Nyiɛkpɔɔ We U Loŋgoolo Ndie Tini
34
Waŋgrɛ na yi leele kro,e pan e ndie tɛɛ e loo.
Waŋgra ŋga,
na yira ŋga kii wa ki nu,
na yira ŋga kii wa
mu tni ki na kro,
ki ndie tɛɛ.
2 O Tafun Nyiɛkpɔɔ wre krɔ kun,
na waŋgrɛ nyjɛ kro,
na yi ŋunɔwifɛɛnlɛ ni.
Ki tia we waŋgrɛ yire kla,
mbe pe leele pre gbo.
3 Pe gboolo we sni fimi na,
mbe fɔɔn mbra ndio,
a pe nyimi we nyuɛ yire tɔ,
mbra nyinai poŋgo.
4 A we wɔɛlɛɛ,
nyjɛ yii wa nyjeeri kro nya,
mbe nyjeeri kru na yurɔ hlɛ yi.
Nyjeeri yirɛ kro we klɔ,
mbe wo tra imi na tinyi wrɛ,
nyaara na woni kre,
ndee imi na fuflɛ tinyi sɛnyi
mbru, mbra woni bribri kre.
5 Na o Tafun Nyiɛkpɔɔ wre,
u brɔfiɛn ŋunu kre tɛɛ,
mu nyjeeri yirɛ kla mu kɔ,
fuŋga we pan tra,
mbe Edom leele mblɛ u gbun,
na pimi ni pre kla poŋgo.
6 Nyimi na nyina we u brɔfiɛn
kre nyu mana,
mbe ki pe na mbaala na sikaala,
pe ki tɛɛ mu gbo mu sra wɔ.
O Tafun Nyiɛkpɔɔ wre,
we kre sra ŋga wɔ kakpɔɔ,
ŋga pe yeeri Bozrah kre na,
mbe lenɛɛrɛ gbo Edom tra nu.
7 Pan pie pe faŋgafɛɛnlɛ pre gbo,
imi na pe nyaa lam nui,
ndee katoo nui,
na pe biile kuu kre yi,
mbe pe nyimi,
na pe nyina lawee tɔ poŋgo.
8 Zion ndra na,
o Tafun Nyiɛkpɔɔ ble wɔ mu tɛɛ,
mbe pe loŋgoolo sisam fɔlɔ tɔ.
9 Edom lɔɛ yire, na ki tra kro,
we pe na kotari na pua tuwe,
ŋga na kanhun to yi.
10 Kie na shio lafo na blee,
mbra wree yili nyjila kro nu.
Tra kre we sni ma waara,
nyjila kro nu,
hali ndro wa nyaari,
mbe tro ki na kple.
11 Kuweele, na gɔɔgɔɔe,
pie tra kre bali mbe tni.
O Tafun Nyiɛkpɔɔ we,
Edom tra kre nyu kra,
mbe le na we ti ki sni waara,
hali yaka bie wa pe ki na.
12 Ki lebiile pre wa yaka ta,
mbe peyɛ kpɔɔ na ŋulo lɛ,
a loplombo wa pe ki na na.
13 Wuuro na nyaa, na mbrambra,
we fin mbe pe ŋulo kalonyi,
na pe chiɛ nyjɛ pe mboe sin,
mu fɛ mu kun yire kro tɔ.
A ŋmbokuŋmboe,
na kuweele pie tni yi nu.
14 Bawa komboolo,
na nyaalam yurɛ nyininyini,
na pe mblɛ pe nyaari ble kro,
we na nyɛni mbra peyɛ yeeri,
mbra shie mbra fni,
a bawa chɔɔ pie na wuui.
15 Kuweele we pe zeere le wa,
mbe pe chrɛwɛ se, mbe yi jiri,
mbe pe biile pɔɔri wa.
A apɛtee we pan, mbe ble wa
mbra shie mbra paan.
16 O Tafun Nyiɛkpɔɔ hlɛ kre, ki tɔɔnri mu loo kee ŋga u yo, mbo,
Kre yurɛ mblɛ wa wa fun,
a wa n wa mbe ŋmbrɔ la.
Pan o Tafun Nyiɛkpɔɔ
wre yo ki pe.
A u Ŋumu wre we pe ble titɛɛ.
17 O Tafun Nyiɛkpɔɔ wre
we tra kre yɔɔlɛ,
mbe yurɛ pre ŋga.
Pie tra kre wru mbe pe pe wo,
mbe tni wa nyjila kro nu.