Ŋunu Wre Na Yo Isaiah U Ya U Na
37
Ŋga Ŋunu Hezekiah na kre kee ŋga loo kre, wra fooro tɛɛ mna u dodoŋgi tini mu wla uyɛ na, mna kumu yoŋgo wru mu tɔ, mna sɛ o Tafun Nyiɛkpɔɔ wre suminyuŋgo wa. 2 Mna Eliakim ŋmba na wi ŋunu katoo lefun wre, na Shebna ŋmba na wi nyunɔfun wre, na srawɔfɛɛnlɛ loplombo pre tun Amoz pɔ Isaiah ŋmba na wi Nyiɛkpɔɔ keenyanyofun wre pan. Ŋga praa shie kre na pe pe kumu yonyi tɔ tɔ. 3 A pra sɛ yo Isaiah pan mbo, “Hezekiah yo na aŋga ble ŋga pe kanyana ble, a oo wa yɛgbɔɔnrɔ, na yɛkuuro nu. Pan o nyi na chlɔ ŋmba se lɛɛ yaa, a faŋga n wa u nu mbe u jaa se wi. 4 Assyria tra ŋunu u ŋunɔwifɛɛnlɛ lopom tun a u pan mu na Nyiɛkpɔɔ ŋmba u le wre pini na tɛɛ. Aada o Tafun, mu Nyiɛkpɔɔ wre kee nyjɛ ŋunɔwifɛɛnlɛ lopom wre yo yire loo, kena nyiɛtali mu o leele mblɛ pe kro pre ŋga.”5 Ŋga Isaiah na Ŋunu Hezekiah bitumblɔ pre mandiɛ loo kre, 6 a wra yo pe pan mbo, “E sɛ yo e tafun wre pan na, o Tafun Nyiɛkpɔɔ wre yo na, Yaa ti mbe Assyria ŋunu wre kee yire e loo yire e yii fiɛrɛ, yire kee nyjɛ Assyria ŋunu yuu yire, jiɛnlɛ kee u yuu ni na. 7 E le, ni paan mbe ŋumu ka le u nu, mbe ki ti na pe waa pan mu mandiɛ ka bɔ u pan, mbe u ndru mbe sɛ u waŋgra nu, bawa mbe ti mbe pe u gbo na brɔfiɛn yiɛshiin ni.”
Assyria Pre Piɛri Kee Ka Yo Na
8 Ŋga Assyria ŋunɔwifɛɛnlɛ lopom wre na kɔ mna loo na pe ŋunu wre yili Lachish na kre, wra ndru u kro mna sɛ nya na uu wa na wii na kakpɔɔ ŋga pe yeeri Libnah kre leele ni. 9 Kre nyjila kre Sennacherib na loo na, Egypt ŋunu, ŋmba praa yeeri Tirhakah, a wra pe Cush ndro wre, uyɛ kna mbe sɛ wi na u ni. Ŋga wra kre mandiɛ ŋga loo kre, a wra leele tun Hezekiah pan na hlɛ ni mbo, 10 “E sɛ mandiɛ ŋga ni Judah ŋunu Hezekiah pan na, waa ti mbe u Nyiɛkpɔɔ ŋmba na u kaan wre u fana mbe wra yuu na, ‘Jerusalem wa to Assyria ŋunu kɛɛ.’ 11 Ŋu titi mu loo kee ŋga Assyria ŋulo taa waŋgrɛ tataara na, imi u pe kla mu da. Kena mu jawa na mu jaa shɔ o kɛɛ ra? 12 Ni tolɛɛlɛ na Gozan, na Haran, na Rezeph kakpɔɛ yire kla, mna Beth-Eden leele mblɛ praa wa Tel-Assar na pre gbo, a pe sɛɛnlɛ yire nsra ja mna pe shɔ. 13 Sena Hamath, na Arpad, na Sepharvaim, na Hena, na Ivvah kakpɔɛ yire ŋulo nyi hin?”
