O Tafun Nyiɛkpɔɔ Ŋunu Cyrus Wɔ
45
O Tafun Nyiɛkpɔɔ wra yo Cyrus pan mbo,“Mi Nyiɛkpɔɔ ni mu wɔ,
mu simi wo mu ndra na,
mu mu pe ŋunu, mu mu yii kɛ na,
mbe mu wi mbe waŋgrɛ shɔ,
mbe ŋulo jaŋga shɔ pe kɛɛ.
A mbe kakpɔɛ jlonwee nyu krɔɛ,
nyaala mu pan, yi ka n wa,
mbe tɔ mbe kia ja mbe nyaa.
2 Mi Nyiɛkpɔɔ mbe yiɛklu mu pan,
mbe kolo mbrɛrɛ pe nyuɛ,
na nyambie na mu pan,
a kakpɔɛ jlonwee nyu krɔɛ,
nyjɛ pe pe swafre ni,
mu tɔɔnrɔ paari yi kro yire,
mbe yi kuari mu yiɛ.
3 Mbe mu ŋga yɛtaara yirɛ,
nyjɛ yii wa ndra wɔmu,
na ndrandra lawee nu,
kre mu chin na
mi wi mu Tafun,
Israel leele Nyiɛkpɔɔ wre,
a mi ni mu yeeri mu mɛɛ na.
4 Ŋunu Cyrus,
kii wa na mu n ni chin,
la, ni sumifun Jacob nanae,
mblɛ ni wɔ pre ndra na ni yila,
mu mu yeeri,
mu tia mu buuro ta kpɔɔ.
5 Mi chiin wi Tafun Nyiɛkpɔɔ wre,
mu ta mu kɔ mi na,
Nyiɛkpɔɔ wa n wa na.
Mbe mu ŋga faŋga,
nde kii wa na mu n ni chin.
6 Mbe mu pe ma, mbe ki ti,
mbe leele mblɛ
pee wa yila finhaa,
mu sɛ su yila tohaa kro chin,
na mi wi Tafun Nyiɛkpɔɔ wre,
a mu ta n kɔ mi na,
Nyiɛkpɔɔ wa n wa na.
7 Mi ndaa nyisee, na wɔmu wa,
mi ni paan yɛshɔɔrɔ na yɛjeere ni.
Mi ni tia yire kee yire krɛrɛ,
na pini.
8 E ti mbe frakaa yiri nyjeeri,
mbe pan, na nyiɛ ki woni.
E ti mbe tra nyaa,
mbe ŋmaashɔmu,
na kpra lie yili ki nu mbe pan.
Mi e Tafun Nyiɛkpɔɔ wre,
ni yire krɛrɛ wa.
9 Lewo ŋmba u u gbeelefun,
nyu kaanri kre, u atɛ. Ŋgi na hin?
Choo waara wi ŋu.
Chɔ na ki faanrifun wie na,
‘Mni a mu ni faanri imi hin?
Chɔ wa ja mbe yo
ki faanrifun pan,
na u kɛ nyu tnumu n nyu.’
10 Lewo ŋmba we yo u lɛ,
na u lo pan na,
‘Mni a e ni se imi hin kre, u atɛ.’
11 Mi wi Tafun Nyiɛkpɔɔ,
ŋmba ni yirɛ kro wa,
Israel leele Nyiɛkpɔɔ
cheche wre.
Ŋmbi we ja mbe ni wie,
ni leele mblɛ ni wɔ pre kee hin?
Ndee mbe ni nyina,
ŋga ki fna mbe ni pe hin?
12 Mi ndaa tra ŋga wa,
mna lewo na nyjuro wa ki na.
Ni jaŋga kra nyjeeri nyaa
mu chan,
mu tia wɔɛlɛɛ ki tɔ poŋgo.
13 Mi ni yire ni frakaa na,
mu kanyaa le Ŋunu Cyrus nu,
mbe kolo ŋga we yii kro,
gbeele u pan.
