Babylon We To
47
O Tafun Nyiɛkpɔɔ wre yo mbo,“Babylon, tii mu ŋujɔɔn kre na,
mu tni bloŋgo nu tra.
Nyjila ka nu, na pan mu nyi na,
chlɔ ŋmba u n blɔ chin wi.
Pan mna pe na kakpɔɔ,
ŋga pe n da mu wi mu ja tun yi.
La, fuŋga rɛ ndro wa liɛri,
na mu ni, mbe mu le
na mu n sheli,
fuŋga rɛ mu pe tnu.
2 Tre dnɛ wru mu tɛɛ,
mu mimi tre ki na,
mu mu sata laa mu tɛɛ,
mu yoŋgo pla mu sɛ nyjeeri,
mu jeelee wa tra, mu nyaari,
mu tro lafooloe nu.
3 Leele we mu nya wejiwaara,
mbe ki ti nyifɛɛrɛ mu gbo.
Ŋgi na hin? Mbe kefɔɔn,
ŋga lewo pe kro fɔlɔ tɔ,
a wa n wa mbe ni u ti.
4 Mi wi Israel leele Nyiɛkpɔɔ
cheche, ŋmba ni pe shio wre,
ni mɛɛ Tafun Nyiɛkpɔɔ
Jaŋgafun.
5 Babylon, nyu tɔ,
mu tni ndramwɔɔ nu.
Mu jaŋga na wɛ waŋgrɛ kro na fa,
la, fuŋga rɛ, pia mu nya ma na.
6 Ni krɔ na kun na ni leele pre ni.
A ndaa pe pe na ni leele ma,
mna pe wru mu le mu kɛɛ,
a mu nsra pe fooro le,
hali pe blɛlɛɛlɛ pre kuraa,
mna ndrashelee tɛɛ mu pe fiŋge.
7 Mna jawa na mu jaŋga ta,
waŋgrɛ kro na ma nyjila kro nu,
la, mu nsra kee nyjɛ mna pe,
yire jawa, mna mu taa haa chin.
8 Fuŋga rɛ, loo ni pan,
ŋu yɛliirefun kpɔɔ wre,
mu jawa na yaka wa jaa mu ta,
na yuu muyɛ pan na,
‘Mi wi kre, wa n wa ni yiɛ na,
a mba pe lekuchɔ fio,
a ni biile wa jaa yili ni kɛɛ.’
9 La, imi na mu dobodobo kee pe,
mbe tiprɛm yɔ mbe da kpan,
kia mu yire kee shiin nyjɛ kro
we fo mbe mu li ble nunu.
Mu biile we yili mu kɛɛ,
a mu lekulo pe.
10 Mna kaan muyɛ na na yuu mbo,
‘Ndro n wa na ni nyaa.’
Mu kachindɛ na mu jawala,
na mu fana,
a mna yuu muyɛ pan na,
‘Mi wi kre,
ndro wa n wa ni yiɛ na.’
11 Ndrapɛɛnrɛ kee ka we mu da,
mbe mu fo, a ma ja mbe swa,
ndee mbe mu bem kee,
nyjɛ mu pini yire tɛɛ,
mbe ki gbun mbe wa.
12 Kro mna mu dobodobo,
na bem kee tataara nyjɛ,
mu yire mu bimi mu na pini yire,
pini ma rɛ.
Aada yie jaa ya mu na,
ndee mu jaa yire yi na,
mbe mu loŋgoolo piɛri.
13 Mu jawala shio leele mblɛ pe,
wɔɛlɛɛ le na baŋga kee nyaa,
na yuu mu pan.
Pe paan na mu kaan jawala,
nyiɛpɔ nyiɛpɔ.
Kee nyjɛ mu ta yire kro,
sɛ pe mu pan fnaa
waara kpokpo.
Ti mbe pe pan mbe mu shɔ,
mbe yili kee nyjɛ yie mu da,
yire kɛɛ.
14 Pan pre leele pre nyi na,
yua kpakpɛɛ nyjɛ kanhun
shio yi,
pia ja mbe peyɛ shɔ kanhun kɛɛ,
a yi kanhun kre wa kaanlɛɛ ta,
mbe ndro jaa ki yua.
15 Pre chlɛfɛɛnlɛ mblɛ na,
ŋu na pre nyaari mu tnumu tun,
a pe tnu ta mu pan,
mu yire mu bimi kre,
pe n chin mna pe shie,
a pia ja mbe mu shɔ.”