14 Ŋunu Hezekiah na hlɛ kre shɔ bitumblɔ pre pan, mna ki tɔɔnri. Ŋga wra ki tɔɔnri mu kɔ kre, a wra sɛ na ki ni o Tafun Nyiɛkpɔɔ Suminyuŋgo wa, mna sɛ ki nyaa mu tɛɛ, o Tafun Nyiɛkpɔɔ wre yiɛ. 15 Mna nyiɛtali mna yo mbo, 16 “O Tafun Nyiɛkpɔɔ Jaŋgafun, Israel Nyiɛkpɔɔ ŋmba ŋujɔɔn kii wa mu tni Cherubim lalaa, ŋu nunu chom wi Nyiɛkpɔɔ ŋmba mu ŋunumu lii ŋulo mblɛ pee wa waŋgra ŋga nu kro na. A ŋu mu nyjeeri na tra gbeele. 17 O Tafun Nyiɛkpɔɔ, jande ndie tɛɛ o pan, mu nyiɛlɛ nyaa mu kee ŋga ki lii o na ŋga le. Loo kee nyjɛ Sennacherib nyunɔ mu na ŋu Nyiɛkpɔɔ ŋmba mu le wre taanla! 18 O Tafun Nyiɛkpɔɔ, o kro ki chin imi na Assyria ŋulo pre na waŋgrɛ tataara na yi leele kla, a pe trɛ yire na sni waara, 19 Pra pe sɛɛnlɛ le kanhun mna yi sro, mna yi kla, ŋgi na hin? Yira pe yirɛ wɛɛ, tinyi na dnɛ ni pra yi pe, a yira pe lewo kɛnyu tnumu. 20 Kena o Tafun, na o Nyiɛkpɔɔ, o shɔ Assyria ŋunu kɛɛ, mbe ki ti waŋgra leele kro chin na ŋu nunu chom wi Nyiɛkpɔɔ.”
Isaiah Kee Ŋga Wra Yo Ŋunu Wre Pan
21 A Isaiah na tia pra sɛ yo Ŋunu Hezekiah pan na, “Kee ŋga o Tafun Nyiɛkpɔɔ, Israel Nyiɛkpɔɔ wre yo yi kre mbo, ‘Ŋga mu yire Assyria ŋunu Sennacherib mandiɛ na mu ni tali kre ndra na. 22 Kee ŋga O Tafun Nyiɛkpɔɔ wre yo mu u taan yi kre,’ mbo,
‘Mu feni,
a Jerusalem lechlɔ,
ŋmba u n blɔ chin wre mu le,
na mu tɛɛ, na ndra nyaara.
23 Ndro ŋmbi mu jawa,
na wre mu tɛɛlɛ,
mu na jiɛnlɛ kee yuu u na
ŋga hin?
A ŋmbi na mu fuuru,
mu na yɛkpɔɔmu kee pini
ŋga hin?
Israel Nyiɛkpɔɔ Cheche wre,
na mu yire kee
nyjɛ kro pini kre.
24 Mna mu bitumblɔ tun,
a pra pan mu mi
e Tafun Nyiɛkpɔɔ, wre tɛɛlɛ,
a mna yo na,
“Mbe ni sookɛɛ tataara yire tɛɛ,
mbe wi mbe Lebanon,
nyuɛ gedenyi yire shɔ.”
Mna muyɛ kpɔɔ mna yo na,
mna cedar tinyi gedenyi,
na cypress tinyi chichiele,
yire kro knumu mu chan,
mu le klɔɛ yire titi lam.
25 Mna nyukpɔɔmu kee yo na,
mna kɔlɔe tuu plɛ tra nu,
mna gbɔ yi nu,
mna mu jeelee lam tɛɛ,
mu Egypt lafooloe taanla
mu yurɔ.
26 Mu n da mu loo tun,
na kee nyjɛ yi pini
fuŋgaami ŋga,
mi ndaa yi jawa mu tɛɛ fa ra?
