Kee Ŋga Nyiɛkpɔɔ Sumifun Wre Pe Mu O Ŋga
53
Ndro ŋmbi u kee ŋga o yuu,ŋga shɔ mu li hin?
A ŋmbi u o Tafun Nyiɛkpɔɔ wre,
jaŋga nya kee ŋga nu hin?
2 Nyiɛkpɔɔ na tia u sumifun wre,
na lɛ u yiɛ na tiŋge
ŋga ki fin jle yi.
Wra pe na didiŋge,
ŋga ki yili tra shelee nu yi.
Ndro nsra u kumu chin,
a yaka nsraa wa u na,
mbe ti u yɛnyiŋge ta,
ndee mbe ti u kee pe,
niŋge ni o pan.
U lawee ka nsraa wa,
mbe o nya,
mbe ki ti u kee tna o pan.
3 Ndro nsra u le mu nya,
a pra u je,
U kee naa fooro ni,
a wra kala nya mu mu.
Leele naa u le na yiɛ woni u na,
pe nsra u le mu nya,
a ndro nsra u ŋga buuro.
4 Kpra na, wre wra o kanyana,
kro shɔ mu tio,
mna fna kpɔɔ o tlo,
a nde kee nyjɛ krɛrɛ kɔkro ni,
o na jawa na,
Nyiɛkpɔɔ wra u ndie tini.
5 La, o sisam ndra na pra yila,
mna u su chombo ni,
a o punɔɔ ndra na,
pra u gbun mu laala.
U kanyana ŋga wra nya ndra na,
o wejinyiŋge ta,
a u klɛ tlo yire ndra na,
o saanla yira kɛɛ.
6 Pan o kro na pe,
na mbaala mblɛ pe fun lɛ,
o kro na ta o yɛ yɛ,
na tro kooloe nyjɛ o chaa na.
La, o Tafun Nyiɛkpɔɔ wre,
na o kro sisam kanyana shɔ,
mu u tio.
7 Pra u fiŋge, ande wra uyɛ nyjii,
a u nsra nyu ka kun.
Pan pra u yii mu sɛ,
na pe shie mbɔɔ gbo haa.
Imi na mbɔɔ pierii,
u yooro knumufun kɛɛ kre,
pan wra pe, u nsra nyu kun.
8 Pra kpra fɛɛlɛ,
mna u gbun na kumu pimi ni.
Ndro nsra kee ŋga kra u da,
kre le mu nya.
A u leele pre sisam ndra na,
pra u gbo.
9 Kii wa na u nsra da mu sisaa pe,
ndee mna da mu kala fnɛ.
A nde pra u le swafun wa faŋga,
sisampefɛɛnlɛ plɛ lehaa.
10 O Tafun Nyiɛkpɔɔ wre chaara,
kra tia u sumifun wre,
na kala nya kpɔɔ.
U kumu kre na pe srawɔɔ,
ŋga ki lewo shɔ pimi lie nu,
mu sɛ sisam tinkɛɛ nu.
Ki tia ka we ya u ŋmaa na,
mbe u u nanae nya,
a kee ŋga o Tafun Nyiɛkpɔɔ jawa,
mbe pe kro, we ki pe.
11 U kanyana kre kɔkro kre,
we ki yɛshɔɔrɔ nya,
mbe chin na u n fna finfin.
Kii wa na u n sisaa ka pe,
nde we leele sisam kanyana,
nyjɛ pie na nya yire nya,
mbe ki ti mbe leele pre tataara,
wa pimi li na.
12 Ŋga u u ŋmaa tɛɛ,
mu sra wɔ kre ndra na,
o Tafun Nyiɛkpɔɔ we ti u buuro,
na jaŋga ta.
Leele naa jawa,
na sisam pefun na wi,
la, o sisam ndra na wra yila,
mna kala nya,
mna Nyiɛkpɔɔ tali,
mbe u o sisam ti mbe o kɛ.