62
Jerusalem ndra na, mba nyu tɔ,mbe sɛ su na kie ŋmaashɔmu,
na frakaa nya, mbe kiyɛ ta,
mbe pe na kania pe mu,
wɔmu nu.
2 Jerusalem, waŋgrɛ na ŋulo,
we mu frakaa
na mu yɛnyiŋge nya.
Pie mu yeeri mɛɛ fɔŋgɔ,
ŋga o Tafun Nyiɛkpɔɔ,
wre titi mu ŋga kre na.
3 Mu pe o Tafun Nyiɛkpɔɔ,
wre pan na ŋujuulee,
ndee lebiile yirɛ,
nyjɛ pe poo ndra na yi.
4 Pia na mu yeeri chia,
ndee chlɔ ŋmba pe je na.
La, mɛɛ fɔŋgɔ,
ŋga ni pie na mu yeeri yi,
“Nyiɛkpɔɔ yiɛshɔ mu na,”
a pie mu tra kre yeeri,
“Chlɔ ŋmba pe leŋge
yɛshɔɔrɔ nu.” Ŋgi na hin?
Mi e Tafun Nyiɛkpɔɔ,
wre yiɛ we shɔ mu na.
A mbe ŋu Jerusalem pe,
na ni bijɔ wi.
5 Imi na yirifuŋu bijɔ wru,
mbe leŋge kre,
pan mi Nyiɛkpɔɔ,
ŋmba ni mu faanri wre,
we mu wru mbe leŋge.
A imi na bijɔ plɔ,
yiɛshio u bijɔ na kre,
pan mu Nyiɛkpɔɔ wre yiɛ,
we shɔ mu na.
6 Jerusalem, ni ndoo shiefɛɛnlɛ tɛɛ,
mu mboe yire na,
pia nyu tɔ lafo na, ndee blee.
Pia wuu mbe sɛ su na,
pie mi e Tafun Nyiɛkpɔɔ
wre sɔɔnri,
7 mbe ni Jerusalem ŋga faŋga,
mbe ti ki mɛɛ ta,
waŋgra ŋga nu kro.
8 O Tafun Nyiɛkpɔɔ u nyu yo, a we yire u jaŋga kre na mbe ti ki pe ma mbo,
“E loŋgoolo wa e shɔlɔ ta,
mbe li na,
a waŋgra ka leele,
wa e simi fɔŋgɔ ta mbe gbɔ na.
9 La, yire mblɛ,
ee shɔlɔ yire kun kre,
yire ee yi li,
mbe o Tafun Nyiɛkpɔɔ wre,
ŋga mɛɛ.
A mblɛ pie tre sɛnyi,
yire yoori pre, we yi simi gbɔ,
ni Suminyuŋgo kre kagbala.”
10 Jerusalem leele,
e yili chia kre na,
e sɛ kolo wɔ e leele,
mblɛ pe ndru na paan,
katoo pre pan.
E kokpɔɔ wɔ,
e ki dnɛ klɔ ki na peii.
E flaŋgaa kan,
mbe ki ti waŋgrɛ yire leele,
kolo kre nya mbe tro.
11 O Tafun Nyiɛkpɔɔ ki kpali,
a ki sɛ lawee kro nu mbo,
“E le, e yo Jerusalem leele pan na,
e ŋmaashɔfun wre paan,
na e fɔtɔɔrɔ ni.
12 A leele mblɛ ndra,
o Tafun Nyiɛkpɔɔ lɔ pre,
pie pe yeeri
Nyiɛkpɔɔ leele cheche.
A pie ŋu Jerusalem yeeri,
‘Kakpɔɔ ŋga Nyiɛkpɔɔ Kori,
a u n ki je.’”