Jerusalem Yɛnyiŋge Ŋga Kie Kɔɔ Ta
54
O Tafun Nyiɛkpɔɔ yo mbo,“Ŋu chlɔ gbende,
mɛɛ kɔ mu yɛshɔɔrɔ gble le,
ŋgi na hin?
Fuŋga mu biile we nɛɛ,
mbe wɛ chlɔ ŋmba plɔ
u u naari,
nyjila kro nu wre na.
2 Ka ya mu yoŋgo nyuŋgo kre na,
mu ki vala.
Ki yii kɛɛn yire kan mbe yi yire,
mu ki mɛnyi yire pɔ chichie.
3 Ŋu na mu nanae,
we waŋgrɛ trɛ shɔ pe pan,
mbe tni pe kajɛɛ yire na.
4 Maa shia fiɛ, nyifɛɛrɛ wa mu gbo,
a maa ti mbe mu sɔɔnrɔ ku,
mu yiɛ wa le nyumu fio.
Sisam kee nyjɛ mna pe,
mu bichabim nyjila yire kro fɛɛ.
Maa ti mbe nyifɛɛrɛ na mu kuu,
na mu pe lekuchlɔ.”
5 O Tafun Nyiɛkpɔɔ Jaŋgafun wre,
Israel Nyiɛkpɔɔ Cheche wre,
wre wi tra ŋga kro Nyiɛkpɔɔ.
Wre u mu wa,
a u pe na mu plɔ wi,
a wre wi mu shɔfun.
6 Israel, pan mna nyi,
na bichable ŋmba pe leŋge,
mu ndru mu u je wi,
a ki tia u yiɛ je kpɔɔ.
La, o Tafun Nyiɛkpɔɔ wre ndru,
na mu yeeri na mu pan u jaara,
na yuu mu pan mbo,
7 “Ndaa mu je,
nyjila chiɛri ka nu,
la, mbe yire,
ni foorochiɛn kpɔɔ kre na,
mbe ndru mbe pan na mu ni.
8 Ni krɔ na kun na mu ni kpɔɔ,
a ndaa krɔ kna mna wa,
mu na nyjila chiɛri.
La, ni koroo kpɔɔ ŋga kii wa,
nyjila kro nu kre ndra na,
mbe mu fooro le.”
Pan mu Tafun Nyiɛkpɔɔ,
ŋmba u mu ndra lɔ wre yo.
9 Pan ki nyi na imi ndaa yo,
Noah pan fa kre yi.
Ndaa nyu yo u pan na,
mba nyumu tɛɛ mbe tra kla na.
Pan chɔɔ ni nyu yuu mu pan na,
ni krɔ wa kun na mu ni,
mbe ni mu ndie tini na fio.
10 Hali na ki pan na,
nyuɛ klɔ na tuuri,
a nyambie na seeri kuraa kre,
yaka wa ja mbe ni koroo,
ŋga ni mu kori,
nyjila kro ni kre jɔŋgɔ,
ndee mbe jaa wejinyiŋge
nyu nunu,
ŋga mi na ŋu pe kre kun.
Pan mi mu Tafun Nyiɛkpɔɔ,
ŋmba ni mu fooro chin wre yo.
11 O Tafun Nyiɛkpɔɔ yo mbo,
“Jerusalem, pe mu le kanyana
nyini nyini nu,
mu tia mu sɔɔnrɔ ku,
a ki tia mu yiɛ je,
la, mi mu Tafun Nyiɛkpɔɔ,
wre we mu yire mbe yire,
mu jeelee na, mbe chia kre nɔɔ le,
na dnɛ mbruku wee,
nyjɛ ndrɔ yi sheli,
a pra yi yeeri Sapphire yire ni.
12 A mbe mu nyinyi gedenyi,
yire sin na dnɛ,
nyiɛ nyjɛ pe yeeri ruby yire ni,
mbe mu jlonwee nyu krɔɛ yire pe,
na dnɛ nyjɛ yi chiɛnri ni,
mbe bunyi sin na dnɛ,
nyjɛ ndrɔ yi sheli ni.
13 Mi mu Tafun Nyiɛkpɔɔ wre,
we mu biile pre nyina,
ŋga ki fna mbe pe pe,
mbe nyu pe tnimu nu,
mbe wejinyiŋge ta.
14 Frakaa, na kpra lie we ti,
mu yire gbiŋmbi,
a ŋu na leele,
mblɛ pe mu leele pre fiŋge,
mu tia fiɛrɛ kpɔɔ na woni pe na,
pre haa we le na pe ni.
15 Na ndro waa pan,
mbe wi na mu ni,
kena mi ma ni ufun ŋga kolo.
Ŋmba we pan,
mbe wi na mu ni kpan,
we to mu yiɛ.
16 Le, mi ni fiireefun wa,
mbe u kaanlɛɛ fɔ mbe yi nyi,
mbe u tɔɔnrɔ le ki nu,
mbe ki tɛɛ mbe wiyira pe.
A mi ni ŋunɔwifun wa,
mbe u wi mbe lawee kla.
17 Ŋunɔ wiyira ŋga kie yiri,
mbe mu taan kpan,
kia jaa tnumu tun.
A ndile ŋga kie paara,
mbe mu taan kpan,
pie ki fun gbun pimi ni.
Mbe kɛ tɔ ni leele pre na,
mbe ti mbe pe wi,
mbe yili nyjila kro nu.”
Mi pe Tafun Nyiɛkpɔɔ ni ki yo.