Mi ndaa mu ŋga faŋga,
a mna tɛɛ mu kakpɔɛ,
nyjɛ pe mboe sin mu fɛ mu kun,
yire juari mu wo.
27 Leele mblɛ praa wa yire,
kakpɔɛ yire na,
pre faŋga na kɔ pe nu,
a fiɛrɛ na tia nyifɛɛrɛ
na pe gbo.
Pan pra pe na gbaŋmbaa nyaa,
ndee nyaa nyjɛ yi fin,
nyuŋgo ndra na yi,
yira mu mbe sɔndɔ.
28 La ŋga mu shie na paan ŋga,
ni mu kee kro chin,
a ni chin imi na mu krɔ kun kpɔɔ,
na ni ni mu da.
29 Mu krɔ ŋga ki kun na ni ni,
na mu mɛchaara kee,
nyjɛ mu pini yire kro,
le ni ndie.
Kre ndra na,
mbe drawa le mu mana,
mbe krafi le mu nyuu,
mbe ti mu ndru,
mbe kolo ŋga mna yii mu pan,
kre yii mbe sɛ mu kro.’”
30 A Isaiah na yo Ŋunu Hezekiah pan mbo,
“Kee ŋga ki paan,
mbe pe kre sɛmbɛɛrɛ yi kre.
Ala yɛlɛ ŋga nu,
shɔlɔ nyjɛ yi fin,
yi yɛ ee ta mbe li,
a yelibaŋga nyjɛ yie ŋɔɔ,
mbe yili yi na yire chɔɔ,
ee ta mbe li.
La, yɛlɛ taarɛwo kre nu rɛ,
ee yirɛ luu mbe yi kun,
mbe tresɛnyi seele pe,
mbe yi sɛnyi ta mbe kun mbe li.
31 A Judah leele mblɛ pe kro,
pre we pe na tiŋge ŋga didinyi,
yi le tra, mu na sɛni yi.
32 Leele pre plɛ we kro
Jerusalem na,
Zion nyua kre na, mbe chirɛ.
O Tafun Nyiɛkpɔɔ wre chaara
kie ti, mbe kre kee ŋga pe.”
33 A kee ŋga o Tafun Nyiɛkpɔɔ wre yo mu tro Assyria tra ŋunu wre haa yi kre mbo,
“U jele wa taan chia ŋga na,
a wa snimi nunu chom kuraa,
wa ki na, mbaa yo u wifɛɛnlɛ,
pie jaa da wa, na pe wi yirɛ ni.
34 Kolo ŋga u yii mu pan chɔɔ,
kre na we tro mbe ndruu sɛ,
wa jaa le kakpɔɔ ŋga na.
Mi e Tafun Nyiɛkpɔɔ wre ni ki yo.
35 Mbe kɛ tɔ kakpɔɔ ŋga na,
mbe ki shɔ mi titi yɛnyiŋge
ndra na,
na nyu ŋga ndaa yo,
ni sumifun David pan
kre ndra na.”
Pra Ŋunu Sennacherib Gbo
36 A o Tafun Nyiɛkpɔɔ bituŋu wa na sɛ Assyria pre tnihaa wa mna ŋunɔwifɛɛnlɛ kagbenyi lafaa na fuloe jijirɛ, na kunɔ gbo. Ŋga nyiŋge na se bnimi a leele na yiri, na gbooloo wa mu sni sni wa. 37 A Assyria ŋunu Sennacherib na ndru u kro mna sɛ Nineveh na. 38 Ki ble ka, wraa wa u sɛɛn Nisroch nyuŋgo na sumi, a u bibilɛ shiin mblɛ praa yeeri Adrammelech, na Sharezer pre na sɛ u gbo na brɔfiɛn yiɛshiin ni, mna fɛ mu sɛ Ararat tra nu. A u pɔ ŋmba praa yeeri Esarhaddon wre na u krɔ li, mna pe ŋunu.