O Tafun Wre Chiin Wi Nyiɛkpɔɔ
44
O Tafun Nyiɛkpɔɔ wre yo Israel lee pre pan mbo,“Jacob nanae,
Israel leele mblɛ ni wɔ,
ni sumifɛɛnlɛ,
e loo ni pan.
2 Mi ndaa e faanri lɛɛ,
a mi ni e le.
Kena yaa fiɛ, Mi ni e kori,
mu e wɔ ni sumifɛɛnlɛ.
3 Tra ŋga ki yua titi kre,
mbe nyumu wo ki na,
a mbe ti mbe tra,
ŋga lafooloe yi yua kre,
mbe nyumu fo yi nu.
A mbe e nanae dwan,
mbe ni ŋumu le pe nu.
4 Pie lɛ chichie na nyaa nyjɛ,
yii wa nyumu lawee yi,
ndee tinyi nyjɛ yii wa,
lɔɔ mbɛɛ na yi.
5 Kie ti mbe leele,
mblɛ pe n pe Israel leele,
pre wa yo na,
o Tafun Nyiɛkpɔɔ wre u ni ta,
mbe wa Israel mɛɛ taa uyɛ na,
mbe wa o Tafun Nyiɛkpɔɔ,
wre mɛɛ nyunɔ u kɛ na.
Pia sɛɛn mɛɛ taa taa peyɛ na na.”
6 O Tafun Nyiɛkpɔɔ Jaŋgafun,
ŋmba wi Israel leele ŋunu,
na pe ndralɔfun wre yo mbo,
“Mi wi yɛklo, a mi wi kotɔŋu,
mu ta mu kɔ mi na,
Nyiɛkpɔɔ wa n wa na.
7 Ndro ŋmbi uu wa,
mu pe na mi wi hin?
E ti mbe ufun ki kpali,
mbe ufun wre pan
mbe ni nyina, kee nyjɛ yi pe,
mu yire nyjila ŋga ni ni leele wa,
mbe ni nyina kaalɛɛ,
nyjɛ yie kɔɔ pan mbakɔ.
8 Ni leele, yaa fiɛ, a yaa seeri.
Ni nsra yire kee nyjɛ kpali,
e pan fafa kree?
Yire lɛ ni dansiɛfɛɛnlɛ,
kena e ti mbe ni e wie,
Nyiɛkpɔɔ waa wa ni kro na ree?
Ɔɔhɔn, Mi wi Dnɛ kpɔɔ,
ŋga na ee jaa gbun,
a ni n Nyiɛkpɔɔ wa chin na.”
Sɛɛn Sumiɛ Pe Jijiere Kee
9 Leele mblɛ pe sɛɛnlɛ gbeele kre,
krɛrɛ lewaala lɛ,
a sɛɛnlɛ nyjɛ na pe
kaan titi yire kro,
yirɛ wɛɛ yi na.
A mblɛ pe yi sumi pre, fuunlo lɛ,
nyifɛɛrɛ pe gbo,
a pe n chin kee nyjɛ pe pini.
10 Na ndro tɔɔnrɔ tɛɛ,
mu sɛɛn pe na sumi,
tnu ŋgi we ta ki nu hin?
11 Sɛɛnlɛ yire gbeelefɛɛnlɛ,
na yi sumifɛɛnlɛ pre kro,
leweele lɛ, a nyifɛɛrɛ we pe gbo.
E ti mbe pe kro pan mbe fni,
mbe pe nyu wɔ,
mbe ni ti fiɛrɛ wo pe na,
mbe nyifɛɛrɛ kpɔɔ pe gbo.
12 Fiireefun u tɔɔnrɔ leni kanhun,
mbe ki gbun mbe ki tɛɛ,
mbe sɛɛn gbeele.
We hama tɛɛ,
mbe ki gbun faŋga ni,
wre naa yo we kɔ kre na klo,
na gbɔɔ u ta,
mbe u faŋga kɔ u nu.
13 Tɛtɛŋu u tiŋge krai mbe ki kun,
mbe yira kaanri ki na,
mbe ki tɛtɛ brɛbrɛ
mbe ki nyu titi,
mbe ndro kumu wru,
mbe u ki tɛɛ mbra ki sumi.
14 Lewo we jaa cedar tiŋge,
ndee oak, ndee cypress tiŋge,
ndee mbe tiŋge ka
na ki nyini kun klɔ.
We ja mbe pine tiŋge luu,
mbe nyiɛ pan mbe wo ki na,
mbe ki lɛ mbe u ki tɛɛ
mbe sɛɛn pe.
15 We ja mbe tiŋge kre,
ka pe kejenyi,
mbe kanhun gbɛɛri mbra yuai,
mbe ka tɛɛ mbe sro pe.
Mbe u ndru mbe tiŋge kre ka tɛɛ
mbe sɛɛn tɛ,
mbe wre ŋmba u ki tɛ wre chɔɔ,
sɛ suulo mbe ki sumi.
