Nyiɛkpɔɔ Nyu Yo Na We U Leele Shɔ
43
Fuŋgaami o Tafun Nyiɛkpɔɔ ŋmba wra Jacob wa, mna Israel wɔ wre yuu e pan mbo,“Yaa fiɛ, ni e ndra lɔ.
Ni e yeeri mɛɛ na,
na ni wolo lɛ yire.
2 Na e nyaari mbe tro
latɛɛ nu kuraa,
mi na yire lɛ.
A na e lafolo kuun mba ti,
mbe ki e li.
A na e le kanhun nu mba ti,
mbe ki e nyjila mbaa yo sro,
kie e sro.
3 Ŋgi na hin?
Mi wi e Tafun Nyiɛkpɔɔ,
Israel Nyiɛkpɔɔ Cheche,
ŋmba wi e ŋmaashɔfun wre.
Mi ndaa Egypt leele tɛɛ,
mna e ndra lɔ,
mna tia Ethiopia na Seba,
na yire e titɛɛ.
4 Ŋga e kala ni yiɛ nyi,
a e wɛ ni pan yira kro na,
a ni e kori kre ndra na,
mbe waŋgrɛ tɛɛ mbe e ŋmaa lɔ.
5 Kena yaa shia fiɛ, ŋgi na hin?
Nii wa e kro.
Mu yire haalee,
yila finhaa mu sɛ su yila tohaa,
mbe pan na e ni titɛɛ.
6 Mbe yo nyjeeri,
na tapan haa leele pre kro pan,
na pe ti mbe ni leele ndru pe kro,
pia pe tɔ kolo.
Tra ŋga leele kro,
e ni biile pre wa kolo,
mbe pe yili lawee kro nu,
tra yiɛ na mbe pan.
7 Mi titi leele lɛ,
a ni pe wa
mu ni yɛ le yɛnyiŋge.”
Israel Yi Nyiɛkpɔɔ Dansiɛfun
8 Nyiɛkpɔɔ yo mbo,
“E pan na ni leele pre ni.
Pee wa nyiɛlɛ ni,
a nde pe n na nyaa,
a pee wa ndiile ni,
la, pe n na ndru.
9 E ti waŋgrɛ yire leele pan,
mbe mi na pre fni.
Pe sɛɛnlɛ yire ŋgi haa,
kie jaa baŋga kee nya
mbe yo hin?
Ndee yi ŋgi haa kra kee,
nyjɛ yira pe fa kre nya
mna yo hin?
E ti mbe yire sɛɛnlɛ nyjɛ pan,
na yi dansiɛfɛɛnlɛ ni
mbe ni nyina,
na kee ŋga pe yuu kre pe kpra,
mbe leele loo mbe chin
na kpra yi.”
10 O Tafun Nyiɛkpɔɔ yo mbo,
“Israel leele, yire lɛ
ni dansiɛfɛɛnlɛ,
na ni sumifɛɛnlɛ mblɛ ni wɔ,
imi kie pe mbe e ni chin,
mbe ni shɔ mbe li,
mbe nɔɔloo ta,
na mi nunu chom wi Nyiɛkpɔɔ.
A mu kɔ mi na,
Nyiɛkpɔɔ wa n wa ni yiɛ,
a wa n wa ni kro.
11 Mi nunu chom,
wi Tafun Nyiɛkpɔɔ,
a mu kɔ mi na,
ŋmaashɔfun wa n wa.
12 Mi ndaa nyu yo na mbe e shɔ,
a ndaa li ni nyu kee na,
a yire lɛ ni dansiɛfɛɛnlɛ,
sɛɛn ka ma kra ki pe,
mi e Tafun Nyiɛkpɔɔ,
ndaa ki pe.”
13 Ki pe kpra na,
mi nunu wi Nyiɛkpɔɔ,
mu yire fafa.
Kre ndro n wa,
mbe jaa e shɔ ni kɛɛ,
a kee ŋga mbe pe, ndro n wa,
mbe jaa ki tɔ kolo.
14 O Tafun Israel Nyiɛkpɔɔ Cheche,
ŋmba wi e ndra lɔfun
wre yo mbo,
“E ndra na, mbe ti
mbe ŋunɔwifɛɛnlɛ kolo ta,
mbe le Babylon kakpɔɔ kre na,
mbe ki leele yii,
mbe pe yɛshɔɔrɔ gblee
kaari nyɛnɛɛ.
15 Mi wi e Tafun,
Israel Nyiɛkpɔɔ Cheche wre.
Mi ni e wa, a mi wi e ŋunu.”
16 O Tafun Nyiɛkpɔɔ wre yo mbo,
“Fafa kre, mi ndaa kolo wɔ,
mu tro epo nyiɛ
fiɛrɛ wo kre nu.”
17 Egypt ŋunɔwifɛɛnlɛ,
mblɛ praa e kɔŋgɔ nini pre,
ndaa pe soolo,
na pe sookɛɛ kro kla.
Ndaa tia pra to,
a pe nsra ja mna yiri na.
A ndaa pe fɔ,
mna wo na pe kania fɔ mu fii.
18 O Tafun Nyiɛkpɔɔ wre yo mbo,
“E fakee yire fɛɛ,
yaa eyɛ wru mbe taa yi na.
19 E le, kefɔŋgɔ ni paan mbe pe,
ki nɔɔ hle fuŋga ma,
kena e n ki nya tun ra?
Mbe kolo wɔ,
mbe tro tablɔ tra kre nu,
mbe ti lɔɛ bɔ wa.
20 Hali nyaalam yurɛ,
we ni ŋga mɛɛ,
mbe ŋmbokuŋmboe,
na kuweele ni ŋga mɛɛ,
ŋgi na hin? Ni tia nyumu,
na lafooloe bɔ tablɔ tra kre nu,
mbe ni leele mblɛ ni wɔ pre,
nyumu ta mbe gbɔ.
21 Pre leele mblɛ,
ndaa pe wa mu niyɛ ŋga,
mbe pra ni kaan mɛɛ.”
Israel Sisam
22 Israel leele, ande e je,
e n na ni haa chaa,
a e n tia mi Nyiɛkpɔɔ la e ta.
23 E n pan mbaala ni,
mbe yurɛ sroo sra wɔ
mbe ni ŋga,
a e n srawɔɔ tɛɛ
mu ni le yɛnyiŋge.
Ni n e tɔɔra na e shɔlɔ,
ndee tuwe ndiom tɛɛn tɛɛ,
mbe sra wɔ mbe ni ŋga.
24 E n tuwe ndiom tɛɛn,
lɔ mu ni ŋga,
a e n ni ŋga yurɛ kaara lawee,
nyjɛ yi tna kre a yi ni da.
La, e ndru mu tia e sisam,
pe tuuro mu ni ŋga,
a e punɔɔ tia ndaa fnai.
25 Ande mi ni yila ni mɛɛ ndra na,
mu na e sisam poo
na laari e na,
a mba yi sɔɔnri na.
26 E ni fni kala lihaa,
mbe mi na yire paara,
mbe e ni nyina,
na kee ŋga e yuu kre pe kpra.
27 E tolɛɛ ŋmba wra yiɛ klu,
wre na sisam pe,
a pan e yɛkulo na yiri
mu ni taan.
28 Ki tia mbe ti nyifɛɛrɛ,
Suminyuŋgo kre loplombo gbo,
a mbe ti Israel leele pre mɛɛ kla,
a pie dɔɔya.