O Tafun Nyiɛkpɔɔ Sumifun Wre
42
Ni sumifun ŋmba ni wɔ,mu u yii kɛshiin,
a ni yiɛshɔ u na wi kre.
Ni ni Ŋumu le u nu,
a wre we ti,
mbe kpralie pan waŋgrɛ kro nu.
2 Wa gble le kpɔɔ,
mbe ndro u mana loo lete na.
3 A braŋgɔ ŋga ki kru kre,
wa taa mbe ki ka.
A kania ŋga ki nyini tluii kre,
wa taa mbe ki fii.
We ti mbe kpra tnumu tun.
4 Wa pra kee ŋga u pini na,
a u sɔɔnrɔ wa ku,
mbe sɛ su na,
we ti kpra lie pan waŋgra nu.
A u mbra yire na,
kuyɔɔsu trɛ yire
leele we na kaan.
5 Kee ŋga o Tafun Nyiɛkpɔɔ yo yi kre mbo,
“Mi ni nyjeeri na tra gbeele,
mna ki nyaa na yoŋgo yi,
mna tra na yira,
ŋga kii wa ki na kro wa.
A mi ndaa ŋumu le lewo nu,
mna u ŋga ŋmaa,
a wra tro tra ŋga na.”
6 Mi e Tafun Nyiɛkpɔɔ wre
ni e yeeri, mbe e fraka.
Mbe e yii kɛ na, mbe kɛ tɔ e na,
mbe nyu nunu pe na e ni,
mbe e pe nyisee,
mbe waŋgra leele ŋga,
7 mbe e fuunlo nyiɛlɛ nyaa,
mbe mblɛ pe yii mu le nyuŋgo,
a pee wa wɔmu nu pre wɔ,
mbe wa.
8 Mi wi e Tafun Nyiɛkpɔɔ.
Kre yi ni mɛɛ.
Mba ni yɛnyiŋge wru mbe ndro,
ndee mbe sɛɛn ŋga.
9 Kee nyjɛ ndaa yo fa,
kre pan ma yɛŋgɛ,
a fuŋga mbe kefɔnyi yo e pan,
mbe yi chiin pe.
Mboo Ŋgaa Mɛɛ
10 E mɛɛ fɔŋgɔ kɔ,
e o Tafun Nyiɛkpɔɔ ŋga.
Waŋgra ŋga kro e mɛɛ kɔ,
e u ŋga mɛɛ.
Yire mblɛ ee wa epo yiɛ na,
na yurɛ mblɛ pee wa ki nu kro,
e u ŋga mɛɛ.
Kuyɔɔsu trɛ, na leele,
mblɛ ee wa mu tni yi na kro,
e u ŋga mɛɛ.
11 E ti mbe tablɔ tra kre,
na chiɛ nyjɛ yii wa ki nu,
na Kedar leele u ŋga mɛɛ.
E ti Sela kakpɔɔ leele,
yɛshɔɔrɔ mɛɛ kɔ.
Leele mblɛ ee wa nyuɛ ndra na,
e gble kpɔɔ le.
12 E ti mbe pe yire haalee,
trɛ yire na,
mbe o Tafun Nyiɛkpɔɔ,
wre ŋga yɛnyiŋge, na mɛɛ.
13 O Tafun Nyiɛkpɔɔ wre yili,
na jaŋgafun ŋmba u shie
ŋunɔ wi.
We yiri na yɛnyiɛ ni,
mbe mana kpɔɔ tɛɛ mbe gble le,
na nyibinyiɛ ni,
mbe wi mbe u loŋgoolo ja.
Nyiɛkpɔɔ We Ya U Leele Na
14 Nyiɛkpɔɔ yo mbo,
“Ni niyɛ yii mu pieri a ki mu,
la, fuŋga rɛ,
pan ni nyɛni na ŋuni na kloi,
na siirefun ŋmba lɛɛ yaa wi.
15 Mbe ti mbe nyambie,
na nyuɛ kro ndrɛ yua,
mbe yaka wa pe yi na.
Mbe ti lɔɛ, na taplɛ kro yua.
16 Mbe yiɛklu fuunlo pan,
mbe tro na pe ni kooloe,
nyjɛ pe n chin na,
a mbe pe nyina kooloe,
nyjɛ na pe n da mu tro tun.
Mbe ti wɔmu kaari nyisee pe yiɛ,
a mbe ti mbe lawee chakpra,
pe mbrɛrɛ pe yiɛ.
Ni kee nyjɛ mbe pe,
mbe pe ŋga yi kre,
a mba pe wa.
17 La, leele mblɛ pe peyɛ wru,
mu taa sɛɛnlɛ na,
mu yirɛ nyjɛ lewo gbeele,
wru mu na sumi kre,
pie ndru kro,
mbe sɛ na nyifɛɛrɛ kpɔɔ ni.”
18 O Tafun Nyiɛkpɔɔ wre yo mbo,
“Yire ndikambla e loo.
Yire fuunlo e le chichie,
kre ee nya.
19 Kena ndro wa, a u n na nyaa,
na ni sumifun wi ŋgaa,
ndee, a u ndie kan,
na ni bituŋu wi ra?
Ndro ŋmbi u fun nyiɛlɛ na,
mu da na ŋmba mi na wre,
nyu nunu pe wre ni hin?
Ndee ŋmbi u fun nyiɛlɛ na,
mu da na mi e Tafun Nyiɛkpɔɔ,
bituŋu wre ni hin?
20 Israel, mu ni kee tataara nya,
la, mu je mu yiɛ wɔ.
Ndiile wa mu pan,
la, mu je mu ndie kan.”
21 O Tafun Nyiɛkpɔɔ wre frakaa,
saara na, ki tna u pan na,
we ti u mbra yire kee kpɔɔ,
leele pan, mbe yɛnyiŋge ta.
22 La fuŋgaami, pe ni leele ju,
mu pe foolo,
mu sɛ pe kro le nyuŋgo,
ŋga kii wa wee nu.
Pe pe ju,
a ndro n wa mbe pe shɔ.
Pe pe foolo,
a ndro n wa mbe yo na,
“E ndru e sɛ na yi ni.”
23 Mbakɔ e ŋmbi haa,
we yire kee nyjɛ loo,
mbe ndie tɛɛ yi na hin?
24 Ŋmbi wra Israel wru,
mna le foolofɛɛnlɛ pre kɛɛ hin?
O Tafun Nyiɛkpɔɔ,
ŋmba o sisam pe mu taan wre wi.
Ŋgi na hin? O n na taa u kee na,
a o nsra li u mbra na.
25 Ki tia u krɔ na kun na o ni kpɔɔ,
a wra tia o na kala nya ŋunɔ.
Pan u krɔkuɔn kre naa nyini,
na kanhun yi Israel na poŋgo,
a nde o nsra nɔɔloo ta.
Kanhun kre na o shɔ,
a nde o nsra kee ka twan,
mu yili ki nu.