16 Tiŋge ŋga ka u pe kejenyi,
mu kanhun gbɛɛri,
mu ki tɛɛ mu sro pe,
mu kaara kla ki na,
mu ka mu yɔɔ kre chɔɔ,
kre kanhun kre chɔɔ u yuwa,
mu yo na gbɛŋgɛ le ni nu kre.
17 Kre tiŋge kre kɔɔn ni chɔɔ,
we sɛɛn pe,
mbe suulo ki yiɛ mbe ki sumi.
Mbe yo ki pan na,
“Ŋu wi ni lefun, kena ni shɔ.”
18 Leele mblɛ pe sɛɛnlɛ sumi kre,
daŋgoolo lɛ,
pe pe yiɛ pɔ mu tɔ,
ki tia pe n na nyaa,
a pe n jawala ni,
mbe kala nɔɔ loo.
19 Hali wa n jawala ni,
mbe tni mbe jawa na,
“Tiŋge ŋga ka ni gbɛɛri,
mu sro pe ki na mu li,
mu kaara fɔ ki na mu ka,
kena ki fna mbe ni ki ka pe,
afuŋgo yira,
mbra suulo tiŋge kɔɔn jaara ra?”
20 Kena yira ŋgi ki tia lewo uyɛ wru,
mu taa tiŋge kɔɔn ŋga
kie jaa shɔ,
mbe tɔɔnrɔ wo na ŋga hin?
Lewo jijiere ki tia wra kaan,
yira ŋga kie jaa shɔ,
mbe tɔɔnrɔ wo na.
Ki tia u n ja mbe jawa mbe chin,
na yira ŋga u yii kre,
na yira waara kpokpo yi.
Nyiɛkpɔɔ U Yira Kro Wa//A Wre U Ŋmaa Shio
21 O Tafun Nyiɛkpɔɔ yo mbo,
“Israel leele, Jacob nanae,
e sɔɔnri na ni sumifɛɛnlɛ lɛ yire,
mi ndaa e wa,
na e pe ni sumifɛɛnlɛ,
ki tia mba e fɛɛ fio.
22 Imi na ndro tloe nyaa,
mbe yi kɔ mbe fun u yiɛ na kre,
pan ni e punɔɔ pɔ mu laa e na,
pan e sisam fɔɔn ni yiɛ na,
na bnimi nyu sugbeŋge yi.
Kena e ndru e pan ni pan,
ŋgi na hin? Ni e ndra lɔ.
23 Yirɛ nyjɛ yii wa nyjeeri kro,
e yɛshɔɔrɔ mɛɛ kɔ,
a nyjɛ yii wa tra yiɛ na kro,
e yɛshɔɔrɔ gble le kpɔɔ.
Nyuɛ, na tinyi,
nyjɛ yii wa klɔ nu kro,
e mɛɛ kɔ e tɛɛ. Ŋgi na hin?
O Tafun Nyiɛkpɔɔ wre
Jacob nanae, mblɛ lɛ Israel leele
pre ndra lɔ,
mu tia pe u yɛnyiŋge nya.”
24 O Tafun Nyiɛkpɔɔ wre yo mbo,
“Israel leele, ndaa e ndra lɔ,
a mi ndaa e faanri lɛɛ.
Mi wi e Tafun Nyiɛkpɔɔ,
ŋmba wra yirɛ kro wa.
A mi chiin ndaa nyjeeri nyaa,
na yoŋgo yi,
a mi nunu ndaa tra nyaa
mu chan,
ndro nsra ya ni na.
25 Kafinɛ kee nyanyofɛɛnlɛ,
kee nyjɛ pe yuu yire kro,
mi ni tia yira pini kee wɛɛ,
a chlɛfɛɛnlɛ kaalɛɛ pe jijiere kee.
A kachimblɛ kee,
nyjɛ pe tuan yire krɛrɛ,
mi ni tia yira pini jijiere kee.
26 La, mi ni tia,
ni kee nyanyofɛɛnlɛ kee,
nyjɛ pe yo mu tɛɛ
yire na pini kpra.
Pe yuu na leele we ndru,
mbe Jerusalem nyi na,
a pie ndru,
mbe Judah chiɛ yire gbeele,
mbe sin mbe yia pe kajɛɛ na,
a mbe ti mbe yi pe ma yɛŋgɛ.
27 Mi ni paara,
mbe nyumu kɔ epo latɛɛ.
28 Mi ndaa yo Persia ŋunu,
Cyrus pan na u pe
ni leele yɛklo,
mbe kee ŋga ni chaa pe.
Wre we yo Jerusalem leele pan na,
E ti mbe o Jerusalem gbeele,
mbe sin,
mbe Suminyuŋgo kre nɔɔ le,
mbe ki gbeele mbe sin.”