Kre nyjila kre, na Merodach-Baladan, Baladan biblɔ wre wi Babylon ŋunu. Ŋga wra loo na Hezekiah yaa mu saanla kre, wra hlɛ nyunɔ mna u kɛyira ya ki na, na pe sɛ u ŋga. 2 Hezekiah na bitumblɔ pre shɔ yɛshɔɔrɔ ni, mna pe nyina u yɛtaara yirɛ nyjɛ yiraa wa u pan, swafiŋge, na swanyiɛ, na tuwe ndiom tɛɛn, na tlade, na u ŋunɔ wiyirɛ kro. Yaka nsraa wa u yirɛ tɛɛ ndoo, na ŋunu katoo wa, na mna u ŋunumu da kro, a u nsra pe nyina yi yi. 3 A Nyiɛkpɔɔ keenyanyofun Isaiah na sɛ Ŋunu Hezekiah pan mna sɛ u wie mbo, “Sena bitumblɔ mblɛ yiri, a kee ŋgi pe pan mu yo mu pan hin?” A Hezekiah na kna mbo, “Pe yiri haalee Babylon na.” 4 A Isaiah na Hezekiah wie mbo, “A yirɛ nyji pe nya mu katoo mna hin?” A Hezekiah na yo mbo, “Ni pe nyina ni katoo ŋga yirɛ kro, ni krɔyira ka n wa a ni ki ndra pe na.” 5 A Isaiah na yo Ŋunu Hezekiah pan mbo, “Kee ŋga o Tafun Nyiɛkpɔɔ wre yo loo, 6 nyjila kaa wa na paan mbe yirɛ nyjɛ yii wa mu katoo mna, na nyjɛ mu tolɛɛlɛ cha mu tɛɛ mu pan, mu pan mu su aŋga na yire, mbe pe paan yi tio mbe sɛ Babylon na, a yaka wa kro, pan o Tafun Nyiɛkpɔɔ wre yo. 7 A pie ŋu titi bibilɛ plɛ yii mbe sɛ na pe ni Babylon na mbe sɛ pe san, mbe pra sumi Babylon ŋunu katoo.” 8 Imi na Ŋunu Hezekiah na kre kee ŋga nɔɔ loo yi na, u nyjila wejinyiŋge we pan, ki tia wra kna mbo, “Kee ŋga o Tafun Nyiɛkpɔɔ tia mu yo ni pan ŋga, ki nyu.”