Israel Leele Yafun
41
Nyiɛkpɔɔ yo mbo, “Yire mblɛ ee wa mu tni kuyɔɔsu trɛ nu epo nu kre, e pieri e ndie tɛɛ ni pan, yire waŋgrɛ yire, e gbun ta e pan mbe o fni kala lihaa mbe paara mbe kpra kun.2 Ndro ŋmbi wra kanyaa le,
mna ŋunɔwinyilifun,
ŋmba wraa wa yila finhaa,
wre yeeri mna tia ŋulo,
na peyɛ nyjii u yiɛ,
mna pe pe na tablɔ yi,
u brɔfiɛn yiɛ shiin kre nyu na,
mna tia pra pe na yirɛ fue yi,
u bɛŋɛ nyu na kre hin?
3 Wre ŋunɔwinyilifun wre,
na waŋgrɛ yire kɔŋgɔ ni,
wra tro na pe ni kolo,
ŋga na u nsra da mu tro tun na,
a yaka nsra u ta.
4 Ŋmbi u kre kee ŋga pe,
mu tia ki pan ma hin?
Mi e Tafun Nyiɛkpɔɔ wre,
ni yire kee nyjɛ krɛrɛ pe.
Mi ndaa wa jle gbamm kre,
a mi nii wa nyjila kro nu.”
5 Kuyɔɔsu trɛ yire leele,
na leele mblɛ pee wa
lawee kro nu,
ni kepele loo, mu na ni fiɛ,
na seeri ni yiɛ.
Pe kro fnii na paan ni pan,
6 na yaa peyɛ na,
na peyɛ leni gbeŋmbaa,
na yuu mbo,
“Yaa ti e sɔɔnrɔ ku.”
7 Tɛtɛmblɛ, na fiireefɛɛnlɛ,
na sɛɛnlɛ yire tnumu tunfɛɛnlɛ,
hamblɛ pre peyɛ leni gbeŋmbaa,
na yuu mbo, “O ka pe,
e ti mbe o ŋmɛɛ tɛɛ,
mbe yi kan kan mbe yi yire,
mbe yia to.”
8 La, yire Israel leele,
yire lɛ ni sumifɛɛnlɛ mblɛ ni wɔ.
Ni nunu Abraham nanae,
9 mi ndaa e yoori lawee kro nu,
tra yiɛ mna pan na e ni,
mna yo e pan na,
yire ni wɔ ni sumifɛɛnlɛ,
ki tia ni n e je.
10 Kena yaa shia fiɛ,
ŋgi na hin? mi na yire lɛ,
a yaa ti mbe yaka e tɔɔra,
ŋgi na hin? mi wi e Nyiɛkpɔɔ.
Mbe ti e sheli, a mbe ya e na,
mbe e yii kɛshiin,
mbe e wi mbe yili.
11 E le, mblɛ krɔ ki kun na e ni,
pre krɛrɛ mbe ti
nyifɛɛrɛ pe gbo.
Mblɛ pe wii na e ni pre,
pie ku mbe fun.
12 Ee na e loŋgoolo pre haa chaa,
a yaa pe nya,
a mblɛ pe e chaa kakrɔ,
kre wa pe yaka e yiɛ.
13 Mi wi e Tafun Nyiɛkpɔɔ wre.
Mi ni e yii kɛ shiin na,
na e leni gbeŋmbaa,
na yuu e pan na,
“Yaa shia fiɛ, mbe ya e na.”
14 Israel leele yaa shia fiɛ,
imi na e pe fiɛn,
mu pe fɔɔnrɔfɛɛnlɛ mu da kro,
yaa fiɛ, mbe ya e na.
Mi Israel Nyiɛkpɔɔ cheche wre,
mbe e shɔ.
15 E le, ee pe na,
yirɛ tre yira fɔŋgɔ,
ŋga ŋgaala yi nɛɛ,
a yi nyu tna,
a pra yirɛ trei na yi ni.
