O Tafun Nyiɛkpɔɔ We Jerusalem Bre
51
O Tafun Nyiɛkpɔɔ wre yo mbo,“Yire mblɛ e ŋmaashɔmu chaa,
mu na o Tafun Nyiɛkpɔɔ,
wre haa chaa kre,
e na kaalɛɛ nyjɛ,
Abraham naa pini yire pini.
Wre wra pe na dnɛ,
ŋga nu pra e wɔ mu yili yi.
2 Nyiɛkpɔɔ wra Abraham wɔ,
na u pe e tolɛɛ,
mna Sarah wɔ na u pe e lelɛɛ.
Ŋga wra Abraham yeeri,
na wre nunu chom wi,
a wra u dwan mna u ŋga biile,
mna tia u nɔɔ leele na nɛɛ.”
3 Pe Jerusalem ja, la,
O Tafun Nyiɛkpɔɔ,
we kakpɔɔ kre fooro le,
mbe ki leele pre bre.
We ti mbe ki tablɔ tra kre kna,
mbe pe na Eden kagbla kre yi.
Pie yɛshɔɔrɔ kpɔɔ nya chia kre na,
mbe mboo ŋgaa,
na yɛshɔɔrɔ mɛɛ loo wa.
4 O Tafun Nyiɛkpɔɔ wre yo mbo,
“Ni waŋgra, na ni leele,
e loo ni pan,
ni waŋgra e ndie tɛɛ ni pan,
mbe ti ni mbra sɛ
waŋgrɛ yire nu.
Ni mbra we ti mbe kpralie pe,
na nyisee yi waŋgra kro nu.
5 Ni frakaa paan nyaanyaa, kia mu,
a leele we ni ŋmaashɔmu nya.
A ni jaŋga we ti,
mbe waŋgrɛ ni kpralie nya.
Kuyɔɔsu trɛ nyjɛ yii wa haalee,
yire leele we dankna ni na,
mbe ni jaŋga kre nya.
6 E yiɛ yire e le nyjeeri,
e yiɛ wa e tra le.
Nyjeeri we fun na wree yi,
mbe tra lɛ gbɔgbɔ na yokunu yi,
mbe leele mblɛ pee wa,
mu tni ki na kre ku,
na shunshɔɔnlɔ lɛ.
La, ni ŋmaashɔmu n nyukɔɔrɔ ni.
A ni frakaa we pe nyjila kro nu.
7 Na ndro chaa mbe fraka,
mbe lɛɛ wɔ,
mbe taa ni mbra yire na kre,
kena ufun wre u ndie
tɛɛ chiriri.
A na leele mu tɛɛlɛ,
na kefuɛn yuu mu na,
maa shia ti mbe mu sɔɔnrɔ ku.
8 Pre leele pre,
mblɛ pe yire kee yire pini kre,
duŋu we pe ka na,
yokunu pe ta na kaa.
La, ni frakaa n wa na nyukɔɔrɔ ni,
a ni ŋmaashɔmu wa
nyjila kro nu,
mu ndro kro ŋga.”
9 O Tafun Nyiɛkpɔɔ,
jande yiri mu ya o na.
Mu mu jaŋga kre tɛɛ mu o shɔ.
Kee nyjɛ mna pe,
mna fawolo pre ŋga,
yire pe mu o ŋga na.
Ŋu ma mna epo yurɔ kpɔɔ,
ŋmba pe yeeri Rahab wre,
knumu bujibuji kree?
10 A ŋu ma mna tia epo na yua,
a mna tia kolo na sni ki nu,
mna tia leele mblɛ ndra,
mna lɔ pre na tro kree?
11 Leele mblɛ ndra fɔlɔ,
O Tafun Nyiɛkpɔɔ na tɔ,
pre we mɛɛ kɔ mbe ndru,
mbe pan Jerusalem na,
pe yɛshɔɔrɔ lie we kpɔɔ,
nyjila kro nu.
Pe yɛshɔɔrɔ sisaa we ti,
mbe foorolie, na jiɛn fun pe nu.
12 “Mi wi e Tafun Nyiɛkpɔɔ,
ŋmba ni e bre.
Kena mni a e na lewo,
na nyjuro fiɛ ŋga hin?
Pan lewo nyi na nyaa yi,
wa mu mbe ku.
13 Mi e Tafun Nyiɛkpɔɔ wre,
ndaa nyjeeri nyaa mu chan,
mna tra nɔɔ le.
La, mi e Tafun Nyiɛkpɔɔ wre,
ndaa e wa, la e ni kee fɛɛ.
A ble nyini ŋga, e leele,
mblɛ pe krɔ yii na e ni,
mu na e tɛɛlɛ pre fiɛ.
Pre leele pre, sena pe nyi na hin?
14 Leele mblɛ pe nyɛni kanyana nu,
kre we peyɛ ta, kia mu.
Pia ku wɔmu ndoo,
ŋga nu pe pe yii mu le kre nu.
A klo wa pe gbo.
15 Mi wi e Tafun Nyiɛkpɔɔ,
Jaŋgafun wre, mi ni epo bri,
mbe ki nyumu kre
na mbapilɛ waa.
16 Mi ni ni kee le e nyu na,
mu kɛ nyaa mu e tɔ.
A mi ndaa nyjeeri nyaa mu chan,
mna tra ŋga nɔɔ le.
A mi ni yo Jerusalem leele pan,
na ‘Ni leele lɛ yire.’”
Jerusalem Jaaraa
17 Jerusalem leele e nyi,
e yiri e yire sholo.
O Tafun Nyiɛkpɔɔ gbɔyira,
ŋga nu u krɔkuɔn nyi kre,
e gbɔ ki nu.
E u krɔkuɔn kre gbɔ,
mu kɔ kpekle u gbɔyira kre nu,
a ki tia e na fuula.
18 Jerusalem, mu biile tataara pre,
wa n wa mbe mu yii kɛ na,
ndee mbe ya mu na.
19 Klo e gbo, a pe e kla ŋunɔ,
kanyana gbeeshiin nyjɛ
krɛrɛ e da,
ŋmbi we ja mbe e bre hin?
20 E Tafun Nyiɛkpɔɔ wre krɔ kun,
na e ni,
ki tia mu lete yire kokoo,
ŋga na mu tro kpan,
mu biile pre kro jire jire mu to,
na gbila, na pɛlɛ sajeŋu yii.
21 Kena yire Jerusalem leele,
mblɛ e kala nyaa kre, e loo.
E fuula, ande simi ma e gbɔ.
22 E Tafun Nyiɛkpɔɔ Jaŋgafun, ŋmba u kɛ toni e na wre, kee ŋga u yuu e pan yi kre, mbo,
“E le, gbɔyira ŋga nu,
ni krɔ kɔɔn nyi,
a e gbɔ ki nu mu na fuula kre,
ni ki shɔ mu yili e kɛɛ,
Kre gbɔyira ŋga nu,
ni krɔ kɔɔn nyi kre,
yaa gbɔ ki nu na.
23 E loŋgoolo mblɛ pe e fiŋge,
mu na e le na nɛɛrɛ yira yi,
mu na e taanla tra na tro pre kɛɛ,
mbe ki shɔ mbe le.”