Isaiah Leele Pre Sisamu Kee Yo
59
Kpra na, o Tafun Nyiɛkpɔɔ wre,kɛ n gbru, mbe kia da e na,
mbe e shɔ, a u ndiile n yurɔ,
a ki tia wa loo e pan.
2 La, e sisam ki tia, yire na
e Nyiɛkpɔɔ wre lalaa kun,
a ki tia u yiɛ wɔ e na,
a wa loo e pan.
3 Ŋgi na hin? E nyimi kna mu wo,
mu pimi li,
a kafinɛ na sisam kee bribri,
yi yilii e nyuu.
4 E na kpra yo e kala lihaa,
kala e fnɛ na tam shio,
a sisam kee e jawa na yi pini.
5-6 Sisam jawala nyjɛ e wru yi kre,
pan yi nyi na wɔɔ sisaa chrɛwɛ yi,
na mu chɛlɛ kre ka ja,
wɔɔ sisaa we yili ki nu.
Pan kee nyjɛ e jawa yire nyi,
na wɔɔ sisaa chrɛwɛ yi.
Na mu ki fɛɛri mu ja,
wɔɔ we foli ki nu mbe to,
a na mu ki ka mu ku.
La, jawala nyjɛ e wru yire,
yaa yaka ta yi nu,
pan ki nyi to na pe sepe vavaara,
tɛɛ mu yoŋgo tin,
faŋga ka n wa ki nu.
7 E pini nyaanyaa mbe sɛ sisaa pe,
ndee mbe sɛ ndro,
ŋmba u n yaka pe cha, mbe gbo.
A lawee ŋga nu ee tro kpan,
ee bawa ja, mbe ki kla.
8 E n wejinyiŋge kolo chin,
a lawee ŋga nu ee tro kre,
kpra lie n wa wa.
Kooloe nyjɛ na e tro,
yire kro ŋmaala.
A leele mblɛ pe tro yi na,
pre n wa wejinyiŋge nu.
Leele Pre Pe Sisam Yo
9 Leele pre yuu mbo,
“Fuŋga o chin ŋga ki tia,
wre na kpra haale,
a ki tia waa ja mbe fraka.
Nyisee haa o chaa, la,
wɔmu bribri nu o je na nyaari.
10 Pan o tali mboe na, na fuunlo lɛ,
na gbroi lafo na, mu yo ble ki wɔ.
O n na nyaa. Pan o nyi na,
gboolo lɛ kuulo ndoo.
11 Pan o nyɛni na jiin na sisire wi,
ndee, na katoo kotro wi.
Kpra lie o chaa, a o n na ki nyaa,
shɔmu o chaa, la,
wre na kre haale.
12 O Tafun Nyiɛkpɔɔ,
o sisam nɛɛ mu yiɛ,
a o sisam tia o pimi li mu yiɛ,
a wre titi ki chin ma.
13 O yiri mu mu taan,
mu je mu yo waa taa mu kro,
mu na o ŋmbilɛ fiŋge.
O jawala kee kro pe kafinɛ,
a kpra na yili o nyuu.”
14 Ki tia kpralie fun o nu,
a wre na frakaa lalaa le,
a ki tia kpra gbro
mu to o letee na,
a frakaa n lawee ta mbe yire.
15 Kpra kɔ o nu,
a ki tia na ndro laa,
sisaa pee na kre,
we kala ta leesaala pan.
O Tafun Nyiɛkpɔɔ wre yire kee,
nyjɛ nya na kpralie fun o nu,
a ki tia u yiɛ n shɔ o na.
16 Ki o Tafun Nyiɛkpɔɔ yaa,
na ndro n wa,
mbe leele mblɛ pe fiŋge kre shɔ,
a kra tia wra wre titi
jaŋga nyina,
mna pe shɔ mu uyɛ ŋga.
17 U frakaa u tɔ yoŋgo,
imi na ŋunɔwifun ŋunɔ wiyira,
teeri na uyɛ toni kre.
Mu ŋmaashɔmu pe,
na ŋunɔ wifun juulee yi.
Mu nyibinyiɛ dodoŋgi le, mu tɛɛ
mbe sisam pefɛɛnlɛ fɔlɔ tɔ.
18 Kee nyjɛ u leele pre,
loŋgoolo pe pe na yire we le,
mbe pe sisam fɔlɔ tɔ pe na.
Hali pe mblɛ pee wa,
mu tni haalee kuyɔɔsu trɛ na kro,
we pe ŋga pe sisam fɔtɔɔrɔ.
19 Leele we yire yila finhaa,
na yila tohaa,
mbe o Tafun Nyiɛkpɔɔ
wre mɛɛ fiɛ,
mbe u ŋga mɛɛ.
Ŋgi na hin? We pan,
imi na fuflɛ kpɔɔ
nyumu wru, na paan kre.
20 O Tafun Nyiɛkpɔɔ yo u leele pre pan mbo,
“E ndra lɔfun wre we yiri Zion na,
Jacob nanae,
mblɛ pe pe jawala chinɛ,
mu laa sisam kro
pre pan u paan.”
21 O Tafun Nyiɛkpɔɔ wre yo mbo,
“Nyu nunu ŋga,
mi na yire we pe yi kre,
ni Ŋumu ŋmba uu wa e nu wre,
na ni kee ŋga ni le e nyu na,
kre wa kɔ e nyu na,
a kia kɔ e biile,
ndee e nanae nyu na,
mu yire fuŋgaami,
mbe sɛ su nyjila kro nu.”
Pan o Tafun Nyiɛkpɔɔ yo.