64
O Tafun Nyiɛkpɔɔ jande,nyjeeri tini mu wali mu tii tra,
mbe nyuɛ mu nya,
mbra teele mu yiɛ.
2 Pan nyuɛ yire we na pini,
na awrɛmu kani kanhun na.
Pan mbe o loŋgoolo pre chin,
imi na mu nyi,
mbe waŋgrɛ yire mu nya,
mbra seeri mu yiɛ.
3 Ŋga mna tii tra fa,
mna fiɛrɛ kee yɛ pe,
a yira o fo kre,
nyuɛ na mu nya,
mna seeri mu yiɛ.
4 Mu yire fa kre krɛrɛ,
ndro n da mu Nyiɛkpɔɔ wa nya,
ndee mu wa kee loo na ŋu bɔkɔ,
ŋu chiin mu da,
mu kawako kee pe,
mu leele mblɛ pe dankna,
mu na pre ŋga.
5 Leele mblɛ pe lii,
mu kee na yɛshɔɔrɔ ni,
na kee ŋga mu chaa pini kre,
mu yaa pe na.
La, ŋga o na kro,
mu na sisaa pini kre,
mu krɔ na kun na o ni,
kena mni oo pe,
mbe ŋmaashɔmu ta hin?
6 O kro sɛ pe,
na nɛɛrɛ leele lɛ wre,
a o fraka kee nyjɛ o pini yire,
pe mu pan na yokunu nɛɛrɛ wo yi.
A o sisam tia o pe na,
wrɛ nyjɛ yi yua,
a fuflɛ yi wru mu sɛ yi.
7 Ndro na mu mɛɛ tɛɛ,
mbe yaka tali, ndee mbe wi,
mbe mu haa cha.
Ŋgi na hin? Mu yiɛ ndra o na,
a o sisam tia mu o je.
8 Nde o Tafun Nyiɛkpɔɔ,
ŋu wi o lɛ. Wre lɛ choo,
a ŋu wi faanrifun wre,
a mu kɛ nyu tnumu lɛ wre.
9 Kena maa ti mbe mu krɔ kun,
na o ni mbe tro.
O Tafun Nyiɛkpɔɔ jande,
maa na o sisam yire sɔɔnri,
nyjila kro nu.
Mu leele lɛ wre,
kena o mu tali, o fooro le.
10 Mu kakpɔɛ cheche yire kro,
kaari tablɔ tra.
Jerusalem kaari kajaa,
a leele fɛ mu ki ti.
11 O Suminyuŋgo cheche,
yɛnyiŋge wo ŋga nu,
o tolɛɛlɛ naa mu kaan mɛɛ kre,
pe ki sro.
A o lawee nyjɛ kee yi sheli o na,
yire kro juari.
12 Yire kee nyjɛ krɛrɛ kɔkro ni,
o Tafun Nyiɛkpɔɔ,
mni a mu pieri mu o ti,
mu tia o na kanyana kpɔɔ,
ŋga ki wɛ o na
nyaa ma ŋga hin?