Wre we kakpɔɔ Jerusalem kre,
gbeele mbe sin,
mbe ni leele pre shɔ,
pe tnimu nu mbe wa finfin,
wa yaka tɔ.
Mi pe Tafun Nyiɛkpɔɔ,
Jaŋgafun wre, ni ki yo.”
14 Kee ŋga O Tafun Nyiɛkpɔɔ na yo Israel leele pan yi kre mbo,
“Egypt, na Ethiopia leele,
yirɛ chichiele we pe e wee,
a Seba leele gede mblɛ pre,
we pan, mbe e pe pe tinlɛ,
pie tɛni peyɛ na,
na jlɔnyi pe le pe na mbe pan,
mbe kosie kan e yiɛ mbe yo na,
‘Kpra na, Nyiɛkpɔɔ wa e kro,
a wre chiin wi, wa n wa u kro na.’”
15 Nyiɛkpɔɔ ŋmba mu Israel leele,
ŋmaa shio wre pe Nyiɛkpɔɔ,
ŋmba u ndra leele na.
16 Leele mblɛ pe sɛɛnlɛ gbeele pre kro,
nyifɛɛrɛ we pe gbo,
mbe pe ndrɛ soo soo.
17 La, na o Tafun Nyiɛkpɔɔ,
Israel leele ŋmaashɔ kre,
u ŋmaashɔmu kree wa nyjila kro,
a wa ti mbe nyifɛɛrɛ pe gbo fio.
18 O Tafun Nyiɛkpɔɔ,
ŋmba u nyjeeri wa,
wre chiin wi Nyiɛkpɔɔ,
a wre wra waŋgra ŋga wa,
mbe lewo jaa tni ki na.
U nsra ki wa mbe ki tni waara.
O Tafun Nyiɛkpɔɔ wre chiin,
wi Nyiɛkpɔɔ, wa n wa na.
19 Mi Nyiɛkpɔɔ, ni n sɛ yire wɔmu,
ndee ndrandra lawee ka nu,
mu paara.
A ni n yo Jacob nanae pre pan,
na pe ni haa cha waara.
Mi ni kpra yuu, mu na ŋga
ki fraka nyina chasi.
20 O Tafun Nyiɛkpɔɔ wre yo mbo,
“Yire waŋgrɛ leele mblɛ e kro kre,
e eyɛ nya e pan e fni ni yiɛ.
Yire mblɛ e n yaka chin,
mu tinyi tɛ tɛ sɛɛnlɛ na sumi,
mu na suulo yi yiɛ na yi tali,
a yia ja mbe e shɔ kre.
21 E eyɛ fni e pan,
mbe mi na yire fni kala lihaa.
Ni nsra klu mna kee,
nyjɛ yie pan mbakɔ,
yire kee yo e pan kree?
Mi chiin wi Nyiɛkpɔɔ,
a mu ta mu kɔ mi na,
wa n wa haka na.
Mi chiin wi Nyiɛkpɔɔ,
ŋmba u fraka,
mu pe ŋmaashɔfun,
a mu ta mu kɔ mi na,
wa n wa na.
22 Yire waŋgra ŋga leele kro,
e kna e pan ni pan mbe ni e shɔ.
Ŋgi na hin? Mi nunu wi Nyiɛkpɔɔ,
a wa n wa haka na.
23 Ni da mu niyɛ ŋga,
a ni daŋga kre pe kpra,
a ndro wa n wa mbe ja
mbe ki kna.
Ni yo na ndro kro,
we kosie kan ni yiɛ
mbe ni sumi.
24 Ndro kro we nya na,
mi Nyiɛkpɔɔ chiin nu frakaa,
na faŋga nyi,
a leele mblɛ pe krɔ wru na u ni kre,
we kna mbe pan u pan,
mbe nyifɛɛrɛ pe gbo.
25 La, mi Nyiɛkpɔɔ,
we ti leele nya,
na Israel leele fraka,
a pie buuro ta kpɔɔ.”