Nyiɛkpɔɔ U U Leele Fraka
48
“E loo ni pan, yire Israel leele, mblɛ lɛ Jacob nanae,a e yiri Judah jlom na.
Yire e e Tafun Nyiɛkpɔɔ wre,
mɛɛ tɛɛ na dani, na yuu,
na Israel Nyiɛkpɔɔ wre e sumi,
la, kala e fnɛ.
2 Yire e eyɛ yeeri kakpɔɔ cheche,
Jerusalem leele,
mu na kaan Israel Nyiɛkpɔɔ
wre na.
U mɛɛ yi o Tafun Nyiɛkpɔɔ,
Jaŋgafun.
3 Jle kre, mi ndaa kee,
nyjɛ yie kɔɔ pan mbakɔ,
yire kee yo e pan,
a ndaa tia yira pan mu e fo.
4 Ndaa chin imi na e ndie kan,
na imi na e ndra sheli mu da.
5 Kre ndra na ndaa yila,
mna klu mu yire kee yire,
yo e pan fa.
Ndaa yi kpali e pan,
mbe yi chiin pe,
imi kie pe mbe yaa yo,
na e sɛɛnlɛ nyjɛ e pe na yi sumi,
yire yi yire kee nyjɛ pe.
6 Kee nyjɛ ndaa yo e pan,
yire kro e na yi loo,
a yire titi nya na yi pe ma,
kena ki fna e chin na,
kpra ndaa yuu.
Mu yire fuŋgaami na shie,
kefɔnyi nyjɛ yi ndra e na,
a ni n yi kee yo e pan tun,
yire kee mbe yo e pan kre.
7 Fuŋgaami ni yire kee yire pe,
ŋga ni yi pe ki n mu,
e n da mu yi loo tun,
ki tia ndro wa jaa yo na,
‘Ni yire kee yire chin.’
8 Ni chin na e n na chaa,
mbe ndie tɛɛ mbe kee,
nyjɛ ni yuu e pan yire loo,
ni chin na e bimi e yire,
mu yiri mu ni taan.
9 Imi kie pe mbe leele ni ŋga mɛɛ,
kre ndra na,
ndaa ni krɔkuɔn kre yii,
a ni nsra e kla.
10 E le, ni e le kanyana nu,
mu e pe mu le,
imi pe swafiŋge leni kanhun,
mbe ki nya,
mbe chiin ki chichie titi ta kre.
11 Imi kie pe mbe leele
ni ŋga mɛɛ kre ndra na,
ni yo kre na ni yila,
mu kre kee ŋga pe.
Ni n na chaa,
mbe pe ni mɛɛ kre le fiɛn,
a mi na ndro wa ni yɛnyiŋge yɔ.
O Tafun Nyiɛkpɔɔ Cyrus Yeeri
12 E loo ni pan, Israel leele,
mblɛ lɛ Jacob nanae,
mblɛ ni yeeri pre.
Mi wi Nyiɛkpɔɔ, Mi wi yɛklo,
a Mi wi kotɔŋu.
13 Ni kɛ kra tra gbeele,
mna nyjeeri nyaa mu chan.
A na ni yeeri,
yi kro lii ni nyu kee na
nyaanyaa.
14 Israel leele,
e kro e pan e fni e loo ni pan.
Sɛɛnlɛ yire ŋgi haa ki da,
mu kee nyjɛ yie kɔɔ pan mbakɔ,
nya mu yo e pan tun hin?
Sɛɛnlɛ yire da mu yo e pan,
na ni ndro wa wɔ wra paan,
mbe kee ŋga ni chaa,
mbe pe Babylon na yo e pan ra?
15 Mi titi ndaa wre blɔ wre yeeri,
mna yili na u ni haalee.
Mbe u yii kɛ na mbe pan na u ni,
a mbe ti kee ŋga we pe kro,
mbe ki nyu mbe u ŋga.
16 E flo e mbra ni na,
e kee ŋga mbe yo ŋga loo.
Mu yire ŋga ni paara,
na e ni jle kre krɛrɛ,
ni n kee ka ndra e na.
A ni tia kee ŋga ni yo e pan,
kro pe kpra.”
Nyiɛkpɔɔ Jawala Ŋga U Le//Na U Leele Ni
Fuŋgaami ŋga e Tafun Nyiɛkpɔɔ wre u u ŋumu le ni nu mu ni tun. 17 Kee ŋga O Tafun Nyiɛkpɔɔ ŋmba wi e ndra lɔfun wre, Israel Nyiɛkpɔɔ cheche wre yo yi kre mbo,
“Mi wi e Tafun Nyiɛkpɔɔ.
Mi ni e nyina kee,
ŋga ki nyu mu e ŋga,
mu na e nyina kolo
ŋga na ee tro.
18 Na ki pe na ndie ee na tɛɛ,
mbra li ni kee nyjɛ,
ni yuu yire na kre,
dwamu wra pe na,
lɔɔ nyumu ŋga kia jaa kɔ yi,
mbraa fuu mbra paan e pan,
a kee kro wra nyu mbe e ŋga,
mbra pe imi na
epo nyumu kani,
mbe pan mbe wo tanyiɛ na kre.
19 E nanae wra nɛɛ,
na epo nyu tanyiɛ yi,
mbe ndro wa na ja
mbra pe tɔɔnri,
a mbe na pe le,
mbe ndro wa na jaa pe kla,
ni yiɛ fio.”
20 E yili Babylon leele kɛɛ e sɛ.
E yɛshɔɔrɔ gblee tɛɛ,
e na ki kpali e na shie.
E ti mbe pe ki loo,
tra ŋga nu kro,
na o Tafun Nyiɛkpɔɔ u sumifun,
Jacob nanae pre ndra lɔ.
21 Ŋga o Tafun Nyiɛkpɔɔ,
wre na yili na Israel leele pre ni,
Egypt tra nu kre,
wra tia dnɛ kpɔɔ kre na yɔ,
a nyumu na gbun mu yili ki nu,
a pra ta mu gbɔ tablɔ tra kre nu.
22 O Tafun Nyiɛkpɔɔ wre yo,
mbo, “Sisampefun n wa,
na wejinyiŋge ni.”