O Tafun Nyiɛkpɔɔ Wre Wa Jaŋga Ni Mbe Lewo Ndie Tini
50
O Tafun Nyiɛkpɔɔ wre yo mbo,“E jawa na ndaa ni leele ni,
imi blɔ u chɔ jee kre ra?
A na pan yi kuraa kre,
kena sena hlɛ ŋga ni,
ndaa u je kre nyi hin?
Ndee e jawa na prɛ ndaa e prɛ,
a pra e yii mna sɛ,
imi na ndro u biile prɛ,
mbe pe pe yii tinlɛ,
mbe sɛ na pe ni kre ra?
Pan ma ki nyi, e sisam kpɔɔ,
ŋga e na pe kra tia pra e yii,
mna sɛ tra fɔŋgɔ ka nu.
2 Ŋga ndaa pan mu na e yeeri,
mbe e ŋmaashɔ kre,
yira ŋgi kra tia,
e nsra shɔ ni pan hin?
Jaŋga nsraa wa ni nu,
mbe ndaa ki tɛɛ mbe e shɔ ree?
Ndee faŋga ki nsraa wa ni nu,
mbe ni e shɔ ra?
Ni nyu kee fiɛn ŋga ndaa yo
kuraa,
na tia epo na yua,
a ndaa tia lɔɛ na kaari tablɔ tra.
A yi nyumu laarɔ,
na tia gbɔɔ na ki mbroe gbo,
a pra fɔɔn.
3 Mi ndaa tia wɔmu,
na pan mna nyiɛ yiɛ tɔ,
a kra pe na kumu yoŋgo lewo tɔ.”
Nyiɛkpɔɔ Sumifun Fna Mbe Kala Nya
4 O Tafun Nyiɛkpɔɔ Jaŋgafun wre ni ŋga kee ŋga mbe yo,
Imi kie pe mbe ni ja,
mbe mblɛ pe fnai
pre le gbeŋmbaa.
Nyjila kro nu u ni nyini bnimi,
mbe ti mbe ni ndie tɛɛ kee,
ŋga u ni nyina na.
5 O Tafun Nyiɛkpɔɔ Jaŋgafun,
wre ni ndiile nyaa,
u n tia ni ndie kan,
a ni n fɛ mu laa u na.
6 Ndaa ni kukrɔ wɔ mu tɛɛ,
mblɛ praa ni gbuun pre pan,
mna yiɛ tɛɛ mblɛ praa ni,
nyutanyooro tinii pre pan.
A mblɛ praa ni pini na tɛɛ,
na tɛɛnrɛ woni ni yiɛ na kre,
ndaa yiɛ tɛɛ pe pan.
7 Ŋga o Tafun Nyiɛkpɔɔ Jaŋgafun,
wre yaa ni na kre ndra na,
ni yiɛ wa le nyumu fio,
ki tia ni ni yiɛ pe na chirɛbɔ yi,
a ni chin na nyifɛɛrɛ wa ni gbo.
8 Ŋmba u ni ŋmbee wii wa,
ni mbɛɛ na,
kena ŋmbi we jaa pan,
mbe ni nyu kaanri hin?
Yire mblɛ e kala bai ni na kre,
e pan mbe o nyiɛlɛ jijirɛ fni,
mbe e kee nyjɛ yii wa e pan yo.
9 O Tafun Nyiɛkpɔɔ Jaŋgafun wre,
u yaa ni na,
kena ŋmbi we jaa ni gbun,
pimi ni hin?
Mblɛ pe kala taari ni na pre,
we lɛ na yokunu yi,
mbe dumblɔ pe ka.
10 Ndro ŋmbi uu wa e nu,
na o Tafun Nyiɛkpɔɔ wre fiɛ,
na lii u sumifun wre kee na hin?
E ti mbe ŋmba u nyaari
wɔmu nu,
a u n na nyisee nyaa kre,
uyɛ wru mbe taa o Tafun,
Nyiɛkpɔɔ wre na,
mbra kaan u na.
11 Yire mblɛ e jawala wru,
na plɛ chaa mbe kla kre,
kee nyjɛ e jawa mbe pe yire,
we kna mbe tuu e na.
O Tafun Nyiɛkpɔɔ wre titi we ti,
mbe kre kee ŋga pe,
mbe e kanyana ti,
mbe e kee pe fooro ni mbe tro.