Assyria Na Jerusalem Fɛ Mu Kun
36
Nyjila ŋga Hezekiah na ŋunumu li Judah tra nu, ki yɛlɛ kɛmbɔjijirɛ wo na Assyria tra Ŋunu Sennacherib na pan mna Judah tra kakpɔɛ nyjɛ pra mboe sin mu fɛ mu kun yire tɔ, mna wi mu yi shɔ. 2 Assyria ŋunu wre na tia u ŋunɔwifɛɛnlɛ pre lopom wre na ŋunɔwifɛɛnlɛ tataara wru mna yili kakpɔɔ ŋga praa yeeri Lachish kre na mna sɛ Jerusalem na. Ŋunɔwifɛɛnlɛ pre lopom wre na sɛ yire wee ŋga nu tapla ŋga kraa wa nyjeeri haa kre nyumu naa fuu na tro kre nu. Kre lawee kre na mbra kolo ŋga kra sɛ pe yonyi jehaa kre nu. 3 Ŋga kra pan ma kre, Hilkiah pɔ Eliakim ŋmba na wi ŋunu katoo lefun wre, na Shebna ŋmba na wi nyunɔfun wre, na Asaph pɔ Joah ŋmba na wi ŋunu katoo hlɛ tɛɛfun wre na yili mna pan mu u fni. 4 Ŋunɔwifɛɛnlɛ lopom wre na yo pe pan mbo, “E sɛ yo Hezekiah pan na kee ŋga Assyria ŋunu lopom yuu yi kre mbo, ‘Ndro ŋmbi na mu kaan ma hin? 5 Ŋu mu yo na ŋunɔwiire kachindɛɛ wa mu pan, a mu ŋunɔwifɛɛnlɛ faŋga ni, la, kee wɛɛ mu yuu. Ndro ŋmbi na mu kaan, mu yiri mu ni taan ŋga hin? 6 Le, fuŋgaami ŋga Egypt ŋunu na mu kaan. La, pan u nyi na braŋgɔ ŋga pe pe kanyie yi. Ŋgi na hin? Na mu see ki na kpɔɔ, kie mu kɛ lam su. Pan Egypt ŋunu Pharaoh we leele mblɛ pe kaan u na pre pe.’” 7 A Assyria ŋunɔwifɛɛnlɛ lopom wre na ndru mu yo na mbo, “Ndee e Tafun Nyiɛkpɔɔ wre na e kaan ree? A wre e Tafun Nyiɛkpɔɔ wre, u sumindoe na u sragbuɛnlɛɛ ma Hezekiah na juari mna wo, mna yo Judah, na Jerusalem leele pan na pra paan mbra sumi sragbunu nunu chom ŋga kii wa Jerusalem na kree? 8 Kena mbe yire ni tafun Assyria ŋunu wre jeelee na, mbe o paara. Na o waa paara mu fni, mbe mu ŋga soolo kagbenyi shiin, na mu jaa pe nduufɛɛnlɛ ta wala. 9 E yila Egypt ŋunu sookɛɛ, na u soo nduufɛɛnlɛ na, mu na kaan u na, la, e kro wa ni tafun ŋunɔwifun ŋmba uu fiɛn kuraa ja. 10 E le, o Tafun Nyiɛkpɔɔ wre titi u yo ni pan na, ni pan mbe wi na e ni mbe tra ŋga kla.”11 A Eliakim, na Shebna, na Joah na yo ŋunɔwifɛɛnlɛ lopom wre pan mbo, “Jande, Aramaic yolo yo na o ni, yire o ndru. Maa Hebrew yolo yo mbe leele mblɛ pee wa mboo ŋga krɔ ŋga ka loo.” 12 A ŋunɔwifɛɛnlɛ lopom wre na kna mbo, “E jawa na yire, na ŋunu wre chiin pan waŋgra lopom wre ni tun na yire kee nyjɛ ni ree? Pan ma, leele mblɛ pe tni mboo ŋga na ŋga, pe chaa. Yire na pre kro we e yɛ fre ka, mbe e yɛ fnimi gbɔ.”
13 A ŋunɔwifɛɛnlɛ lopom wre na yiri mu yire sholo, mna fuu Hebrew yolo nu mbo, “E kee ŋga waŋgra lopom Assyria ŋunu wre yuu e pan loo! 14 U e jaari na yaa shia ti mbe Hezekiah e fana, wa jaa e shɔ fio. 15 A yaa ti mbe u kro mbra e fana, mbe e na kaan e Tafun Nyiɛkpɔɔ wre na, ŋgi na hin? Wre u yuu mbo, ‘O Tafun Nyiɛkpɔɔ wre we o shɔ, a wa kakpɔɔ kre le Assyria ŋunu kɛɛ fio.’ 16 Yaa ndie tɛɛ Hezekiah kee na! Kee ŋga Assyria ŋunu wre yuu e pan yi kre mbo, ‘E pan mbe o tni wejinyiŋge nu. Na ki pan ma, ee kolo ta mbra e tre sɛnyi, na e fig tinyi sɛnyi lii, mbra yire titi kɔlɔe nyumu gboo, 17 mbe sɛ su na mbe sɛ na e ni tra ŋga kie pe na e tra ŋga yi nu. Bawa shɔlɔ na simi fɔnyi nyi, a sro na tre sɛnyi seelee wa wa. 18 Yaa ti Hezekiah e fana, wre u yuu na, O Tafun Nyiɛkpɔɔ wre we o shɔ. Waŋgra ka sɛɛn da mu wi mu ki leele shɔ Assyria ŋunu kɛɛ tuun? 19 Sena Hamath, na Arpad leele sɛɛnlɛ yire nyi hin? Sena Sepharvaim leele sɛɛnlɛ yire nyi hin? Yire sɛɛnlɛ yire ja mu wi mu Samaria leele shɔ ni kɛɛ ra? 20 Yire waŋgrɛ nyjɛ krɛrɛ sɛɛnlɛ da mu wi mu ki leele shɔ ni kɛɛ tuun? Kena mni e Tafun Nyiɛkpɔɔ wre we pe mbe ja mbe Jerusalem leele shɔ ni kɛɛ hin?’” 21 A leele pre na pieri, pe nsra nyu kun. Ŋgi na hin? Na Ŋunu Hezekiah yo pe pan na pia shia nyu kun na u ni. 22 A Hilkiah pɔ Eliakim ŋmba na wi ŋunu katoo lefun wre, na Shebna ŋmba na wi nyunɔfun wre, na Asaph pɔ Joah ŋmba na wi ŋunu katoo hlɛ tɛɛfun pre na sɛ Hezekiah pan. Ŋga pra da wa kre, na pe fooro tɛɛ mu pe dodonyi tini mu wla peyɛ na, mna sɛ kee nyjɛ ŋunɔwifɛɛnlɛ lopom wre yo pe pan yire kro bɔ u pan.