Waŋgrɛ Leele Pre Plɛ We Pe Nyiɛkpɔɔ Leele
56
O Tafun Nyiɛkpɔɔ wre yo u leele pre pan mbo,“E na kpra lii,
e na kee ŋga ki fraka pini.
Ŋgi na hin?
Ni ŋmaashɔmu kre nyjila da,
a kia mu mbe leele,
ni frakaa nya tra ŋga nu kro.
2 Lewo ŋmba we li yire kee,
nyjɛ na mbe yi pe,
mbe wa Wuuble kre kla,
mbe uyɛ wɔ sisam kee nu kre,
mbe ufun wre dwan.”
3 Fuŋu ŋmba u yiri waŋgra ka nu,
mu kun mu pan mu mbra,
o Tafun Nyiɛkpɔɔ na kre,
waa shia yo na,
“O Tafun Nyiɛkpɔɔ wre we ni wɔ,
mbe yili u leele nu.”
A blɔ ŋmba pe san kre,
waa shia yo uyɛ pan na,
“Tiŋge waa kpokpo wi mi,”
ŋga wa jaa se kre ndra na,
kena wa jaa pe,
Nyiɛkpɔɔ leele pre wa.
4 Kee ŋga O Tafun Nyiɛkpɔɔ wre yo yi kre mbo,
“Na pe blɔ san,
a wra lii ni Wuuble kre na,
mu na kee ŋga ki tna ni pan pini,
mu na lii ni nyu nunu kee
na kre,
5 kena mbe ufun wre mɛɛ nyunɔ,
mbe tɛɛ ni Suminyuŋgo wa.
We mɛɛ ta mbe wɛ na,
na wraa biile ni na,
a u mɛɛ kre wa ja mbe fɛɛ.
6 A waŋgra fɔŋgɔ leele,
mblɛ pie kun,
mbe mbra mi e Tafun wre na,
mbe ni kori, mbra ni sumi,
mbra lii ni Wuuble kre na,
mbe pia ki kla,
mbra lii ni nyu nunu kee,
kre na kre,
7 pre leele pre, mbe pan na pe ni,
Zion nyua cheche kre na,
mbe pe ŋga yɛshɔɔrɔ,
ni katoo nyiɛtalaa ndoo wa.
A yirɛ nyjɛ ni pie na sra woni,
na nyjɛ pie na sroi,
ni sragbunu kre na,
mbra ni kaan kre, mbe yi shɔ.
Ŋgi na hin? Waŋgrɛ kro we,
ni katoo kre pe nyiɛtalaa ndoo.”
8 O Tafun Nyiɛkpɔɔ Jaŋgafun, ŋmba u Israel leele mblɛ pra yii, mu sɛ waŋgrɛ nu pre yoori, mu pan na pe ni wre yo mbo,
“Mbe pan na leele plɛ nyini ni na,
mbe paan pe ya mblɛ ni yoori
mu pan pre na.”
Nyiɛkpɔɔ Paara Mu Israel Loplombo Taan
9 O Tafun Nyiɛkpɔɔ yo,
waŋgrɛ leele pre pan,
na pe pan na nyaa lam yurɛ lɛ,
mbe paan u leele pre yii mbe ka.
10 Yire Israel leele yɛkulo,
fuunlo lɛ yire,
e kro n jawala ni.
Pan e nyi na nyikaanla,
mblɛ pe lawee sri,
a pia jaa tuanri, mbe sni sni,
mbra ŋunɛ ŋunu lɛ.
Pe n yaka chin,
na ŋunumu bɔkɔ.
11 Pan e nyi na,
nyikaanla fuŋgofɛɛnlɛ lɛ,
pra li mu yɔɔ.
Pan e nyi na mbaala lefɛɛnlɛ,
mblɛ pra kala nɔɔ loo lɛ,
pre titi kooloe nyjɛ pe chaa,
na pe tro, na wii,
nyjɛ pre titi chaa na.
12 E yuu eyɛ pan na,
“E ti mbe o gbɔ mbe to aŋga,
baŋga oo gbɔ ma na,
aada mbe wɛ ma na kple.”