Nyiɛkpɔɔ We Pimi Lifɛɛnlɛ Ndie Tini
65
O Tafun Nyiɛkpɔɔ wre yo mbo,“Ndaa niyɛ wɔ mna leele,
mblɛ pe nsraa ni haa chaa,
pre nyina.
Pe nsra ni haa cha,
ande ndaa tia pra ni nya.
A waŋgra ŋga leele,
pe nsraa ni sumi kre,
ndaa yo pe pan na,
‘Mi wi kre, e pan.’
2 Nyjila kro nu ni kɛ nyaa,
na ndikambla, na sisaapefɛɛnlɛ,
mblɛ pe tro pre titi kooloe na,
pre sri.
3 Pre leele pre pe shie,
na prɛ woni pe kagblɛ sɛɛnlɛ na,
na tuwe ndiom tɛɛn sroi,
pooro sragbuɛnlɛɛ na,
mu kro na ni krɔ kuun kre.
4 Pre pe shie na jiin,
fanyi lawee blee,
mbra gboolo yeeri.
Pe prako kaara kaa,
a sɛɛn kaara tumu yii wa,
pe chɔɛ sɔɔ wee nu.
5 A nde pe yuu plɛ pan mbo,
‘E sɛ, yaa mbra o na, ŋgi na hin?
O pe cheche mu tro.’
Pre leele mblɛ nyini,
mba kaa li na pe ni.
Pan ni krɔ kun na pe ni,
na kanhun ŋga ki shio,
a kia fii yi.
6 Ni ni jawala pe mu kɔ na,
mbe pe ndie tini,
a ni ki nyunɔ mu tɛɛ,
a mba nyiɛlɛ ka mbe wa,
kee ŋga pe pe kre na,
mbe pe ŋga pe sisam fɔtɔɔrɔ.
7 Pre titi sisam,
na pe tolɛɛlɛ sisam,
nyjɛ pra pe yire kro fɔtɔɔrɔ,
mbe tɔ pe na. Ŋgi na hin?
Pe tolɛɛlɛ pre na sɛ sɛɛnlɛ,
pɛɛri nyambie na,
mna ni yiɛ le nyumu,
ki tia yire sisam kee,
nyjɛ pra pe fa kre ndra na,
mbe leele mblɛ ndie tini,
imi na ki fna.”
8 O Tafun Nyiɛkpɔɔ wre yo mbo,
“Imi na tre sɛnyi pini chusii,
mbe nyumu le, mbe yi yɛ nyu,
a ki n fna mbe pe yi kla kre,
pan chɔɔ mbe yila,
ni sumifɛɛnlɛ pre ndra na,
mbe mba leele pre kro kla.
9 Mbe Jacob,
na Judah nanae pre plɛ wɔ,
mbe pe tni ni nyua kre na.
Pre ni wɔ mbe pe tra
kre ta krɔyira,
mbe tni wa mbra ni sumi.
10 Sharon tra mbrɛrɛ,
kre lawee ni leele pre yurɛ,
we na kaa, mbra shie,
mbra wuui Achor landɛɛ kre nu.
11 La, yire mblɛ e mi,
e Tafun Nyiɛkpɔɔ wre je,
mu ni nyua cheche Zion ŋga,
Jerusalem na kre kee fɛɛ,
mu na sro na simi gbɔwo teeri,
na sra woni na sɛɛn
ŋga praa yeeri,
‘Nyiɛnyɔɔrɔ’ kre kaan kre,
12 E nyiɛklamu ŋga ee ta yi na,
ee lɛɛlɛ mbe pe e ndrɛ klɔ,
brɔfiɛn yiɛshiin ni. Ŋgi na hin?
Ndaa kɛ wa mna e yeeri,
la, e nsra shɔ ni pan.
Ndaa paara na e ni,
a e nsra ndie tɛɛ.
E na sisaa pe ni yiɛ,
mna kee ŋga kra ni bin pe.”
