Ŋunumu Lie Ŋga Ki Fraka
32
E le, ble kaa wa na paan,mbe ŋunu ŋmba u fraka pan,
mbe ŋunumu li,
a u loplombo kro
we pe kprafɛɛnlɛ.
2 Na fuflɛ sisaa waa na gbuun,
ŋunu wre na u loplombo
pre kro we pe fɛndrahaa,
mbe leele jaa sɛ ndra pe jaara.
Pie pe na lafolo nyumu ŋga ki fuu,
na tro fimi tra nu yi,
mbe pe na dnɛ kpɔɔ titi,
ŋga jaara nyimi nyi
fimi tra gbeŋglen nu yi.
3 Kre nyjila kre nu,
ndro ŋmba uu nyiɛlɛ ni kro,
we nya chasi,
a mblɛ pee ndiile ni kre,
we ndie tɛɛ mbe loo chichie.
4 A leele mblɛ pe fiɛlɛ kee na kre,
we frɔ tɛɛ mbe kee nɔɔ loo,
a geŋgefɛɛnlɛ we paara chasi.
5 Ndro wa jijio ŋga buuro,
ndee mbe fanafun le
na kprafun wi.
6 Jijuo u jijiere kee yuu,
mu na sisam kee jawa
mbe yi pe.
Kee ŋga we pe,
na kee ŋga we yo kro,
pe kafinɛ kee mu wru,
o Tafun Nyiɛkpɔɔ haa.
A wra ŋmba klo ta,
wre ŋga yaka mbe u ka,
mbaa yo nyumu we u ŋga,
mbe u gbɔ kple.
7 Lewo ndrasheleefun kpan,
sisam kee u jawa mbe pe
nyjila kro nu,
jawala u chaa,
mbe shianfun dɔɔya,
a wa ti mbe u ŋga,
ki fna na u ni ta.
8 La, lewo buurofun kpra lii,
a u yire gbiŋmbi,
kee ŋga ki fraka kro nu.
Jerusalem Chiɛlɛ
9 Yire chiɛlɛ mblɛ tnimu ki pe,
e pan foofoo, a e eyɛ ta,
a yaka n na e tɔɔra kre,
e kee ŋga mbe yo ŋga loo.
10 Fuŋgaami kee kro nyu mu e ŋga,
la, yelibaŋga imi nyu,
na e sɔɔnrɔ ku. Ŋgi na hin?
Tre sɛnyi wa sɛ,
a e seele kro we kla.
11 E tnimu pe foofoo mu e ŋga,
a yaka n na e tɔɔra,
la, fuŋga rɛ, e ti mbe fiɛrɛ e yii,
mbe e na seeri.
E e yonyi knumu e wa,
e yokunumɛɛ pɔ pɔ sɛlɛ.
12 E ti mbe fooro kpɔɔ e yii,
mbe e na gbun frɛ. Ŋgi na hin?
E trɛ tɛɛn,
na e tre sɛnyi seele yire we kla.
13 Wuuro, na nyaa sisɛɛ,
we ni leele tra kre kro shɔ
mbe ta.
E nyɛni, ŋgi na hin?
Kalonyi nyjɛ nu ni leele
naa yɛshɔɔrɔ lii,
na kakpɔɔ ŋga nu,
yɛliire na nyi kre kro kla.
14 Hali pe ŋunu katoo,
na mboo ŋga pe sin,
mu ki fɛ mu kun kro,
pie fɛ mbe yi ti waara.
A nyuŋgo gedeŋge ŋga pe sin,
ndro na yire ki na,
na chia kre sri kre,
ndro wa pe ki nu na.
Kakpɔɔ kre we kaari kataa,
mbe mu.
Nyaa lamu bubunlɔ,
we na kila wa yɛshɔɔrɔ ni,
a bawa mbaala we na kaa.
15 La, na Nyiɛkpɔɔ waa ndru,
mu o ŋga u ŋmaa fɔŋgɔ,
fimi tra waara kre we ndru,
mbe kaari tataan,
mbe ki seele yirɛ ndru
mbra nyɔɔ.
16 Na ki waa pan ma,
frakaa na kpralie we pe,
tra kre kro nu.
17 Ŋga ndro kro,
we na kefrakaa pini kre na,
wejinyiŋge we pan,
a ndro we na kaan u ŋmbrɔ na,
nyjila kro nu.
18 Kee ka wa,
na Nyiɛkpɔɔ leele pre tɔɔra,
a wejinyiŋge we pe pe kalonyi nu,
a yaka wa ja mbe pe ta.
19 Hali na nyiɛsubie wo,
mu klɔ kre na kakpɔɔ kre kla
mbra e yirɛ ndru,
lafooloe mbɛɛlɛ na,
mbe e nui na e bubunlɔ lawee ta,
mbra kaa.