Nyu Nunu Waara Pee
30
O Tafun Nyiɛkpɔɔ paara mbo,“Judah ŋulo atɛ, ŋgi na hin?
Pe yiri mu ni taan.
Jawala nyjɛ yi n yiri ni pan,
na pe taa.
Mu na nyu nunu nyjɛ yi n tna,
ni pan pini na leele ni,
na sisam pini na yaa sisam na.
2 Pe shie na Egypt leele tali,
mbe pe pan mbe ya pe na,
a pia ni wie
mbe ni pe ŋga jawala.
Egypt ŋunu na pe kaan,
mbe u kɛ tɔ pe na.
3 La, ŋunu wre wa faŋga ta,
mbe ya pe na,
we ti mbe nyifɛɛrɛ pe gbo.
4 Kii wa na pee loplombo ni,
Zoan chia kre na,
a pe bitumblɔ pre da, Hanes na.
5 Nyifɛɛrɛ we Judah leele kro gbo.
Ŋgi na hin?
Egypt waŋgra kre wa ja
mbe ya pe na kolo ka na,
kie Judah leele yiɛ le nyumu.”
6 Nyiɛkpɔɔ kee ŋga u yo,
Mu wru yurɛ mblɛ pee wa,
fimi tra ŋga kii wa,
na shie nyjeeri haa kre yi kre.
Judah waŋgra loplombo pre
tro tra ŋga nu kanyana,
na fnaa nyi nu,
jirae bilɛ, na chiɛlɛɛ wa
tra kre nu,
a pan foolo mblɛ pe yirii nyjeeri,
na wɔɔlɔ sisɛɛ wa ki nu na.
Loplombo pre yirɛ
ndrɔ shelee pɔpɔ,
mu taa taa pe bubunlɔ,
na pe nyuuma na,
na shie mbe sɛ waŋgra ŋga kia ja,
mbe ya pe na kre ŋga.
7 Yaa ŋga Egypt leele we ya
Judah na kre,
wa ja mbe pe pe yaka.
Ki tia ni Egypt mɛɛ tɛɛ Rahab,
ki nɔɔ yi na, wa ja mbe yaka pe.
Leele Ndikambla Pre
8 Nyiɛkpɔɔ na yo ni pan na,
ni mi na leele pre nyi, kee nyunɔ,
mbe le hlɛ ka nu,
mbe ki ti pe sisam kee nyjɛ pe pini,
yire pe dansiɛrɛ kee,
mbe pe taan nyjila kro nu.
9 Pre leele mblɛ pe yiri,
na Nyiɛkpɔɔ taanla
nyjila kro nu,
na kala fnɛ nyjila kro nu,
a pan pe je mu na ndikana pini,
o Tafun Nyiɛkpɔɔ nyu kee
kre na.
10 Pe yuu Nyiɛkpɔɔ keenyanyofɛɛnlɛ pre pan, na pe pe nyu tɔ. Kee ŋga pe yuu yi mbo,
“O n na kee nyjɛ yi fraka
yire ka chaa mbe loo na.
E na kee nyjɛ yi tna o pan
yire chiin yuu o pan,
hali na kafinɛ kee yi,
oo ndie tɛɛ.
11 E flo o yiɛ, yaa kolo tɔ o na.
O n na e Israel Nyiɛkpɔɔ,
cheche wre, kee chaa mbe loo.”
12 La, kee ŋga Israel Nyiɛkpɔɔ, cheche wre yuu yi kre mbo,
“E ni nyu kee je,
mu eyɛ wru mu taa leele fiŋgee,
na kafinɛ kee na.
13 E pimi li,
pan e nyi na mboo gedeŋge,
ŋga ki twan mu tii tra yi,
kia mu mbe e to.
14 Ee to mbe juari,
na chɔ to mu juari,
a ki juarɛɛ yire ka wa ta,
mbe ja mbe kanhun wɔ gbunu,
mbaa yo nyumu kie ja mbe ko.”
15 Kee ŋga o Tafun Nyiɛkpɔɔ, Jaŋgafun, Israel Nyiɛkpɔɔ cheche wre yuu u leele pre pan yi kre, mbo,
“E ndru e pan ni pan,
e dankna ni na, e ni shie,
mbe ni e ŋga ŋmaa.”
La, e je, a e n ndru
mu pan ni pan.
16 E na yo na ee nduu soolo
mblɛ pe feni na,
mbe fɛ mbe shɔ e loŋgoolo yiɛ.
Kpra yi, kee ŋga ki fna e pe yi na,
ee fɛ mbe shɔ.
E jawa na e soolo pre we ja mbe fɛ,
la, mblɛ pe e nini pre we fɛ,
mbe wɛ e soolo pre na.
17 Na e kagbeŋge e loŋgoolo pre,
ŋunɔwifun nunu chom nya,
ee fɛ u yiɛ.
