Nyiɛkpɔɔ We Jerusalem Shɔ
52
Jerusalem, maa ŋunu,muyɛ le faŋga.
Kakpɔɔ cheche kre,
mu dodonyi chichie wru mu le.
Nɛɛrɛ leele,
mblɛ pe n Nyiɛkpɔɔ chin pre,
pia le chia kre na na.
2 Jerusalem, yiri bloŋgo ŋga nu,
mu nyi mu tni kre nu.
Zion bichlɔ ŋmba pe yii,
mu na shie.
Wi mu tɔɔnrɔ mɛnyi nyjɛ pe le,
mu yulɔ yire wɔ mu wa.
3 O Tafun Nyiɛkpɔɔ Jaŋgafun wre yo mbo,
“Ni leele, pe nsra e lɔ na swa ni,
pan chɔɔ ndro wa yaka tɔ,
mbe e shɔ mbe wa.
4 Jle kre e na sɛ kaari fumblɔ,
Egypt tra nu,
la, mbakɔ, Assyria leele,
na e yii mna sɛ e fiŋge.
5 A fuŋgaami, kala nunu kre
ki pini Babylon tra nu.
Pe ni leele yii mu sɛ,
a swa ni ma pe pe lɔ.
Leele mblɛ pe jaŋga lii pe na pre,
pe pe pini na tɛɛ.
A blenyini ŋga,
pan pe ni mɛɛ kre le fiɛn,
na jiɛnlɛ kee yuu ni na.
6 Nyjila kaa wa,
mbe ni leele pre ni mɛɛ chin,
yire ble yire nu pie sɔɔnri,
na ndaa klu,
mna yire kee yire yo fa.”
7 E le imi na ketaan kre kpalifun,
ŋmba u yiri nyua na,
na paan wre jewrɛ nyu mu da.
Wejinyiŋge kee,
na ŋmaashɔmu kee u kpali.
Wre u yuu Jerusalem pan mbo,
“Mu Nyiɛkpɔɔ wre u
ŋunumu lii?”
8 Yire mblɛ e kakpɔɔ kre sri kre,
e loo, e mana kpɔɔ tɛɛ,
e yɛshɔɔrɔ gblee le.
Na o Tafun Nyiɛkpɔɔ waa ndru,
mu pan Jerusalem na,
leele pre kro we ki nya nyini ni.
9 Jerusalem kajaa leele,
e yiri e yɛshɔɔrɔ mɛɛ kɔ kpɔɔ.
Ŋgi na hin? O Tafun Nyiɛkpɔɔ e shɔ,
mu e bre.
10 O Tafun Nyiɛkpɔɔ,
ŋmba u pe cheche wre,
u tia waŋgra kro,
u jaŋga kpɔɔ kre nya,
ki tia ndro kro,
we Nyiɛkpɔɔ ŋmaashɔmu kre nya.
11 Ni leele, e yili Babylon na.
Yaa shia kɛ taa afuŋgo yira ka na.
E eyɛ pe cheche,
yire mblɛ e Suminyuŋgo yirɛ,
cheche yire tru kre.
12 Yaa fiɛlɛ mbe yili, ŋgi na hin?
Ndro ma u e ni ni.
Israel Nyiɛkpɔɔ wre,
we yiɛklu e pan,
mbe kee sisaa ka wa e ta.
Sumifun Wre Kanyana
13 O Tafun Nyiɛkpɔɔ wre yo mbo,
“Ni sumifun wre kee ŋga we pe kro,
we ki pe ki kolo na.
Pie u ŋga mɛɛ na buuro kpɔɔ.
14 Ŋga lenɛɛrɛ na kee ŋga,
kra u da nya jle kre, kra pe fo.
Wra chinɛ mu peere pe yiɛ na,
a u nsra lewo wru na.
15 La, u kee we waŋgrɛ kro,
pe kawako ni,
a ŋulo we u nya,
mbe nyu pɔ pe na.
Ŋgi na hin?
Kee nyjɛ pe nsra yo pe pan yire,
pie yi nya, a kee nyjɛ,
pe n da mu loo yire, pie yi loo,
mbe yi nɔɔ loo.”