Jerusalem Kee
29
Jerusalem ŋga yi Nyiɛkpɔɔ sragbunu kre, ki atɛ.Kakpɔɔ ŋga na David na tni kre kla.
Yɛlɛ we sɛ mbe pan,
na ki ble kpɔɛ lie,
na ki sukpɔɛ pee yiree wa,
2 a mi Nyiɛkpɔɔ we ti,
mbe kanyana pan,
kakpɔɔ ŋga pe yeeri,
Nyiɛkpɔɔ sragbunu kre na.
Pie na nyɛni, mbra gble leni,
mbe kakpɔɔ kre kro pe ni pan
na sragbunu yi.
3 Mi Nyiɛkpɔɔ we wi
na kakpɔɔ kre ni,
mbe ki fɛ mbe kun,
mbe yirɛ tɛɛ ki mboe na,
nyjɛ na leele we nduu,
mbe le chia kre na.
4 Jerusalem we pe,
na legboo ŋmba u wii,
na chaa mbe yire u faŋga nu,
mbe paara wi.
Pan u mana we na yilii fiɛn tra.
5 Jerusalem,
mu loŋgoolo tataara pre,
we pe na bloŋgo yi mbe fun,
a pe ŋunɔwifɛɛnlɛ mblɛ kee,
kii fiɛrɛ ni pre we pe na,
fuflɛ yirɛ fue wru,
mbe ki lewo fo.
6 E Tafun Nyiɛkpɔɔ Jaŋgafun wre,
we nyiɛtwanraa, na tra seeree,
na fuflɛ kpɔɔ, na kanhun kpɔɔ,
ka tɛɛ mbe e shɔ.
7 A waŋgrɛ nyjɛ kro ŋunɔwifɛɛnlɛ,
we pan mbe wi na kakpɔɔ,
ŋga na Nyiɛkpɔɔ sragbunu nyi
kre ni,
pe ŋunɔ wi yirɛ,
na pe yirɛ kro we fun,
na ŋunɛ pe ŋunu blee
mu yira nya,
mbe yiri mbe ki cha mbe la.
8 Waŋgrɛ nyjɛ yie nyu pe nunu,
mbe sɛ wi Jerusalem ni kre,
we pe na lewo ŋmba klo kuu,
a u sni mu ŋunɛ ŋunu,
na u sro ta na lii,
la, ŋga u fo mu nyi kre,
na klo wa mu u ta tɛ,
ndee lewo ŋmba gbɔɔ ta,
a u sni mu ŋunɛ ŋunu,
na u nyumu ta na gboo,
ŋga u fo mu nyi kre,
na u lagboo jaara
wa mu yuwa tɛ.
9 E na jijiere lii ma rɛ.
E eyɛ pe na fuunlo lɛ yire.
E pe na e gbɔ mu to,
ande simi ma e gbɔ.
E fuula, ande e n simi gbɔ.
10 O Tafun Nyiɛkpɔɔ wre,
u e nyiɛlɛ tɔ,
mu tia e sni na ŋunu kpɔɔ.
Kaa Nyiɛkpɔɔ keenyanyofɛɛnlɛ
pre lɛ leele pre nyiɛlɛ,
la Nyiɛkpɔɔ pe nyiɛlɛ pɔ mu tɔ.
11 Kee nyjɛ Nyiɛkpɔɔ keenyanyofɛɛnlɛ pre we nya mbe yo e pan yire kro nɔɔ we ndra e na. Pan kie pe na yurɔ hlɛ ŋga na pe nyunɔ mu yira tɛɛ mu ki nyu yii yi, na mu ndro ŋmba we jaa ki tɔɔnri mbe mu nyina ŋga ki yi, we yo mu pan na wa ja mbe ki tɔɔnri, ŋgi na hin? Na pe ki nyu yii na yira ni. 12 A na mu ndro ŋmba wa ja mbe tɔɔnri ŋga ki yi, we yo na, ni n tɔɔnri mu chin.
13 Ki tia Nyiɛkpɔɔ yo mbo,
“Leele mblɛ, ni mɛɛ pe yeeri,
a nde pe n na ni kee chaa
pe lolonyi nu.
Finfin pe ni sumi. Ŋgi na hin?
Lewo paala kolo,
nyjɛ pe pe nyina yire,
na pe tro na ni sumi.
14 Ki tia mbe kawako kaalɛɛ pe
pe nu,
mbe yi pe fo mbe taala,
mbe ki ti kachimblɛ kaari jijiele,
mbe jawalafɛɛnlɛ jawala fun
pe ndra.”
15 Leele mblɛ, pe kee nyjɛ pe jawa,
mbe pe na ndrai o Tafun
Nyiɛkpɔɔ na kre, pe atɛ.
Ndra pe ndrai na pe kaalɛɛ pini,
mu na jawa na ndro n na pe nyaa,
a ndro n chin kee ŋga pe pini.
16 Pe kee kro ndra kna mu soo.
Chɔ faanrifun na choo ŋga
ni pe chɔ faanri kre,
ŋgi kee ki shian titi hin?
Yira ŋga lewo gbeele we ja,
mbe yo ki gbeelefun wre pan na,
“Ŋu ma mu ni gbeele ra?”
Ndee kie jaa yo u pan na,
“Mu n kee ŋga mu pini chin.”
Baŋga Kaan Haa
17 Kia mu mbe Lebanon klɔ kre
kaari fali haa,
mbe fali ndoo kre ndru,
mbe kaari klɔ.
18 Na ki ble kre waa da,
ndikambla we loo,
na pe hlɛ ka tɔɔnri,
a fuunlo mblɛ pee wa,
mu tni wɔmu nu pre,
we nyiɛlɛ nyaa mbe nya.
19 Mblɛ pe shian na mblɛ pe
peyɛ nyjii pre we ndru,
mbe yɛshɔɔrɔ ŋga Israel Nyiɛkpɔɔ,
o Tafun Nyiɛkpɔɔ wre
kaan kre ta.
20 Leele mblɛ pe pe ŋmbilɛ fiŋge,
a pe n Nyiɛkpɔɔ le mu nya pre,
na sisampefɛɛnlɛ kro we ku.
21 Nyiɛkpɔɔ we kabaarafɛɛnlɛ
kro kla,
mblɛ praa kolo ŋga,
mbe pe linkufɛɛnlɛ ndie tini kre,
na mblɛ pe tro kafinɛ kolo na,
na kpra fɛɛlɛ pre, we pe kla.
22 Ki tia o Tafun, Israel Nyiɛkpɔɔ ŋmba wra Abraham wɔ mu yili u kanyana nu wre yo mbo,
“Ni leele, nyifɛɛrɛ wa e gbo na,
mbe ki ti e ndra soo.
23 Na e waa e biile mblɛ,
mbe e ŋga pre nya,
bawa ee chin na mi wi,
Israel Nyiɛkpɔɔ cheche wre.
Ee ni ŋga buuro, mbe ni fiɛ.
24 Jijiele we kala twan,
mbe nɔɔloo ta,
a mblɛ pe taanri suwi pre,
pe yiɛ we shɔ na pie yira twan.”