O Tafun Nyiɛkpɔɔ Sumifun Wre
49
E loo ni pan,yire kuyɔɔsu tra tnifɛɛnlɛ,
na waŋgrɛ nyjɛ,
yii wa haalee leele kro.
O Tafun Nyiɛkpɔɔ na ni wɔ,
mna ni ŋga mɛɛ,
a pra chin mu ni se.
2 Wra tia ni nyu kee,
naa kuun na brɔfiɛn yiɛ shiin,
ŋga ki tna yi.
Mna ni pe na snimi,
ŋga nyu ki tna yi,
mna ni ndra u kɛ lam.
3 Wra yo ni pan mbo,
“Israel, ni sumifun wi ŋu,
a ŋu na mbe yire,
mbe ni yɛnyiŋge wɔ
mbe nyina.”
4 Ndaa yo niyɛ pan na,
“Ni tnumu waara tun,
mu ni faŋga kla finfin.
La, ŋga ni pe kpan, Nyiɛkpɔɔ,
ni ki pe, mu mu ŋga,
a ni fɔtɔɔrɔ ŋga mbe ta kroo,
wa u kɛɛ.”
5 Nyjila ŋga ni pe nsra ta,
mu ni se kre,
na o Tafun Nyiɛkpɔɔ wre,
ni wɔ mna ni pe u sumifun,
mbe ni ndruu pan
na Israel leele,
mblɛ pe nyina waŋgrɛ nu pre ni.
Kre ndra na o Tafun Nyiɛkpɔɔ,
wre ni ŋga buuro,
a wre wi ni faŋga.
6 O Tafun Nyiɛkpɔɔ,
wre na yo ni pan mbo,
“Ŋga mu pe ni sumifun,
ŋmba we ndru mbe pan,
na Jacob nɔɔ leele,
mblɛ pe kro pre ni kre,
tnumu kpɔɔ ka ma mu pan.
A kre chiin ma.
Mbe ti mu pe nyisee,
mbe leele mblɛ pe n pe Judae,
pre ŋga, mbe ki yire mu na,
mbe waŋgra ŋga kro,
ni ŋmaashɔmu kre kee loo.”
7 Israel Nyiɛkpɔɔ Cheche,
ŋmba wi pe shɔfun wre,
wre ŋmba waŋgrɛ nsra le
mu nya, mna u je kre,
wre wi Israel Nyiɛkpɔɔ
kprafun wre, wre u mu wɔ,
a wre wi ŋulo sumifun wre,
kee ŋga u yo yi kre mbo,
“Ŋulo, na jaŋgafɛɛnlɛ,
we e nya mbe yiri mbe suulo,
mbe e ŋga buuro.”
8 Kee ŋga o Tafun Nyiɛkpɔɔ wre yo u leele pre pan yi kre mbo,
“Na nyjila waa da,
mbe ni nyu e na kre,
mbe e nyiɛtalaa loo,
mbe shɔ e pan,
a mbe ya e na,
e ŋmaashɔ nyjila.
A yire na mbe yire,
mbe mi na waŋgrɛ,
yire nyu nunu pe.
A mbe ti mbe e ndru,
mbe e waŋgra ŋga ki ja,
kre gbeele mbe sin na,
mbe leele ndru mbe paan tni ki nu.
9 A ee leele mblɛ pe yii,
mu le nyuŋgo pre shɔ mbe wa,
mbe yo pe pan, na pe yili,
wɔmu kprikpri ndoo kre nu,
mbe yili, mbe peyɛ ta.
A na pe waa na shie,
pie yirɛ ta mbe ka kolo mbɛɛ na,
na nyambie nyjɛ yi pe,
na yaka n wa yi na kre na.
10 Klo ndee gbɔɔ wa pe ta,
a yila na tablɔ tra wrɛŋgɛ,
wa pe sro. Ŋgi na hin?
Ŋmba na pe fooro nyi wre,
we pe le mbe yiɛklu pe pan,
mbe sɛ na pe ni bloe,
nyjɛ nu nyumu nyi nu.
11 Mbe ti ni nyuɛ yire pe mbrɛrɛ,
mbe ni kooloe wɔ mbe tro yi na.
12 Ni leele pre we yiri,
haalee trɛ yire nu,
mbe tro kooloe yire na mbe pan.
Pe plɛ we yiri fimi haa,
mbe plɛ yiri yila tohaa,
mbe plɛ yiri Aswan chia kre na,
Egypt tra nu mbe pan.”
13 Nyjeeri na tra, e yɛshɔɔrɔ mɛɛ kɔ,
mbe nyuɛ yɛshɔɔrɔ mɛɛ kɔ kpɔɔ.
