O Tafun Nyiɛkpɔɔ Wi Mu Waŋgrɛ Yire Ja
63
Ndro ŋmbi u yiri,Bozrah kakpɔɔ kre,
na Edom tra nu na paan,
a u dodonyi nyina u na ŋga hin?
A ŋmbi dodoŋgi ki chiɛnri u na,
a wra nyaari jaŋga,
na faŋga ni ma ŋga hin?
“Mi e Tafun Nyiɛkpɔɔ,
ŋmba ni fraka ni paaraa nu,
mu jaŋga ni,
mbe ŋmaa shɔ wre wi.”
2 Mni a mu dodonyi nyina mu na,
na ndro ŋmba u tre sɛnyi
taanla simi fɛɛri ndoo,
wi ŋga hin?
3 O Tafun Nyiɛkpɔɔ wre ki nyu wɔ mbo,
“Mi nunu ni waŋgrɛ yire taanla,
na tre sɛnyi yi simi fɛɛri ndoo wa,
a ndro n ya ni na.
Krɔkuɔn sisaa ni ni tɛɛ,
mu pe taanla,
a pe nyimi wo ni dodonyi na,
ma kre,
mu ni dodonyi mana
kro poŋgo.
4 Ŋga na ndaa yila,
mna kre kee ŋga pe yi na,
nyjila da mbe ni paan,
ni leele pre loŋgoolo,
pre sisam fɔlɔ tɔ,
mbe ni leele ŋmaashɔ.
5 Ndaa yiɛ wa mu le,
a ni nsra ndro ta
mbe u ya ni na.
Kra ni pe kawako ni,
na ni nsra ndro ta,
mbe u ya ni na.
La, ni jaŋga kra wi mu ni ŋga,
a ni krɔkuɔn kre na tia,
ndaa faŋga ta mu ya.
6 Ndaa krɔkuɔn tɛɛ,
mna waŋgrɛ yire taanla,
a ni krɔkuɔn kre na tia,
pra pe na pe gbɔ mu to,
a ndaa pe nyimi kna mu wo tra.”
O Tafun Nyiɛkpɔɔ Nyu U Biile Na
7 Mbe O Tafun Nyiɛkpɔɔ wre latam kpɔɔ ŋga u pe kre kee yo. Kee ŋga u pe kre fna mbe o yire ki na mbe u ŋga mɛɛ. O Tafun Nyiɛkpɔɔ Israel leele pre fooro le mu tia pe u koroo ŋga ki n nyukɔɔrɔ ni kre nya.
8 O Tafun Nyiɛkpɔɔ wre yo mbo,
“Ni leele lɛ, a pia jaa ni fana.”
A ki tia wra pe pe ŋmaashɔfun.
9 Ŋga wra pe nya kanyana nu kre,
kra u tɔɔra.
A u nyjeeri bituŋu na pan,
mu pe shɔ.
U koroo, na u foorochiɛn ndra na,
wra pe ndra lɔ.
A wre chɔɔ wra pe le,
mu yire fafa kre.
10 A nde u leele pre na yiri,
mna u taan,
mna tia Kpra Ŋumu wre yiɛ na je,
ki tia wra kaari pe loŋgo,
mna wi na pe ni.
11 La, u leele pre na kee nyjɛ yira pe Moses na u leele pre na fafa yire sɔɔnri, mnaa peyɛ wie mbo,
“A sena Nyiɛkpɔɔ,
ŋmba wra u leele pre,
na pe yurɛ tɛɛ mna epo nyiɛ,
kre kun wre nyi hin?
A sena Nyiɛkpɔɔ ŋmba wra tia,
u Kpra Ŋumu na tni pe nu,
wre nyi hin?
12 A sena o Tafun Nyiɛkpɔɔ,
ŋmba wra yire Moses na,
mna u jaŋga kpɔɔ tɛɛ,
mna kawako kee pe
wre nyi hin?
Wre wra tia epo nyiɛ,
kre na peeri pe yiɛ,
mna mɛɛ shɔ mna uyɛ ŋga,
nyjila kro nu.
13 Wre wra yiɛklu na u leele pre ni,
a pra tro epo latɛɛ nu,
na soolo pe feni na tro,
hali wa nsra gbro.
14 Imi na pe shie nui,
ni tra mbrɛrɛ nu,
mbe pe sɛ wuu kre,
pan chɔɔ o Tafun Nyiɛkpɔɔ,
Ŋumu na tia u leele pre na wuu.
Wra yiɛklu u leele pre pan,
mna u mɛɛ ŋga yɛnyiŋge.”
Fooro Chiɛn Nyiɛ Talaa
15 O Tafun Nyiɛkpɔɔ,
yire mu cheche yɛnyiŋge ndoo,
ŋga nu mu nyi nyjeeri wa kre nu,
mu kna mu o le.
Nyiɛkpɔɔ, o keshian ŋga mu yo,
kii wa mu na kpɔɔ kre,
sena ki nyi hin?
A sena mu jaŋga kre nyi hin?
Mu koroo, na mu foorochiɛn,
kre n wa o na na.
16 Ŋu wi o lɛ. O tolɛɛlɛ Abraham,
na Jacob n o chin na.
La, ŋu o Tafun Nyiɛkpɔɔ wi o lɛ,
a ŋu mu o ndra loni
mu yire fafa.
17 Mni a mu tia o laa,
mu na ŋga hin?
A mu tia o na ndikana pini,
mu na ŋga hin?
Jande Nyiɛkpɔɔ,
ndru mu pan o pan,
mu sumifɛɛnlɛ lɛ wre,
a mu leele lɛ wre.
18 Nyjila ka nu, na mu leele pre,
wo yi mu sumindoo cheche kre,
la, fuŋgaami ŋga, o loŋgoolo o ni,
mu ki taanla mu juari.
19 Mu leele lɛ wre mu yire fafa,
la, mu o pe na ŋu ma mu o le,
a ki sɛ pe na o n da,
mu pe mu leele tun.