Nyiɛkpɔɔ We Kɛ Tɔ Jerusalem Na
31
Leele mblɛ pe chaa,mbe Egypt tra leele ya pe na
kre, pe atɛ.
Pre pe peyɛ wru mu taa
Egypt soolo,
na pe sookɛɛ,
na pe ŋunɔwifɛɛnlɛ na.
La pe n na kaan
O Tafun Nyiɛkpɔɔ,
Israel Nyiɛkpɔɔ cheche wre na,
mbe u ya pe na.
2 Wre Nyiɛkpɔɔ u chin
kala ŋga u pini.
Wre u lawee klai,
a kee ŋga u yo na we leesaala,
na mblɛ pe kɛ toni pe na
pre pe kre, u ki pini.
3 Egypt leele pre n pe Nyiɛkpɔɔ,
la, leweele lɛ.
Pe soolo pre n peyɛ na soolo,
mblɛ o nyaa nyibie na ŋga ni.
Na o Tafun Nyiɛkpɔɔ u kɛ yire,
ŋmba we ya wa na wre we gbro,
mbe ŋmba na pe yaa wre to,
mbe pe kro shiin kla.
4 O Tafun Nyiɛkpɔɔ na yo ni pan mbo,
“Imi na mbaala lefɛɛnlɛ,
we koklomi le mbe da kpan,
pia ja mbe jira piɛri mbe laa,
yurɔ ŋmba u gbo mbe ka na.
Pan chɔɔ yaka wa ja mbe mi,
e Tafun Nyiɛkpɔɔ Jaŋgafun wre,
tɔ kolo mbe mba wi,
mbe Zion nyua kre shɔ.
5 Imi na hanyini feni,
na u zeere kuun na u biile siri kre,
pan chɔɔ mi e Tafun Nyiɛkpɔɔ,
Jaŋgafun wre we kɛ tɔ
Jerusalem na,
mbe wi mbe ki shɔ.”
6 O Tafun Nyiɛkpɔɔ yo mbo, “Israel leele, e ni je mu laa ni na, la, e ndru e pan ni pan. 7 Nyjila kaa wa na paan mbe e kro e sɛɛnlɛ nyjɛ e swanyiɛ, na swafiŋge tɛɛ mu pe, a yi pe sisam yirɛ yire koli mbe sɛ wa.
8 Assyria waŋgra we wi,
mbe to ŋunɔ,
la, lewo jaŋga kolo na ma.
Leele pre we na chaa mbe fɛ,
mbe shɔ, la, pie pe yii,
mbe sɛ pe pe tinlɛ.
9 Yira ŋga na pe kaan kro,
we pe waara,
a fiɛrɛ kpɔɔ we ti mbe pe
ŋunɔwifɛɛnlɛ loplombo fɛ,
mbe pe ŋunɔ flaŋgaa ti.”
Kee ŋga o Tafun Nyiɛkpɔɔ,
ŋmba pe sumi Jerusalem na,
a u sra wɔɔ kanhun na nyini wa,
wre yo yi kre.