Jeremiah 1

Jeremiah Hlɛ

O Tafun Nyiɛkpɔɔ kee nyjɛ wra yo srawɔfun Hilkiah biblɔ Jeremiah pan na yi kre. Ni yiri chia ŋga pe yeeri Anathoth kre na, a kraa wa Benjamin leele tra nu. 2 Ŋga Judah ŋunu Josiah, Amon biblɔ wre na jɔɔn li, ki yɛlɛ kɛmbɔtaarɛ wo na, kre o Tafun Nyiɛkpɔɔ na paara na ni ni jle. 3 A Judah ŋunu Josiah biblɔ Jehoiakim ŋunumu nyjila chɔɔ, o Tafun Nyiɛkpɔɔ wre na ndru mu paara ni pan na, hali mna sɛ su yɛlɛ ŋga na Judah ŋunu Josiah biblɔ Zedekiah na pan mu jɔɔn li yɛlɛ kɛmbɔnunu wo kre nyiɛpɔ kunɔ wo kre nu. Kre nyjila kre nu pra Jerusalem leele yii mu sɛ haalee Babylon tra nu kre.

O Tafun Nyiɛkpɔɔ Na Jeremiah Yeeri

4 O Tafun Nyiɛkpɔɔ na yo mi Jeremiah pan mbo, 5 “Jeremiah, nyjila ŋga ni ni nsra ta mu mu faanri mu le mu lo lɛɛ kre, kre ndaa mu wɔ. Nyjila ŋga ni pe nsra ta mu mu se kuraa kre, kre ndaa kɛ nyini mu na, mna mu wɔ mbe mu pe ni keenyanyofun waŋgrɛ nu.” 6 A ndaa kna mna yo Nyiɛkpɔɔ pan na, “O Tafun Nyiɛkpɔɔ Jaŋgafun, mu chin na pɔ wi mi, a ni n paara mu chin.”

7 A o Tafun Nyiɛkpɔɔ wre na kna mu yo ni pan mbo, “Maa yo na pɔ wi ŋu. Mna mbe mu tun kpan sɛ, a kee ŋga mbe yo mu yo kpan, sɛ ki yo. 8 Maashia pe fiɛ, ŋgi na hin? Nii wa mu kro, a mbe mu shɔ. Pan mi mu Tafun Nyiɛkpɔɔ wre yo.”

9 A o Tafun Nyiɛkpɔɔ na kɛ tini mna ni nyu pali mna yo ni pan mbo, “Fuŋga ni ni kee le mu nyu na. 10 Le, ni mu wɔ, mu waŋgrɛ, na ŋunumu le mu kɛɛ, mbe mu pe kɔ mbe wa na tiŋge yi, mbe waŋgrɛ yire yɛ juari, mbe yi kla. Mu ŋulo klɔ pe juɛn na, a mu waŋgrɛ yire yɛ gbeele mbe sin, mbe plɛ yire mbe yire.”

11 Ki ble ka o Tafun wre na ni wie mbo, “Jeremiah, yira ŋgi mu nya hin?”

A ndaa yo na, “Ni tiŋge klɛ ka nya.”

12 A o Tafun Nyiɛkpɔɔ wre na yo ni pan mbo, “Mu ki nya yɛŋgɛ, nii wa na le na ni kee ŋga ni yo kre we pe ma yɛŋgɛ.”

13 A o Tafun wre na yo ni pan na mbo, “Yira ŋgi mu nya na hin?”

A ndaa yo, “Ni chɔ ka nya nyjeeri haa a nyumu na kani ki nu, a kra chaa mbe kna mbe wo mna haa.”

14 A o Tafun Nyiɛkpɔɔ wre na kna mbo, “Nyjeeri haa wa kanyana kpɔɔ we yire mbe pan yire mblɛ ee wa tra ŋga nu kro na. 15 Ni paan mbe kɛ wa mbe ŋunumu nyjɛ yii wa nyjeeri haa wa yire, na pe wifɛɛnlɛ kro yeeri mbe pe pan e na.” Pan mi e Tafun Nyiɛkpɔɔ wre yo.

“Pe ŋulo we pan,

mbe pe ŋujuɛn kan

Jerusalem jlonwee nyu na,

mbe ki mboo kre fɛ mbe kun,

yire na Judah chiɛ yire ni kro.

16 Mbe ni leele pre ndie tini,

ŋgi na hin? Pe ni je,

mu kna mu sɛ

na tuwe ndiom tɛɛn sroi

na sɛɛnlɛ kaan,

na pe kɛ nyu yirɛ sumi.

17 Kena Jeremiah, muyɛ kna, yiri mu kee ŋga ni yo mu pan kro yo pe pan. Maa shia pe fiɛ, na kre ma mbe ti mbe pe kee pe fiɛrɛ ni mu pan. 18 Aŋga ni mu pe na chia ŋga pe mboo sin mu fɛ mu kun yi, pan mu nyi na tɔɔnrɔ pilaasi yi, a mu pe na mboo ŋga pe sin na swafre ni yi. Mu yiri mbe Judah tra kre na ki ŋulo kro taan, pre na pe loplombo, na pe srawɔfɛɛnlɛ pre, na tra kre leele kro ni. 19 Pie yiri mbe wi na mu ni, la, pia mu ja, ŋgi na hin? Nii wa mu kro, a mbe kɛ tɔ mu na.” Pan mi mu Tafun Nyiɛkpɔɔ wre yo.