Ŋmaashɔmu Ketaan
61
O Tafun Nyiɛkpɔɔ Jaŋgafun wre,u Ŋumu le ni nu.
U ni wɔ mbe ni ketaan kre kpali,
shianfɛɛnlɛ pan.
U ni tun mbe ni paan,
mblɛ lɛɛ ki kla pre gbun nyiŋge.
Mbe paara mbe mblɛ pe yii,
mu le nyuŋgo pre shɔ mbe wa,
mbe mblɛ pe yii,
mu le wɔmu nu pre wɔ fimi na.
2 U ni tun mbe ni paan ki kpali na,
nyjila da mbe u nyu u leele
pre na,
mbe paan pe loŋgoolo,
pre sisam fɔlɔ tɔ,
mbe paan mblɛ pe nyɛni,
pre kro bre,
3 mbe paan mblɛ pe nyɛni,
Jerusalem na pre ŋga,
yɛshɔɔrɔ kpɔɔ,
mbe pia fooro li na,
la, mboo ŋgaa mɛɛ pie na koni.
Pia fooro mɛɛ kɔ na.
Pan pie pe na tiŋge,
ŋga o Tafun Nyiɛkpɔɔ,
wre titi luu mbe ki tɛɛ,
mbe u yɛnyiŋge nyina yi.
4 A pie ndru mbe kakpɔɛ,
nyjɛ yi kaari kajɛɛ,
mu mu yire sin na.
5 Ni leele, fumblɔ we yiri,
waŋgra fɔnyi nu,
mbe pan mbra e yurɛ le e pan,
mbe pe plɛ na e seele fali,
mbra e kagblɛ le e pan.
6 A pie na e yeeri,
o Tafun Nyiɛkpɔɔ wre
srawɔfɛɛnlɛ,
na u sumifɛɛnlɛ.
Yire ee na waŋgrɛ yire,
yɛtaara yirɛ yire lii,
mbra eyɛ kpɔɔri,
na yi yirɛ chichiele yire ni.
7 E yɛkuuro, na nyifɛɛrɛ,
ŋga kraa e kuu kre nyu we to.
A yire titi we tra kre ta mbe tni,
mbe ka ya e yɛtaara na,
ma gbeeshiin,
a e yɛshɔɔrɔ nyu wa to fio.
8 O Tafun Nyiɛkpɔɔ wre yo mbo,
“Ni kprakuɔn kori,
mu linkuuro kee, na juuro fun.
Kpra kolo na,
mbe ni leele pre ŋga fɔtɔɔrɔ,
mbe nyu nunu ŋga kie tni,
nyjila kro nu pe na pe ni.
9 A pe nanae mɛɛ we yili,
waŋgrɛ leele pre nu,
a mblɛ pie pe nya kro we chin,
na ni leele mblɛ pe,
Tafun Nyiɛkpɔɔ dwan lɛ.”
10 Jerusalem yiɛshɔ kpɔɔ,
kala ŋga o Tafun Nyiɛkpɔɔ pe,
kre na.
U tia chia kre pe na bijɔ,
ŋmba pe san wi.
Nyiɛkpɔɔ u san,
na ŋmaashɔmu,
na winyilee dodoŋgi ni.
11 Imi na pe yirɛ bie ndru,
mbe yi fin mbe lɛ kre,
pan o Tafun Nyiɛkpɔɔ Jaŋgafun,
wre we ti mbe frakaa na mɛɛ,
ŋgaa pe waŋgrɛ yire nu.