A pe ŋunɔwifɛɛnlɛ pre kunɔ
gbi da,
mbe ti mbe e kro fɛ.
E ŋunɔwifɛɛnlɛ pre yaka wa kro,
na flaŋgaa chleŋge ŋga kie kro,
mbe kan nyua na bɔkɔ.
18 Ande o Tafun Nyiɛkpɔɔ wa,
na e siri mbe nyu e na,
mbe u e fooro le, ŋgi na hin?
Kee ŋga ki fraka u pini
nyjila kro nu.
Mblɛ pe kaan o Tafun
Nyiɛkpɔɔ na,
pre wo yi dwamu.
Nyiɛkpɔɔ We U Leele Dwan
19 Yire Jerusalem leele, yaa nyɛni na. O Tafun Nyiɛkpɔɔ wre pe foorochinfun, a na e nyɛni mu u yeeri we shɔ e pan. 20 Nyiɛkpɔɔ we ti mbe nyjila shelee e da, la, wre titi we pe e nyinafun, a yaa u haa cha na, ee u nya na nyibie ni. 21 Na e u kolo kre wa, mu tro kalie, ndee kamɛŋɛ kre, ee u mana loo na u yuu e pan na, “Kolo kre yi kre, e taa ki na.” 22 Ee e sɛɛnlɛ nyjɛ na e swafiŋge, na swanyiɛ nya mu wo yire bali mbe sɛ yi wa imi na pe paari kɔla waa kre, mbe yo yi pan na, “E flo o yiɛ na.” 23 Nyjila ŋga nu ee yirɛ luu kro, o Tafun Nyiɛkpɔɔ we ti mbe nyiɛ pan mbe wo yi na, mbe ti yi lɛ, mbe sɛ tataara. A e pɔɔri yurɛ we nyaa ta tataara mbra kaa. 24 A nui, na bubunlɔ mblɛ pe seele jee kre we nyaa chichie ta mbe ka. 25 Ŋga ble pie leele tataara gbo, mbe pe nyinyi gedenyi yire juari kre, nyumu we na fuu mbra yilii nyuɛ, na nyambie kro nu. 26 Yeŋge we na chiɛnri na yila yi, mbe yila na chiɛnri ma gbee kɔɔnashin. Pan kie pe na ble kɔɔnashin yila yi chaa mu yili ble nunu. Yire kee nyjɛ krɛrɛ we pe, ble ŋga na o Tafun Nyiɛkpɔɔ we u leele pre gbuun ŋga wra pe gbun a pe laala kre klɛ yire pɔ pe pan, mbe pe tra.
Nyiɛkpɔɔ We Assyria Ndie Tini
27 E le, O Tafun Nyiɛkpɔɔ wre
yiri haalee na paan,
a u krɔ kun kpɔɔ,
a wree kpɔɔ ka kun.
A na u paara,
u nyu kee sroi na kanhun yi.
28 U tia fuflɛ yiɛ klu u pan,
mu pe imi na lɔɔ nyini,
mbe yira kro fo mbra shie kre.
Ki waŋgrɛ pɔ mu yi kla,
mu tia kefuɛn nyjɛ leele jawa
kro nyu to.
29 La, yire Nyiɛkpɔɔ leele,
e yiɛ we shɔ, mbe e mɛɛ kɔ,
imi na e ble lie cheche yire lii,
mbra mɛɛ koni blee kre.
E yiɛ we shɔ, na leele mblɛ
pe nyaari mbra bnɔɛ foo,
mbra mɛɛ koni mbra shie,
o Tafun Nyiɛkpɔɔ ŋmba u kɛ toni,
Israel leele na wre Suminyuŋgo.
30 A o Tafun Nyiɛkpɔɔ we ti,
mbe ndro kro u
mana kpɔɔ kre loo,
mbe jaŋga ŋga kii wa,
u krɔkuɔn nu kre gbra kun,
mbe u krɔ ŋga ki nyini,
na kanhun yi,
mu na paan na nyiɛ yi na tuanri,
mbe nyiɛsubie na woni,
mbe fuflɛ na gbuun kpɔɔ kre nya.
31 Na Assyria leele pre waa o Tafun Nyiɛkpɔɔ wre mana loo,
maa u ndie tiniɛ kre gbra kun,
fiɛrɛ kpɔɔ we pe yii.
32 Nyjila ŋga nu o Tafun Nyiɛkpɔɔ we na Assyria leele pre gbuun kre, na u leele pree wa na binyi, na juru gbuun. Nyiɛkpɔɔ wre titi we wi na Assyria leele pre ni. 33 Nyiɛkpɔɔ lawee ŋga nu we Assyria ŋunu wre sro gbeele mu tɛɛ fuŋga ma. Lawee kre vala, mu jio, a pe kenyi chrɔ ki nu. O Tafun Nyiɛkpɔɔ wre we kanhun ŋu mbe wo yi na mbe yi nyi.