Cheche Kolo Kre
35
Fimi tra waara ŋga nu leele n wa kre,tinyi we yiri mbe totoe pe,
mbe yɛshɔɔrɔ pan tra kre nu na.
2 Tinyi we totoe jiri,
tra kre nu poŋgo,
mbe yɛshɔɔrɔ kpɔɔ pan ki nu.
Pan tra kre we nyu,
na Lebanon nyua kre yi.
Kie tna na Carmel,
na Sharon tra lawee yire yi.
Bawa o Tafun Nyiɛkpɔɔ,
we u yɛnyiŋge,
na u nyumu wɔ mbe pe nyina.
3 E mblɛ kɛnyi yi gblɛ,
a pe kosie pe pe na,
yiɛyiɛ pre le gbeŋmbaa.
4 E yo mblɛ pe fiɛ pre pan na,
“E gbun ta, yaa shia fiɛ.
Ŋgi na hin? E Nyiɛkpɔɔ wre paan,
mbe e loŋgoolo
pre sisam fɔlɔ tɔ,
mbe e ŋmaa shɔ.”
5 Na ki waa pan ma,
fuunlo nyiɛlɛ we nyaa,
mbe ndikambla na ndru.
6 Finla we yiri mbe ye na kafaa wi,
mbe kpoolo yɛshɔɔrɔ tɛɛ,
mbe gble le.
Nyumu we yilii fimi tra kre nu,
mbe lafooloe nyumu,
tra kre nyiŋge poŋgo.
7 Tablɔ tra ŋga ki wɛɛri,
na sroi kre we kaari tapla,
mbe lawee ŋga ki yua kre,
kaari nyumu lawee.
Lawee ŋga nu,
ŋmbokuŋmboe na nyi kre,
we kaari mafaan,
mbe nyaa fin ki nu kro.
8 Kokpɔɔ we tro kre lawee kre nu,
mbe pe ki yeeri,
“Kokpɔɔ cheche.”
Sisampefɛɛnlɛ na jijiele,
wa na nyaari kre kolo kre na.
Leele mblɛ pe lii Nyiɛkpɔɔ kee na,
pre chiin kolo yi.
9 Jirae na yurɛ sisɛɛ wa pe wa.
La, mblɛ ŋmaa pe shɔ pre chiin,
pie na tro ki na.
10 Mblɛ pe shɔ pre we ndru,
mbe sɛ Jerusalem na,
mbra yɛshɔɔrɔ mɛɛ koni kpɔɔ.
Pe yiɛ we shɔ nyjila kro nu,
a foorolie na jiɛn wa pe wa,
la, yɛshɔɔrɔ bribri pie na lii,
nyjila kro nu.