13 Yire kee nyjɛ ndra na, kee ŋga O Tafun Nyiɛkpɔɔ yo yi kre mbo,
“Ni sumifɛɛnlɛ pre,
we sro ta mbe li,
la, mblɛ pe ni je pre,
we tni klo.
Ni sumifɛɛnlɛ pre,
we nyumu ta mbe gbɔ,
la, mblɛ pe ni je pre,
gbɔɔ we pe gbo.
Ni sumifɛɛnlɛ pre we yɛshɔɔrɔ li,
la, pre yiɛ we le nyumu.
14 Ni sumifɛɛnlɛ
we yɛshɔɔrɔ kpɔɔ tɛɛ,
mbe mɛɛ kɔ,
la, fooro we ti mblɛ pe ni je
pre nyɛni,
mbe kuulo tɔɔnri kpɔɔ.
15 Ni leele mblɛ ni wɔ pre,
we e mɛɛ tɛɛ mbra leele suni.
A mi Nyiɛkpɔɔ Jaŋgafun wre,
mi mbe e gbo.
La, ni sumifɛɛnlɛ,
mblɛ pe li ni kee na kre,
mbe pe ŋga mɛɛ fɔŋgɔ.
16 Ndro ŋmba we na chaa,
mbe ndro dwan tra kre nu kpan,
mi Nyiɛkpɔɔ kprafun wre,
mɛɛ we yeeri.
A ŋmba we yo we da,
tra kre nu kpan,
mi mɛɛ ni we da.
Ŋgi na hin?
Mbe e fa kanyana yire kro fɛɛ,
mba ka sɔɔnri na.
Wam Fɔŋgɔ Kre
17 E le, mbe nyjeeri fɔŋgɔ,
na tra fɔŋgɔ wa.
Ndro wa fa yirɛ yire ka sɔɔnri na,
a yi ka wa pe
ndro jawala nu na.
18 La, e ti mbe e yiɛshɔ kpɔɔ,
yirɛ nyjɛ mbe pe yire na,
nyjila kro nu. Ŋgi na hin?
Jerusalem fɔŋgɔ ŋga mbe wa kre,
kie pe yɛshɔɔrɔ kpɔɔ lawee,
mbe ki leele ŋga.
19 Mi titi yiɛ we shɔ,
Jerusalem na ni leele pre na.
Ndro wa nyɛnɛɛ,
na foorolie kee loo wa.
20 Biile wa na kuu pe bimi na,
a leele kro ŋmaa we tnu.
Mblɛ pie li yɛlɛ lafaa,
pre lɛ pe yirifumblɔ,
mblɛ pe n kre nyjila kre da,
mu ku kre, kena mi ni pe ndie tini.
21 Leele we kalonyi sin,
mbe tni yi nu,
pie tre sɛnyi tinyi luu,
mbe yi sɛnyi ta mbe li.
22 Kia pan na pie kalonyi sin,
mbe plɛ sɛ yi wru mbe tni na,
ndee mbe yirɛ luu,
mbe plɛ paan yi li na.
A imi na tiŋge mɔɔ kre,
pan ni leele pre ble we tnu
mbe da.
Ni leele mblɛ ni wɔ pre,
pie pre titi kɛ nyu tnumu,
ŋga pe tun yira ta,
mbe li yɛshɔɔrɔ ni mbe mu.
23 Pia fna waara na,
a kanyana kpɔɔ wa pe biile da na.
Mbe pre na pe nanae dwan,
nyjila kro nu.
24 Hali na pe nyiɛtali,
pe nyu wa to mbe ni shɔ pe pan.
25 Komboolo, na mbaala,
we chaa mbra kaa titɛɛ,
a jirae we na nyaa kaa na nui lɛ,
a tra kie pe wɔɔlɔ sro.
A yaka wa pe,
ni nyua cheche kre na,
mbe jaa ndro pe yaka.”
Pan o Tafun Nyiɛkpɔɔ wre yo.