Kpra Sumɛɛ
58
O Tafun Nyiɛkpɔɔ wre yo mbo,“E gblee le kpɔɔ,
imi na ee ja kpan.
E ti mbe e mana yili kpɔɔ,
na bnɔ pe foo,
mbe e yo ni leele,
Israel leele pre pan,
na pe sisaa pe, mu o Tafun
Nyiɛkpɔɔ wre taan.
2 Blenyini ŋga pe ni sumi,
mu na peyɛ pini,
na pe ni kee chaa mbe chin,
mu na pini,
na waŋgra ŋga leele mblɛ,
pe kee ŋga ki fraka pini,
a pe n Nyiɛkpɔɔ nyu kee je lɛ.
Mu na yuu ni pan na,
ni pe ŋga mbra nyjɛ yi fraka,
ŋgi na hin?
Na pe yiɛshɔ na pe ni sumi.
3 Ni leele pre peyɛ wie mbo,
‘Yira ŋgi ki tia o na ble funi,
a O Tafun Nyiɛkpɔɔ,
wre n ki nya ŋga hin?
Mni a o oyɛ nyjii,
a u n ki chin ŋga hin?’”
La, O Tafun Nyiɛkpɔɔ,
wre yo pe pan mbo,
“Ble nyjɛ nu e ble funi kre,
kee nyjɛ yi tna e pan e pini,
mu na e tnumu tunfɛɛnlɛ
dnumu.
4 Na e blefun,
krɔ na kakrɔ ni e ki koo,
mbe ndrashelee tɛɛ,
mbra eyɛ gbuun kaŋgroe ni.
Kre ki tia mi Nyiɛkpɔɔ,
a ni n na e nyiɛtalaa ndru kre.
5 E jawa na kee, ŋga mi
e Tafun Nyiɛkpɔɔ wre chaa,
yi na ee blefun,
mbe eyɛ nyjii, mbe ndra kna,
mbe soo na nyaa yi,
ndee mbe kumu yoŋgo tɔ,
mbe tni tɔɔnrɔ nu,
kena e jawa na kre ni chaa,
ni sumi ble ra?
6 Blefuŋgo ŋga nyini ni chaa
yi na,
leele mblɛ pe yii,
mu jlɔnyi le pe na,
mu pe le nyuŋgo finfin,
na pe fiŋge kre,
na ee pe wɔ jlɔnyi yire na,
mbe wa mbe pe peyɛ ta.
7 Ndro ŋmba klo ta kre,
na mu sro ta, u ŋga ka mbe u li,
a mblɛ pe n lawee ni na sni kre,
pe ŋga lawee.
A na mu ndro nya na,
u tro wejinwaara,
u tɔ yoŋgo.
A yaa shia krɔ kna,
mbe wa yire titi nyimi leele na.
8 Kre mbe nyu e na,
mbe e pe chasi,
na bnimi nyu yila yi.
A mbe e tra nyaanyaa,
a nyjila kro nu, mi na yire lɛ,
mbe ni e shɔ,
mbe kɛ tɔ e na kokoo kro na.
9 Na ki pan ma,
a e nyɛni,
mu mi e Tafun Nyiɛkpɔɔ wre,
tali kee ka, mbe shɔ e pan,
mbe yo na mi wi kre.
Ndro waa shia u ŋmbrɔ fiŋge,
ndee mbe kala fnɛ,
mbe baa u ŋmbrɔ na,
ndee mbe sisam kee ka yo u na.
10 Na e leele,
mblɛ klo ta pre kaan sro,
mu na mblɛ pe n lawee ni na sni,
pre kaan lawee,
kre kie ti wɔmu ŋga ki e fɛ,
mu kun kre we kna nyisee.
11 Na ki pan ma,
kre O Tafun Nyiɛkpɔɔ wre,
we e le nyjila kro nu,
mbe yaka wa e ta,
a na ee wa tablɔ tra nu kuraa kre,
we e ŋga yira ŋga ee ka mbe yɔɔ.
We ti mbe e faŋga ta,
mbe pe na kagbla,
ŋga yirɛ yi nyumu taa yi,
ndee mbe pe na lafolo,
ŋga nu nyumu na kɔ yi.
12 A kalonyi nyjɛ yi juari,
mu wo fafa kre,
yire ee yi nɔɔ le,
mbe yi gbeele mbe sin.
A pie e chin na yire e ndru,
mu chia kre mbokuɛn
yire sin na,
mu kalonyi juaraa yire yire,
mu yire na.”
Wuuble Kre Lie Tnu
13 O Tafun Nyiɛkpɔɔ wre yo mbo,
“Na e ni Wuuble kre pe cheche,
a e n tia e yiɛ nyina,
yire titi chaara na ki ble kre,
mu tia ni ble cheche kre,
kee e shian,
a e ki ŋga buuro,
a e n kolo kun,
ndee mu tnumu tun,
ndee mu sɛ tni na kewɛɛ yuu,
kre ble kre nu wala,
14 kena ni sumiɛ kre ndra na,
ee yɛshɔɔrɔ li,
a mbe ti mbe leele kro,
e ŋga buuro lawee kro nu.
A tra ŋga ndaa e tolɛɛ,
Jacob ŋga kre, e yiɛ we shɔ wa.
Mi e Tafun Nyiɛkpɔɔ wre
ni ki yo.”