Nyiɛkpɔɔ We Waŋgrɛ Yire Kala Li
66
O Tafun Nyiɛkpɔɔ yo mbo,“Nyjeeri yi ni tnihaa,
a tra pe ni jele taa yira.
Kena katoo ŋgi nyini,
ee jaa sin ni pan,
ndee lawee ŋgi sembremu nu,
mbe jaa tni mbe wuu hin?
2 Mi ndaa yira ŋga mu chin,
ŋga kro wa.
A mblɛ na ni yiɛ shɔ,
pre lɛ mblɛ pe peyɛ nyjiri,
mu pe jawala chinɛ,
mu na ni fiɛ, na lii ni kee na.
3 Kooloe nyjɛ e chaa na e tro,
a afunyi kee yire e nyiɛ chaa.
Ee nuu gbo mbe ni ŋga,
mbe kɔ kre na,
mbe sɛ linkuuro kee pe.
Ee mbɔɔ tɛɛ mbe sra wɔ,
mbe ni ŋga,
mbe ndruu sɛ nyukuan tɛɛ,
mbe prɛ wɔ sɛɛn na.
Ee shɔlɔ tɛɛ mbe sra wɔ,
mbe ni ŋga,
mbe yiri kre kro,
mbe sɛ prako nyimi tɛɛ,
mbe prɛ wɔ sɛɛn na.
Ee tuwe ndiom tɛɛ sro
mbe ni ŋga, mbe yiri kre kro,
mbe sɛ na e sɛɛnlɛ
yire kaan mɛɛ.
4 Yire kee nyjɛ ndra na,
mbe ti mbe kanyana kpɔɔ pe da,
a yira ŋga pe fiɛ kre,
mbe ti ki pe nya. Ŋgi na hin?
Ŋga ndaa pe yeeri, ndro nsra shɔ,
a ŋga ndaa paara na pe ni,
ndro nsra loo ni pan.
Sisam kee praa pini, mna ni je.”
5 Yire mblɛ e o Tafun Nyiɛkpɔɔ,
wre fiɛ, na lii u kee na kre,
e u kee ŋga u yuu loo mbo,
“Ni mɛɛ kre ndra na,
e wolo pre plɛ e pra,
a pe kee ka ma na e ni,
pra e pini na tɛɛ na yuu mbo,
‘E ti mbe e Tafun Nyiɛkpɔɔ wre,
u jaŋga nyina,
mbe o e yɛshɔɔrɔ nya.’
La, pre mblɛ pe yuu ma kre,
pe yiɛ we le nyumu.”
6 E gblee ŋga ki yilii kakpɔɔ kre na,
na Suminyuŋgo wa kre loo,
o Tafun Nyiɛkpɔɔ wre,
u u loŋgoolo ndie tinii,
imi na ki fna.
7 Pan ni kakpɔɔ cheche kre nyi,
na chlɔ ŋmba u fo mu se,
a se lɛɛ n u yaa wi.
8 Ndro ŋmbi u da mu kee ŋga loo,
ndee mu ki nya tun hin?
Pe da mu waŋgra ka wa,
ble nunu tuun?
Pan Jerusalem nyi na,
chlɔ ŋmba lɛɛ yaa maa to,
a u se nyaanyaa wi.
9 O Tafun Nyiɛkpɔɔ u tii,
mbe chlɔ se u nyjila nu.
Wre we ti mbe Jerusalem leele nɛɛ.
10 Kena yire mblɛ,
e Jerusalem kori kre,
e ti mbe yire na wre yiɛshɔ.
Yire mblɛ e nyɛni na u kaan kre,
e ti mbe yire na
wre yiɛshɔ kpɔɔ.
11 Imi na chlɔ,
u pɔ kaan nyinimi,
mbe u ŋgɔɔri mbe yɔɔ kre,
pan we ti mbe e yɛshɔɔrɔ kpɔɔ li,
u yɛnyiŋge kre nu.
12 O Tafun Nyiɛkpɔɔ wre yo mbo,
“E le, mbe ti mbe,
wejinyiŋge pan Jerusalem na,
mbe waŋgrɛ yire pan,
na yi yɛtaara yirɛ ni wa,
pan kie pe na,
lafolo ki nyi mu fo mu le wa.
