Nyiɛkpɔɔ Fooro Chiɛn
55
O Tafun Nyiɛkpɔɔ yo mbo,“Yire mblɛ gbɔɔ ta kre,
e pan e nyumu shɔ e gbɔ.
Yire mblɛ pan swa n wa kre,
e pan e sro shɔ e li finfin,
imi na ee ja.
E pan e simi, na nɔnɔ shɔ e gbɔ,
mbe yaa kaprɛ kuraa tɔ.
2 Yira ŋgi ki tia e na swa klai,
yira ŋga ki n pe sro na,
mu na tunumu tuni,
na fnai yira ŋga kia jaa yɔɔ,
na ŋga hin?
E ndie tɛɛ e loo ni pan,
e kee ŋga ni yuu kre pe,
kre ee sro chichie ta mbe li,
mbe ki tna e nyiɛ pan.
3 E ndie tɛɛ e loo, e pan ni pan,
kre ee ŋmaa ta.
Mbe e kori na ni kpra koroo,
ŋga nyu ndaa yo,
Ŋunu David pan kre ni.
Mbe nyu nunu ŋga,
ki n nyukɔɔrɔ ni pe na e ni.
4 E le, Mi ni David pe ŋunu,
mbe u waŋgrɛ le,
mbe ni dansiɛrɛ li pe pan.
5 E le, ee waŋgrɛ,
nyjɛ leele e n chin,
a pe n e chin pre yeeri,
a tafɛŋgɛ ni pie pan.
Ŋgi na hin? E Tafun Nyiɛkpɔɔ,
Israel Nyiɛkpɔɔ Cheche wre,
we e le kre yɛnyiŋge ŋga.”
6 E e Tafun Nyiɛkpɔɔ wre haa cha,
ee u nya, e u yeeri nyjila,
ŋga ni u mbra e na ŋga.
7 E ti mbe sisampefun,
u sisam pee ti,
mbe laa u sisam jawala kro,
mbe kna mbe pan,
o Tafun Nyiɛkpɔɔ wre pan.
We u fooro le,
mbe u sisam ti mbe u kɛ.
8 O Tafun Nyiɛkpɔɔ wre yo mbo,
“Ni jawala ma e jawala,
a e kooloe yi yɛ na ni wo ni.
9 Imi na nyjeeri na tra lalaa,
vala mu kpɔɔ mu da kre,
pan ni kooloe kpɔɔ,
mu vala mu wɛ e wee na,
a pan chɔɔ ni jawala kpɔɔ,
mu nyu mu wɛ e jawala na.
10 Imi na nyiɛ, na sugbeŋge,
yiri nyjeeri na woni tra,
mbe yia ndru mbe sɛ nyjeeri,
fɔna yi tra nyiŋge tun,
mbe ki ti mbe yirɛ fin, mbe sɛ,
mbe ki ti, mbe falifun sro ta,
mbe yɛ ta luuro kre,
11 pan chɔɔ kee,
ŋga ki yili ni nyuu kre nyi.
Kee kre wa ndru,
mbe pan ni pan waara,
fɔna ki sɛ kee ŋga ni chaa,
mbe ki pe kre pe mu kɔ tun.
Nyiɛkpɔɔ Leele We Yɛshɔɔrɔ Li
12 Ni leele, na e waa eyɛ ta kre,
yɛshɔɔrɔ ni ee yili Babylon na,
mbe ndru mbe sɛ e chia,
na wejinyiŋge ni.
Na e shie mbe nyuɛ na nyambie,
na mɛɛ koni,
mbe tinyi na yɛshɔɔrɔ lii.
13 Tra ŋga wuuro na tɔ fa kre,
cypress na myrtle tinyi
yie fin ki na.
Yire tinyi yire we pe sɛmbɛɛrɛ
yirɛ wa, nyjila kro nu.”