Ŋgi na hin?
O Tafun Nyiɛkpɔɔ wre,
u leele pre tro kanyana nu,
a u pe fooro le, mu pe bre.
14 La, Jerusalem leele pre yo mbo,
“O Tafun Nyiɛkpɔɔ wre o je,
mu o kee fɛɛ.”
15 A ki tia o Tafun Nyiɛkpɔɔ,
na yo mbo, “Kena chlɔ we ja,
mbe u pɔ ŋmba u ŋgoorii
kee fɛɛ?
Ndee mbe pɔ ŋmba u se wre,
fooro wa pe u na ra?
Aada kie jaa pan ma, la,
mi Nyiɛkpɔɔ wa ja,
mbe e kee fɛɛ fio.
16 Jerusalem, ni mu mɛɛ nyunɔ,
ni kandala,
ki tia mba jaa mu kee fɛɛ.
17 Mu leele mblɛ pe paan,
mbe mu sin pre fiɛlɛ na paan,
a mblɛ pra mu kla kre,
we fɛ mbe yili.
18 Yiɛ yire mu le, mu fɛ mu kun.
Mu biile pre kro fni titɛɛ,
na paan katoo.
Ŋga mi mu Tafun Nyiɛkpɔɔ,
wree wa ŋga,
mu mu biile pre tɛɛ,
mbe muyɛ kpɔɔ,
imi na bijɔ u san yirɛ teeri,
na uyɛ kpɔɔri kre.
19 Jerusalem, kii wa,
na pra mu juari fa,
a yaka nsra kro mu na.
La, mu leele mblɛ pe paan,
mbe tni mu na pre,
we nyjira chia kre na,
kie pe fiɛn pe pan.
A leele mblɛ pra mu kla pre,
haa we le na mu ni.
20 Brikana, mu leele mblɛ pra se
waŋgra nu haka kre,
we yo mu pan na,
‘O kapɔɔ ŋga na o nyi ŋgaa fiɛn
mu o ŋga.
O lawee ŋga ki kpɔɔ chaa,
mbe tni.’
21 Na ki waa pan ma,
mu yo mu jawala nu na,
‘Ŋmbi u biile tataara,
mblɛ se mu ni ŋga hin?
Ni biile na yili ni kɛɛ,
a pra hamblɛ yii,
mu sɛ tra fɔŋgɔ nu,
a mi nunu na kro fooro nu,
kena mni ni pe,
mu biile tataara mblɛ ta hin?
A sena pe yiri kple hin?’”
22 O Tafun Nyiɛkpɔɔ Jaŋgafun wre yo mbo,
“Le, mbe sɛmbɛɛrɛ kee ka pe,
waŋgrɛ yire pan,
mbe pe mu bibilɛ pre,
na mu bichiɛlɛ pre yii kɛɛ,
mbe pan na pe ni mu pan.
23 Ŋulo, na ŋuchiɛlɛ,
mblɛ pee wa trɛ nyjɛ nu,
pra mu leele pre yii mu sɛ kre,
we pan mbe kosie kan mu yiɛ,
mbe mu biile pre le mu pan,
na tinlɛ mu pe wru pra pe le.
Kre mu chin na mi wi,
mu Tafun Nyiɛkpɔɔ wre.
A na mu kaan ni na,
mba mu fana fio.”
24 Mu jaa yirɛ nyjɛ ŋunɔwifɛɛnlɛ wi,
mu ta yire shɔ pe kɛɛ ra?
Ndee mu jaa leele mblɛ,
faŋgafun yii mu le nyuŋgo,
pre shɔ u pan ra?
25 O Tafun Nyiɛkpɔɔ wre yo mbo,
“Ɛnhɛɛn, kre kee ŋga we pan ma,
faŋgafun leele mblɛ
u wi mu yii pre, we yili u kɛɛ,
a yirɛ nyjɛ ŋunɔwifun foolo,
ŋunɔ mu ta yire, pie yi shɔ u pan.
A mblɛ pe wii na e ni kre,
mbe wi na pe ni.
A mbe wi mbe mu biile pre shɔ.
26 A mbe ti,
mbe mu loŋgoolo pre kna,
mbe to peyɛ na mbe peyɛ gbo.
A peyɛ gboo we ti mbe pe pe,
na simi pe gbɔ mu to.
Kre kie ti mbe lewo
na nyjuro chin,
na mi wi e Tafun Nyiɛkpɔɔ,
ŋmba wi e ŋmaashɔfun wre,
Israel Nyiɛkpɔɔ Jaŋgafun wi,
e ndra lɔfun.”