Nyiɛkpɔɔ Leele Gbunyiŋge Kee
40
E Tafun Nyiɛkpɔɔ wre yo mbo,“E ni leele pre bre ni pan.
2 E paara brɛmm,
e Jerusalem leele le gbeŋmbaa.
E ti pe loo na pe fnaa nyu to,
a ni pe sisam ti mu pe kɛ.
Pe sisam nyjɛ pe pe yire,
ni pe ndie tini yi na,
ma gbee shiin mu kɔ.”
3 Ndro wa mana yilii mbo,
“E o Tafun Nyiɛkpɔɔ kolo,
kre gbeele.
E u trohaa kre fraka,
tablɔ tra kre nu.
4 E nyuɛ na nyambie lalɛɛ kro yurɔ,
mbe yi pe mbrɛrɛ.
Nyambie lawee yire,
na lagojonyi yire kro
we pe mbrɛrɛ.
5 Bawa o Tafun Nyiɛkpɔɔ,
we u yɛnyiŋge wɔ mbe nyina,
mbe lewo kro ki nya.
O Tafun Nyiɛkpɔɔ wre titi,
u u nyu yo ma.”
6 Mana ka yuu mbo,
“Kee ŋga kpali.”
A ni yo,
“Yira ŋgi kee mbe kpali hin?”
Ki kpali na Lewo kro pe
na nyaa yi.
A pan pe yɛnyiŋge kro nyi
na toto yi.
7 Nyaa yuai, mbe toto kun mbe to.
Ŋgi na hin?
O Tafun Nyiɛkpɔɔ wre,
u tia fuflɛ na gbuun na tro yi na.
Kpra na, pan lewo nyi na nyaa yi.
8 Nyaa yuai,
a toto na kuun na tuuri tra,
la, Nyiɛkpɔɔ nyu kee kree wa,
ma nyjila kro nu.
9 Yire mblɛ e ketaan kre kpali,
Zion na kre,
e sɛ yire nyua ndra na e ki kpali.
E ti mbe e mana yili kpɔɔ,
mbe e ketaan kre kpali,
mbe Jerusalem leele kro ki loo.
Yaa shia ti mbe fiɛrɛ e yii,
e yo chiɛ nyjɛ yii wa,
Judah tra nu kre pan na,
“E Nyiɛkpɔɔ wree wa mna.”
10 O Tafun Nyiɛkpɔɔ
Jaŋgafun wre paan,
a we ŋunumu li jaŋga ni.
E le, u paan na leele mblɛ,
u shɔ pre fɔtɔɔrɔ ni,
mbe pe ŋga.
11 A we u leele pre le,
imi na mbaala lefun,
u mbaala le kre.
We mbaala biile pre koli mbe yii,
mbe pe fo gbun na,
a mbaala mblɛ,
pan biile fiɛn fiɛn nyi kre,
we yiɛklu pe pan
mbra pe dumbrɛ.
Nyiɛkpɔɔ Kpɔɔ Mu Wɛ Yira Kro Na
12 Ndro ŋmbi we jaa u kɛ tɛɛ,
mbe epo nyumu kra hin?
Ndee ŋmbi we ja mbe u kɛ tɛɛ,
mbe tra na nyjeeri lemu
kra hin?
A ndro da mu tablɔ,
ŋga kii wa tra ŋga na kro kra,
mu ki snamu chiin,
ndee mu nyuɛ,
na nyambie kra na krayira ni,
mu yi snamu chin tuun?
13 Ndro ŋmbi,
u o Tafun Nyiɛkpɔɔ nyina,
kee ŋga we pe, ndee mu da,
mu u ŋga jawala tun hin?
14 Ndro ŋmbi ni Nyiɛkpɔɔ bɔɔnri,
wra u nyina kolo chiriri,
ŋga na we tro hin?
A ndro ŋmbi wra u ŋga hachila,
ndee mna u nyina kolo,
ŋga na we tro
mbe nɔɔloo ta hin?
15 Kpra na,
pan waŋgrɛ leele pre nyi,
na nyumu ŋga ki mu bokiti nu yi,
o Tafun Nyiɛkpɔɔ wre pan.
A pan pe nyi na bloŋgo yi
u pan.
A pan koyɔɔsu nyjɛ haa yi le,
yire snamu pe u pan
na bloŋgo yi.
