Jerusalem Mbakɔ Yɛnyiŋge
60
Jerusalem, yiri mna chiɛnri,na yila yi. Ŋgi na hin?
O Tafun Nyiɛkpɔɔ wre,
yɛnyiŋgee wa mu na.
2 Le, wɔmu kprikpri ki tra ŋga,
na ki leele tɔ poŋgo,
la, ŋu rɛ, o Tafun Nyiɛkpɔɔ wre,
yɛnyiŋge we pe mu pan,
na nyisee yi.
3 Waŋgrɛ leele, na pe ŋulo we pan,
mu nyisee ŋga ki nyaa kre na.
4 Yiɛ wa mu le mu fɛ mu kun,
mu nya kala ŋga ki pini.
Leele kro fni,
mu na paan mu pan,
a mu biile pre yiri haalee,
mu na paan katoo.
Pe pe yii kɛɛ na paan na pe ni.
5 Mu pe nya mbe tɛɛ,
mbe ki yɛshɔɔrɔ sisaa ti,
mbe mna jijawi.
Pie pan na waŋgrɛ yire,
yɛtaara yirɛ ni,
mbe paan mu ŋga,
pie yiri na yi ni epo kro,
mbe paan mu ŋga.
6 Pie yiri na nyuuma tataara ni,
Midian, na Ephah nɔɔ leele nu,
mbe pan mbe mu tra kre tɔ.
A pe plɛ we yiri Sheba leele nu,
mbe pan.
Na pe paan pie pan na swanyiɛ,
na tuwe ndiom tɛɛn ni,
mbra o Tafun Nyiɛkpɔɔ wre,
kaan mɛɛ.
7 Pie pan na Kedar mbaala kro ni,
mbe paan mu ŋga.
Pre na Nebaioth mbapilɛ kro ni,
mbe paan sra wɔ,
mbe o Tafun Nyiɛkpɔɔ wre ŋga,
u sragbunu kre na.
A O Tafun Nyiɛkpɔɔ wre,
we ti mbe u Suminyuŋgo,
kre buuro ta kpɔɔ mbe ya.
8 A krɔɛ kpɔɛ nyi yi paan,
epo yiɛ na mu pe na tloe yi,
ndee mu pe na katoo kotulo,
pe yiri mu na paan katoo ŋga hin?
9 Krɔɛ kpɔɛ yi yiri Tarshish na,
mu na paan,
na mu biile pre ni katoo,
kuyɔɔsu tra kre nu.
Pe paan na swafiŋge,
na swanyiɛ ni,
mbe paan o Tafun Nyiɛkpɔɔ,
Israel Nyiɛkpɔɔ Cheche wre,
ŋga mɛɛ.
Wre u tia waŋgrɛ kro,
u leele ŋga buuro.
10 O Tafun Nyiɛkpɔɔ wre yo Jerusalem pan mbo,
“Fumblɔ we pan,
mbe mu mboe yire sin,
mbe pe ŋulo mu sumi.
Ndaa ni krɔkuɔn tɛɛ,
mna mu ndie tini,
la, fuŋga mbe nyu mu na,
mbe mu fooro le.
11 Nyjila kro nu,
mu jlonwee nyu krɔɛ yire,
we nyaala mbe tni,
yia tɔ ble mbaa yo lafo na.
Mbe ki ti waŋgrɛ leele pre
kolo ta,
mbe pan na pe yɛtaara yirɛ ni,
mbe pe ŋulo pre pe yiɛklu.
12 La, waŋgrɛ, ndee ŋulo,
mblɛ pia mu sumi kre,
pie kla, a waŋgrɛ yire we ja.
13 Lebanon yɛnyiŋge ŋga pe ta,
kre kro we pan mu pan.
Pie pan na tinyi chichiele,
nyjɛ Lebanon na yire ni,
mbe paan ni Suminyuŋgo kre san,
mbe ni kakpɔɔ kre yɛnyiŋge ta.
14 Leele mblɛ praa mu fiŋge,
pre nanae we paan lɛɛlɛ mu yiɛ.
Leele mblɛ pe nsra mu le mu nya,
pre kro we pan,
mbe kosie kan mu yiɛ,
mbe mu yeeri,
‘O Tafun Nyiɛkpɔɔ wre kakpɔɔ,
Zion, Israel Nyiɛkpɔɔ cheche,
wre kakpɔɔ yi.’
15 Kii wa na pra mu je,
mna mu pra,
a ndro nsraa tro mu lawee na.
La, mbe ti mu kpɔɔ,
mbe pe chia ŋga ki nyu,
mbe pe yɛshɔɔrɔ lawee,
leele kro pan nyjila kro nu.
16 Waŋgrɛ, na ŋulo pie mu le,
imi na ŋuchlɔ u pɔ poorii,
nyinimi ni kre.
Kre mu chin na mi,
mu Tafun Nyiɛkpɔɔ wre,
wi mu ŋmaashɔfun,
a mi Jacob Nyiɛkpɔɔ Jaŋgafun,
wre wi mu ndra lɔfun.
17 Ŋga mbe paan mu ŋga,
swafre kre, mbe ki ti,
mbe paan mu ŋga swanyiɛ.
Ŋga mbe paan mu ŋga,
tɔɔnrɔ kre,
mbe paan mu ŋga swafiŋge.
A ŋga mbe mu ŋga,
nyuŋgo kɛɛn kre,
mbe paan mu ŋga swafre.
A na mbe paan mu ŋga dnɛ kre,
tɔɔnrɔ mbe paan mu ŋga.
Mbe ti mbe mu lefɛɛnlɛ pre mu le,
wejinyiŋge na frakaa ni.
18 Ma pɔɔrɔfɛɛnlɛ gblee yɛ loo,
mu tra kre nu na,
a ndro wa pan,
mbe mu waŋgra kre kla na.
Mu mu mboe yire mɛɛ tɛɛ,
‘Ŋmaashɔmu.’
Mbe mu jlonwee nyu krɔɛ yire,
mɛɛ tɛɛ, ‘Nyiɛkpɔɔ ŋga mɛɛ.’
19 Yila ma kie ti,
mna nyaa lafo na na,
a yefiŋge ma,
kie ti mna nyaa blee.
Mi mu Tafun Nyiɛkpɔɔ wre,
mbe pe mu blenyini nyisee,
a mi mbe pe mu yɛnyiŋge.
20 Mu foorolie ble yire nyu we to.
Mi mu Tafun Nyiɛkpɔɔ wre,
mbe pe mu pan nya yira,
nyjila kro nu,
a mu ja mbe kaan ni na,
mbe wɛ yila na yeŋge na.
21 Na ki waa pan ma,
mu leele pre we fraka,
mbe tra kre ta,
mbe tni nyjila kro nu.
Pre ndaa luu na tiŋge yi,
mbe yire pe na,
mbe niyɛ ŋga mɛɛ.
22 Mu sele ŋga kii fiɛn kuraa kre,
we kaari waŋgra ŋga kii jaŋga ni.
Mi wi mu Tafun Nyiɛkpɔɔ.
Nyjila ŋga ki fna nu,
mbe yire kee nyjɛ krɛrɛ pe,
nyaanyaa.”