Babylon Sɛɛnlɛ Pe Yirɛ Wɛɛ
46
O Tafun Nyiɛkpɔɔ yo mbo,“Babylon sɛɛnlɛ nyjɛ pe yeeri Bel,
na Nebo yire taa haa yi kre.
Bubunlɔ na pe yi koli
mu taa fuŋga,
a yi kaari tuuro,
mu tia yurɛ pre na fnai.
2 Yire sɛɛnlɛ yire wa jaa yi yɛ shɔ,
pe yi koli mu sɛ na yi ni,
na tinlɛ lɛ, mu sɛ.
Babylon sɛɛnlɛ yire kɔlɔ yi kre.
3 Yire Jacob nanae, e ndie tɛɛ,
e loo ni pan,
yire Israel leele mblɛ e kro pre,
mi ni e le,
mu yire nyjila ŋga ni pe e se.
4 Hali mbe sɛ su e lɛlɛm,
na e ndra fniŋge nyjila.
Mi wi e Nyiɛkpɔɔ ŋmba mbe e le.
Mi ndaa e wa,
a mbe e yii nyjila kro nu.
A mbe ya e na, mbe e shɔ.
5 Ndro ŋmbi sembremu kepele,
ki ni wru hin?
Ndee ŋmbi e jawa na,
mi na wre yila hin?
6 Leele plɛ swanyiɛ,
woni pe bɔtɔe nu,
mbe swafiŋge kna mbe wo,
mbe yi kra krayira ni,
mbe sɛ fiireefun wru,
mbe u sɛɛnlɛ pe mbe pe ŋga,
mbe pra suulo yi yiɛ mbra yi sumi.
7 Mbe pe yi kunu mbe taa patiɛ na,
mbe sɛ lawee cha,
mbe yi yire sholo.
A mna pie sɛ yi yire kre,
bawa yie kro,
yia ja mbe kɔ yi titɛɛ.
Pie nyɛni mbe yi yeeri,
yia ja mbe shɔ pe pan,
a yia ja mbe ndro shɔ,
u kanyana nu.
8 Yire mblɛ e je,
na yaa ndie tɛɛ ni pan kre,
e yire kee nyjɛ sɔɔnri,
e ti mbe yi kro e jawala nu.
9 E kee nyjɛ yira pe fafa yire sɔɔnri,
e chin na mi wi Nyiɛkpɔɔ,
a mi kɔkro, wa n wa na.
Mi wi Nyiɛkpɔɔ,
a wa n wa mu pe na mi wi.
10 Mu yire yira kro,
nɔɔhle nyjila kre,
ndaa kee nyjɛ yie kɔɔ pe,
mbakɔ kee yo e pan chiin,
a yi chin mu na pini.
Ndaa yo na kee nyjɛ ni jawa,
mbe pe yire kro we pe ma.
A kee ŋga ki tna ni pan kro we pe.
11 Ni yire ni nyu kee,
ŋga ni yo mu tɛɛ na,
mu ndro wa yeeri yila finhaa,
mbe u paan kee ŋga ni chaa pe.
We wi mbe yire yila finhaa,
we pe nyaanyaa,
imi na kpanyuu waa kre,
we pan mbe kee ŋga ni jawa,
mu tɛɛ kre pe.
12 Yire ndikambla,
yire mblɛ yire na frakaa lalaa
le kre, e loo ni pan.
13 Ni paan na ni frakaa ni e jaara,
ki haa n le na e ni kuraa,
a ni ŋmaashɔmu kre
wa mu kuraa mbe pan.
Mbe Jerusalem ŋga ŋmaashɔmu,
a Israel leele we ni yɛnyiŋge nya.”