16 Lebanon tra kro kejenyi wa da,
mbe sra wɔ
mbe Nyiɛkpɔɔ wre ŋga,
a pan ki yurɛ wa da,
mbe sra wɔ mbe u ŋga.
17 Waŋgrɛ yire kro n pe,
yaka yira u pan,
pan u yi le na yirɛ wɛɛ
kpokpo yi.
18 Ndro ŋmbi ni ee tɛɛ,
mbe Nyiɛkpɔɔ kra hin?
A yira kaa wa mu pe
na wre wi ra?
19 Nyiɛkpɔɔ n pe na sɛɛn yi.
Sɛɛn rɛ, tɛtɛŋu u ki tɛ,
a fiireefun swanyiɛ nya,
mu wo ki na,
mu swafiŋge jlɔnyi pe,
mu hlu ki na.
20 A ndro ŋmba wa jaa swafiŋge,
ndee swanyiɛ ta kre,
tiŋge ŋga kia ja mbe fɔɔn we cha,
mbe tɛtɛŋu ŋmba u tnumu
chin cha,
mbe u sɛɛn badaaŋga,
ŋga kia jaa to tɛ mbe u ŋga.
21 E n chin tun ra?
A e n loo tun ra?
A mu yire yira kro gbeele nyjila,
pe n ki yo e pan tun ra?
Ndee mu yire tra wa nyjila,
mu pan mu su aŋga,
e n ja mu nɔɔloo ta tun ra?
22 Nyiɛkpɔɔ wa mu tni u ŋujɔɔn na,
nyjeeri nyjeeri wa,
a pan u leele le fiɛn fiɛn,
na kpaae lɛ u yiɛ.
Wre u nyjeeri nyaa na yoŋgo yi,
mu ki nyaala,
a ki pe na yoŋgo nyuŋgo,
ŋga pe kan,
mbe ndro jaa tni ki nu yi.
23 Wre u ŋulo na jaŋgafɛɛnlɛ
trei tra,
mbe ndro wa pe le mbe nya.
24 Pan pe nyi na yirɛ nyjɛ pe luu,
a yi fin jle yi.
Yia ta mbe didinyi kan,
mbe Nyiɛkpɔɔ ti u fuflɛ gbun,
mbe tro yi na mbe yi yua,
mbe legboo fuflɛ pan,
mbe yi wru,
mbe sɛ na yi ni na yirɛ fue yi.
25 Nyiɛkpɔɔ ŋmba u pe cheche wre yo mbo,
“Ndro ŋmbi ni ee tɛɛ,
mbe mi Nyiɛkpɔɔ kra hin?
Ndee ni lewro wi ŋmbi hin?”
26 E yiɛ wa e le nyjeeri.
Ndro ŋmbi u wɔɛlɛɛ,
nyjɛ yii wa wa yire wa hin?
Nyiɛkpɔɔ ŋmba u tia yira
yilii kre, u yi nyu chin,
mu yi mɛɛ chin nununu.
Ŋga Nyiɛkpɔɔ wre kpɔɔ,
a u jaŋga kpɔɔ kre ndra na,
wɔɛlɛɛ yire ka n wa,
mbe fun u yiɛ na.
27 Israel leele,
kena ŋgi ki tia e na yuu na,
“Nyiɛkpɔɔ yiɛ wɔ o na,
a mblɛ pe o kalɛɛ lii,
kolo fuɛn na kre,
u kee ka ma na pe ni ŋga hin?”
28 Kena e n chin ra?
Ndee e n da mu loo tun ra?
O Tafun wre wi Nyiɛkpɔɔ,
ŋmba uu wa nyjila kro nu,
a wre u tra ŋga kro wa.
Wra fna, a sra na wɔ u na,
a ndro n wa
mbe jaa u jawala chin.
29 Wre u leele mblɛ faŋga ki kɔ,
pre leni gbeŋmbaa,
na mblɛ pe fna pre kaan jaŋga.
30 Hali yirifumblɔ ja na fnai,
mbe sra wɔ pe na,
a pe ja na gbroi na tuuri.
31 La, mblɛ pe kaan,
o Tafun Nyiɛkpɔɔ wre na kre,
we ti pe faŋga ta na nyuu wi,
mbe kuɛn ta,
mbe yiri mbe sɛ nyjeeri.
Pie fɛ, a pia fna, pie nyaari,
a sra wa wɔ pe na.