Israel Leele Sɛɛn Sumi
57
Frakafɛɛnlɛ kuu,a lewo n na ki jawa kpɔɔ,
mbe ki nɔɔ chin na,
na lewo frakafun ku mu sɛ,
sisam kanyana nu ki u woni.
2 Lewo ŋmba kepele ki nyu kpan,
na u ku u wejinyiŋge taa,
mbe wuu.
3 E pan mbe ni e kala li,
yire chlɛfɛɛnlɛ,
na leŋgeere klafɛɛnlɛ,
na tiɛrifɛɛnlɛ biile.
4 Kafinɛfɛɛnlɛ nanae,
mblɛ e yiri mu ni taan,
ndro ŋmbi e pini na tɛɛ,
mu na ndile woni,
na u nyina ŋga hin?
5 Ŋga e chin kro yi na ee sni,
na chiɛlɛ ni tinyi nyjɛ jaara,
e sɛɛnlɛ peerii kre,
mbra e biile teeri,
mbra sra woni lɔɛ landɛɛ,
dnɛ lawee nyjɛ nu e sragbuɛnlɛɛ,
sin sin yire nu.
6 Lɔɛ yire nu e dnɛ plɔplɔ woni,
na yi pini sɛɛnlɛ na sumi,
mbe simi, na shɔlɔ tɛɛ,
mbra prɛ woni mbra yi kaan.
Kena e jawa na,
ni yiɛshɔ yire kee nyjɛ na ree?
7 Nyuɛ gedenyi yire ndrɛ na,
e shie na sni, na e prɛ woni wa.
8 Hali e sɛɛnlɛ pɔ pɔ,
mu hlu e krɔɛ kro,
mu yɛ hlu e krɔɛ jeelee na.
E ni je, mu na yonyi laala eyɛ na,
na swa toni,
na e tamfɛɛnlɛ pre kaan,
mbe chiin sni na pe ni,
mbe e niŋge chin mbe kɔ e na.
9 E tlade, na olive simi faa,
mbe sɛ Ammon leele sɛɛn,
Molech kre sumi.
Hali e leele tuni
mbe pe sɛ haalee,
mbe sɛ gboolo yeeri.
10 E tro yire kooloe nyjɛ na,
na eyɛ fnai finfin,
hali yaa tni mbe jawa,
mbe chin na yirɛ wɛɛrɛ
kro e taa.
E jawa na yire yi e kaan faŋga,
a ki tia sra na wɔ e na.
11 Yirɛ nyji yirɛ yi sɛɛnlɛ,
a e na yi fiɛ,
mu tia e na kala fnɛ ni pan,
mu ni kee fɛɛ ma ŋga hin?
Kena ŋga ni pieri mu e ti,
a ki mu kre, kre ki tia,
e n na ni kaan buuro ŋgaa?
12 E jawa na kee,
nyjɛ e pini yire fraka,
la, mbe e kepele wɔ mbe nyina,
a e sɛɛnlɛ yire wa jaa ya e na.
13 Na e waa na nyɛni na ndro chaa,
mbe u ya e na kre,
e yo e sɛɛnlɛ yire pan,
mbe yi paan e shɔ.
Fuflɛ kie pan mbe yi wru,
mbe sɛ, nyu fuflɛ waara,
kie yi fɔ mbe e yi cha mbe la.
La, lewo ŋmba we mi,
Nyiɛkpɔɔ pe u fɛndrahaa kre,
we tra kre, na ni nyua cheche
kre ta mbe tni.
O Tafun Nyiɛkpɔɔ Yaa Mblɛ Pia Jaa Yaka Pe Pre Na
14 O Tafun Nyiɛkpɔɔ wre yo mbo,
“E kolo wa, e ki gbeele,
mbe ni leele pre tro mbe pan.”
15 O Nyiɛkpɔɔ cheche wre,
uu wa nyjeeri nyjila kro nu,
a kee ŋga u yuu yi kre mbo,
“Kii wa na nii wa cheche ndoo,
nyjeeri, la, mi na leele mblɛ,
pe peyɛ nyjii,
mu na kaan ni na pree wa,
a ni yaa pe na.
16 Ni leele, mba kro,
mbra e yiɛ gbuun nyjila kro nu,
ndee mbe krɔ yii na e ni,
ŋgi na hin? Mi ni e wa,
kena ni n na chaa,
e kepele ndra na,
mbe ni sɔɔnrɔ ku.
17 Ni krɔ na kun na e ni,
e sisam, na e jajaara ndra na,
kre kra tia ndaa e ndie tini,
mna e je.
A e na je mna taa,
yire titi sisam kee na.
18 Ni chin imi na e kepele nyi,
la, mbe e tra,
mbe yiɛklu e pan, mbe e bre.”
19 O Tafun Nyiɛkpɔɔ yo mbo,
“Israel leele mblɛ e nyɛni kre,
e na mboo ŋgaa mɛɛ koni,
e mblɛ ee wa nyjɔ, na haalee kre,
ee wejinyiŋge ta, a mbe e tra.
20 La, sisampefɛɛnlɛ pre rɛ,
pan pe nyi na epo nyumu,
ŋga ki shie na paan,
a kia jaa yire mbe wuu kre yi.
Pan ki mbapilɛ waa na shie,
na paan tablɔ na pooro ni.”
21 O Tafun Nyiɛkpɔɔ wre yo mbo,
“Sisampefun n wa,
na wejinyiŋge ni.”