkpɔɔ
keenyanyofun ŋmba,
we na kala fnɛ mbra tro,
mbra yuu pe pan
na simi gbɔwo,
we bɔ e na wre kee pe chaa.”
12 Yire Jacob nanae,
ni nyu yo e pan na,
mbe e mblɛ e kro chiɛri
pre ble titɛɛ,
imi na mbaala kɔɔnrifun,
u mbaala leni nagbɛɛ kre,
pan ee pe na mbaala nɛɛ
pe kahaa.
Leele we ndru mbe tra
kre nyi na.
13 Nyiɛkpɔɔ wre titi
we kolo nyaa,
mbe yiɛklu e pan,
mbe e wɔ tnibim nu.
Ee kakpɔɔ kre jlonwee nyu
krɔɛ yire gbun mbe kuari,
mbe yili mbe sɛ.
E Tafun Nyiɛkpɔɔ
ŋmba wi e ŋunu wre,
we yiɛklu e pan.