Jerusalem we e pɔɔri,
na nyinimi nyumu ni,
mbe e wru mbe taa jeelee na.
13 Mbe e bre Jerusalem na,
imi na chlɔ u pɔ bre kre.”
14 Na e waa yire kee,
nyjɛ nya yira pini, e yiɛ we shɔ,
mbe e faŋga ta,
mbe pe na nyaa ŋga ki lee yi.
Bawa ee chin na mi,
e Tafun Nyiɛkpɔɔ,
ni yaa mblɛ pe lii,
ni nyu kee na pre na,
na ni krɔkuɔn woni,
na ni loŋgoolo nyina.
15 E le, o Tafun Nyiɛkpɔɔ wre,
paan na kanhun ni,
sookɛɛ nyjɛ ni u paan kre,
pan yie na pini
na legboo fuflɛ yi.
We u krɔkuɔn kpɔɔ kre wɔ,
mbe nyina.
Kanhun we tɛɛ,
mbe leele ndie tini.
16 Kanhun, na brɔfiɛn yiɛshiin ni,
we waŋgra ŋga leele,
mblɛ pie pimi li pre ndie tini,
a we pe tataara gbo.
17 O Tafun Nyiɛkpɔɔ wre yo mbo, “Leele mblɛ pe peyɛ pini cheche, mbe taa pe yɛklo na mbe sɛ na prɛ woni tinyi jaara kagblɛ nu, na prakoe, na krotee kaa, mu na afunyi kee pini pre kro, pe kla nyjila da. 18 Pe jawala kee, na pe kepele yire ni bin. Ki tia ni paan mbe waŋgrɛ, na yolo kro leele nyu ble, a pe kro we ni yɛnyiŋge na ni jaŋga nya. 19 La, mbe kawako kee pe pe nu, a pe mblɛ pie kro a mba pe kla kre, mbe ti mbe pe plɛ sɛ waŋgrɛ nu. Pie sɛ Tarshish, na Libya, na Lud, waŋgra ŋga leele pe chin na bɛnyi wiire ni kre nu, na Tubal, na Greece, na kuyɔɔsu waŋgrɛ nyjɛ leele pe n ni mɛɛ chin, ndee mu ni yɛnyiŋge kre kee loo tun pre nu. Pre pie sɛ ni yɛnyiŋge kre kee kpali waŋgrɛ yire nu.
20 Pie ndru mbe yiri, na mu leele pre kro ni waŋgrɛ yire nu, mbe pan Jerusalem nyua cheche kre na. Pe paan kre we pe na yira ka pe ni kɛ. Na pe paan, pie nduu pe soolo, na pe sookɛɛ, na bubunlɔ, na nyuuma na. Pan pie pe imi na Israel leele paan na pe shɔlɔ sra wɔ wee ni, mbe yi le paala yirɛ cheche nu mbe pan na yi ni o Tafun Nyiɛkpɔɔ Suminyuŋgo. 21 A mbe pe plɛ wɔ mbe pe pe srawɔfɛɛnlɛ, na Levi leele.”
22 “A imi na tra fɔŋgɔ, na nyjeeri fɔŋgɔ nyjɛ ni paan mbe pe yire we frɔ ni yiɛ kre, pan mu mɛɛ, na mu nanae pre we frɔ ta. 23 Nyiɛpɔ fɔŋgɔ blelie nu, na Wuuble lie kro nu, lewo na nyjuro kro we pan mbe kosie kan ni yiɛ Jerusalem na mna.” Pan o Tafun Nyiɛkpɔɔ wre yo. 24 “Ni leele pre we yili fimi na mbe sɛ leele mblɛ pra yiri mna ni taan pre gboolo le. Pie nya na fiɛnlɛ mblɛ pe pe gboolo lii pre n wa ku haa ni. A kanhun ŋga ki pe shio kre n wa fii haa ni. A pe gboolo pre nyaa we pe kpɔli ni, mbe lewo na nyjuro kro ŋga.”