Ee nyuɛ, na nyambie tre,
mbe yi juari mbruru,
mbe yi pe na yirɛ fue yi.
16 Ee yi nyina nyjeeri,
mbe fuflɛ gbaŋgɔ yi wru,
mbe sɛ na yi ni haalee.
A e yiɛ we shɔ,
mi e Tafun Nyiɛkpɔɔ wre na,
mbe e mi Israel Nyiɛkpɔɔ
cheche, wre ŋga mɛɛ.
17 Na nyumu gbɔɔ chaa,
mbe e shianfɛɛnlɛ,
na e pɔlɛfɛɛnlɛ gbo kre,
mi e Tafun Nyiɛkpɔɔ wre,
we e nyɛnɛɛ loo.
18 Mbe ti lɔɛ fo,
nyambie lawee yire nu,
mbe bloe na fuu,
mbra yilii landɛɛ yire nu.
Mbe ti tablɔ tra lawee,
kre kaari taplɛ bribri,
mbe lawee nyjɛ yira yua,
yire kaari bloe lawee.
19 Mbe ti mbe tinyi,
nyjɛ pe yeeri cedar, na acacia,
na myrtle, na olive, na cypress,
na pine yire fin,
mbe kaari klɔ tablɔ tra kre nu.
20 A leele we yi nya mbe chin na,
mi e Tafun Nyiɛkpɔɔ wre
ni ki pe.
A kie ti mbe pe nɔɔloo ta,
na mi Israel leele Nyiɛkpɔɔ
cheche wre ni tia ki pan ma.
Nyiɛkpɔɔ Paara Mu Sɛɛnlɛ Taan
21 O Tafun Nyiɛkpɔɔ Israel ŋunu wre yo mbo,
“Yire waŋgrɛ sɛɛnlɛ yire,
e pan na e kee ni,
mbe mi na yire fni mbe paara,
mbe e ni nyina kee ŋga,
ki nyina na e wo tna.”
22 E pan na e sɛɛnlɛ yire ni,
mbe yi o nyina kee nyjɛ yie pan,
na kee nyjɛ yira pe fa.
Kie ti mbe o kee nyjɛ yie kɔɔ pe,
yire chin.
23 E o nyina kee nyjɛ yi paan,
mbe pe mbakɔ,
mbe ki ti o chin,
na e pe sɛɛnlɛ yɛŋgɛ.
E kee chichie, ndee sisaa ka pe,
mbe ki ti wejiŋge yɔ o na,
mbe fiɛrɛ o yii.
24 E le, yire sɛɛnlɛ n pe yaka yirɛ,
a kewɛɛ e pini,
a mblɛ pe e sumi pre,
afuŋgo kee pe pini.
25 Ni kanyaa le ŋunu wa nu,
nyjeeri haa wa,
a we yire yilafinhaa,
mbe pan na ni mɛɛ ni.
We ŋulo taanla mbe tro,
imi na pooro brifun,
pooro taanla kre,
ndee imi na chuɛfaanrifun,
choo suu mbe ki chaa kre.
26 A mu yire fa kre,
sɛɛnlɛ yire ŋgi haa ki da,
mu baŋga kee nya mu yo,
a ki pe kpra hin?
Wa n da mu ka yo tun,
a ka n da mu paara tun kple.
27 Mi e Tafun Nyiɛkpɔɔ wre,
ndaa klu mna yo,
Jerusalem leele pan na.
“E le, yira ka paan mbe pe.”
Kre ketaan kre,
mi ndaa ki yo pe pan.
28 Ndaa yiɛ wa mu sɛɛnlɛ yire le,
yi ka nsraa n wa,
mbe jaa ndro ŋga jawala ndee,
mbe jaa kee ka nyu wɔ ndro pan.
29 E le, kafinɛ yirɛ yi.
Yia ja mbe yaka pe,
lewo u yi pe,
a jaŋga ka n wa yi nu.