Ŋunu Hezekiah Na Yaa Mu Saanla
38
Kre nyjila kre nu Ŋunu Hezekiah na yaa mna da kumu kɛ na. A Nyiɛkpɔɔ kee nyanyofun Isaiah, Amoz pɔ wre na sɛ u le haa mna yo u pan mbo, “Kee ŋga o Tafun Nyiɛkpɔɔ wre yo mu pan yi kre mbo, ‘Mu kro gbeele mu tɛɛ, ŋgi na hin? Ma yiri, mu ku.’” 2 A Hezekiah na yiɛ kna mu wa mboo mbɛɛ na mna nyiɛtali mbo, 3 “O Tafun Nyiɛkpɔɔ jande, sɔɔnri na ni lɛɛ wɔ mu mu sumi na kpra ni, mu na kee ŋga ki tna mu pan pini.” Ŋga wra kre kee ŋga yo mu kɔ kre, a wra nyɛni chichie. 4 A o Tafun Nyiɛkpɔɔ na yo Isaiah pan mbo, 5 “Sɛ yo Hezekiah pan na, kee ŋga mi mu Tafun Nyiɛkpɔɔ, mu tolɛɛ David Nyiɛkpɔɔ wre yo yi kre, ‘Ni mu nyiɛtalaa loo, mu mu yetunyi yire nya, mbe ti mbe mu yɛlɛ kɛmbɔkunɔ li mbe ya mu ble na. 6 A mbe ŋu, na Jerusalem kakpɔɔ ŋga shɔ mbe yili Assyria ŋunu kɛɛ, mbe kɛ tɔ chia kre na.’” 7 Isaiah na yo mbo, “Sɛmbɛɛrɛ kee ŋga ki nyina na o Tafun Nyiɛkpɔɔ nyu ŋga u yo na we ki pe kre yi kre. 8 Nduu haa ŋga Ŋunu Ahaz pe kre, mbe ti mbe yila to ki na, mbe ki ndile sɛ kro ni gbee nununu kɛ.” A ki ndile kre na sɛ kro ni ma gbee nununu kɛ.9 Ŋga Hezekiah na saanla kre, a wra kre mboo ŋgaa mɛɛ ŋga nyunɔ,
10 Ndaa jawa na mbe ku
ni nyanyjɛbim nyjila,
mbe ni ŋmaa na yili ni kɛɛ.
11 Ndaa jawa na,
mba o Tafun Nyiɛkpɔɔ wre nya,
tra ŋga nu mna na.
A mba tra ŋga leele nya
nyini ni na,
mbaa yo tni mi na pre we tni
mbe chaa.
12 Pra ni ŋmaa shɔ ni kɛɛ,
imi na mbaala lefun,
u yoŋgo nyuŋgo klɔ,
mbe sɛ na ki ni kre yi.
Pan kra pe na yotuŋu,
u yoŋgo tin mu kɔ,
mu ki kun kpɛɛra na mu sɛ yi.
Ndaa jawa na ni ŋmaa kɔ.
13 Na ble wɔ,
pan mbe nyɛni chiin
mbe nyiŋge se,
mu yo jira u ni kajle jee.
Ndaa jawa na Nyiɛkpɔɔ,
ni ŋmaa shɔ ni kɛɛ.
14 Ni mana na kan,
a ndaa nyɛni na katoo kotro wi.
Ndaa yiɛ yire mu le nyjeeri chiin,
a ni nyiɛlɛ na fna.
O Tafun Nyiɛkpɔɔ ni fnai,
kena jande ya ni na.
15 Kee ŋgi mbe jaa yo hin?
Na o Tafun Nyiɛkpɔɔ wre titi,
u yo ma ni pan,
a kra pini ma.
Fooro ŋga nu ni nyi ŋga ndra na,
mbe ni yɛ nyjii yɛlɛ nyjɛ,
mbe li kro nu.
16 Nyiɛkpɔɔ, mu nyu kee,
ki lewo kaan ŋmaa,
a kre chiin kie ni nyiɛ
ŋga ŋmaa.
Ŋu mu ni ŋga fufam,
mu kɛ tɔ ni na.
17 Ki pe kpra na,
ŋga mu ni chichie chaa
kre ndra na,
yire fooro kee nyjɛ na ni da.
A mna mu koroo tɛɛ,
mna ni wɔ wee ŋga nu
lewo tuuri mbe kla kre nu,
mna ni sisam kro ti mu ni kɛ.
18 Ndro ŋmba u ku mu kɔ,
wa jaa mu ŋga mɛɛ.
A gboolo n wa na kaanhaa ni,
mu kpralie na.
19 Leele mblɛ pe le pre,
pre pe mu kaan mɛɛ,
imi na ni mu kaan mɛɛ,
fuŋgaami ŋga.
A lɛɛlɛ pe biile nyina,
imi mu kpralie kre nyi.
20 O Tafun Nyiɛkpɔɔ,
ŋu mu ni tra.
Ki tia oo juru gbun, mbe mɛɛ kɔ,
mbe mu ŋga mboo,
mu Suminyuŋgo wa,
nyjila ŋga oo wa ŋmaa ni ŋga.