Nyiɛtalaa
33
Ŋu waŋgra ŋga ndro,ŋmba u ni leele klai, u atɛ,
kii wa na ndro n da mu ŋu kla tun,
la, mu atɛ.
Ndro n da mu mu wɔ mu ŋga tun,
la, ŋu mi leele wɔ mu ŋga, mu atɛ.
Na maa ni leele klaa,
na pe wɔŋgaa ti, pie mu kla,
mbe mu wɔ mbe ŋga
mbe fɔlɔ tɔ.
2 O Tafun Nyiɛkpɔɔ jande,
o dumi ɛ!
Ŋgi na hin? Mu la o ta.
O ŋga faŋga bnimi,
mu pan mu o shɔ,
o kanyana nyjila nu.
3 Na leele mu mana loo,
mbe pra feni,
a na mu yiri mu yire,
mbe waŋgrɛ fɛ mbe nyina mu yiɛ.
4 A yirɛ nyjɛ pe foolo mu ta yire,
leele we kan mbe wo yi na,
mbe yi koli, na kpatɔ u pan,
mu kan mu wo yi na.
5 O Tafun Nyiɛkpɔɔ wre kpɔɔ,
a wre u ŋunumu lii yira kro na.
We ti mbe frakaa na kpralie,
Jerusalem shɔ, mbe ta poŋgo.
6 A we ti mbe waŋgra kre titɛɛ ta
mbe yire.
We kɛ tɔ u leele na nyjila kro nu,
mbe pe ŋga kachindɛ
na hachila.
A pe krɔyira kpɔɔ yi buuro,
ŋga pie na o Tafun Nyiɛkpɔɔ
wre kaan.
7 Pe bilɛ gbuntitiremfɛɛnlɛ,
nyɛni kpɔɔ lete na,
a pe bitumblɔ mblɛ,
pe wejinyiŋge chaa pre,
na nyɛni na tro.
8 Pe kokpɔɛ yire troo pe fiɛrɛ ni,
a ki tia leele na sro,
mbe tro yi na na.
Nyu nunu nyjɛ pe pe,
mu yira ka kre, pe yi kla,
dansiɛrɛ kee nyjɛ yii wa yi
na yire,
pe yi le kewaara,
a ki tia ndro n na u ŋmbrɔ,
kaan buuro na.
9 Tra kree wa mu sni ma waara.
Lebanon klɔɛ yire wrɛ nyaara,
a Sharon nyuɛ shiin lalaa,
tra taan kre,
pan ki nyi na fimi tra yi.
A Bashan,
na Carmel nyua yire tinyi,
nyaara mu wo.
O Tafun Nyiɛkpɔɔ U Loŋgoolo Jaari
10 O Tafun Nyiɛkpɔɔ wre yo mbo,
“Fuŋga rɛ, mbe jele kɔ.
Mbe e nyina,
imi na ni jaŋga kpɔɔ mu da.
11 E kee wɛɛ jawa e ndra,
a kala ŋga e pini kro
pe kee waa.
Pan e ŋumu nyi na kanhun,
ŋga kie e kla yi.
12 Pan ee shɔ na pe yirɛ sro,
mu yi tɛɛ mbe mumu pe,
ndee imi na pie wuuro chieri,
mbe wa kanhun nu mbe yi shɔ,
mbe tɔɔnrɔ wo kre yi.
13 E ti mbe mblɛ haa ki le pre,
kee nyjɛ ni pe yire loo,
mbe mblɛ pe mbra mna pre,
ni jaŋga nya.”
14 Sisampefɛɛnlɛ,
mblɛ pee wa Zion na pre,
fiɛrɛ kpɔɔ pe yii,
a leele mblɛ,
pe n Nyiɛkpɔɔ chin pre,
na seeri na yuu mbo,
“O ŋmbi haa we ja,
mbe tni lawee ŋga nu,
kanhun shɔ nyjila kro nu hin?”
15 Mblɛ pe fraka,
na kee nyjɛ yi fraka yuu,
a pra swa shɔ leele pan jaŋga na,
ndee mbe dɔli yira shɔ,
a pra ndie tɛɛ linkuuro kee na,
na krɔ kna na waa,
sisam pee na kre,
16 pre leele pre we tnihaa chichie ta,
a pan pe tnihaa kre we pe,
na pe nyuɛ lawee ta mu sɛ ndra,
a yaka wa ja mbe pe ta.
Pie pe ŋga sro,
a nyumu wa klo pe na.
Mbakɔ Yɛnyiŋge
17 Ee yɛnyiŋge ŋunu wre nya,
mbe tra ŋga ki sni vankam,
mu sɛ haalee kre nya.
18 Fiɛrɛ lɛɛ ŋga kraa wa e nu,
mu wru tɔɔ shɔfɛɛnlɛ,
na mblɛ praa e tra juu kre,
yie pe kee nyjɛ yaa jaa fɛɛ.
19 Yaa fumblɔ nyukpɔɔmu,
kee yofɛɛnlɛ mblɛ praa,
yolo fɔnyi yuu,
a e nsraa yi nɔɔ ndru pre nya na.
20 E Zion kakpɔɔ, ŋga na
o naa o ble kpɔɛ lii kre le,
e Jerusalem le.
Kie pe wejinyiŋge ndoo,
ŋga nu leele we jaa tni.
Pan kie pe na yoŋgo nyuŋgo,
ŋga pe kan,
a ndro wa jaa ki kɔ ki titɛɛ,
ndee mbe ja, mbe ki kɛɛn bɛɛlɛ,
nyjɛ pe kan tra klɔ,
ndee mbe ki mɛnyi knumu.
21 Bawa o Tafun Nyiɛkpɔɔ wre we,
u yɛnyiŋge wɔ mbe o nyina.
Oo tni lɔɛ kpɔɛ,
na lafooloe mbɛɛ na, la,
loŋgoolo krɔɛ na krɔɛ kpɔɛ yɛ,
wa jaa tro yi nu.
22 O Tafun Nyiɛkpɔɔ,
we pe o kpra kunfun,
a wre we na mbra leni o pan,
a wre we pe o ŋunu,
a wre we o shɔ.
23 Mɛnyi nyjɛ ni,
e loŋgoolo pre krɔɛ yonyi yii yire,
we pe yɔŋmbɔ yɔŋmbɔ,
a yia ja, mbe yonyi yire yii
gbiŋmbi na.
Na ki waa pan ma,
e loŋgoolo pre yirɛ we bɔ,
mbe e yi foolo mbe wru,
hali fna ŋmba uu wa e nu,
kple we yɛ ta mbe foolo.
24 A kre ndro n wa Zion na,
mbe yo mbo, “Ni yaa na.”
A Ndro ŋmba uu wa mu tni,
wa kro, we sisam tinkɛɛ ta.