28
Israel gbɔgbɔɔlɔ pre ŋujuulee ŋga ni pe peyɛ kpɔɔri kre,ki nyumu klai na toto yi, pe atɛ.
Pe yɛnyiŋge yira kre,
pe gbɔ mu to na ki ni
tra taan kre nu,
mu pe yɛnyiŋge kre kla.
2 E le, Nyiɛkpɔɔ wa na
jaŋgafun faŋgafun wa ni,
a wra paan, mbe wi na pe ni,
we pe na nyiɛsubie yi,
mbe pe na fuflɛ kpɔɔ,
ŋga ki paan na yirɛ klai yi,
we pe na nyiɛ ŋga ki paan,
mbe lawee kro nyi nyumu yi,
we pan mbe pe ŋujuulee kre
viŋge mbe wa tra.
3 A Israel leele yɛkulo,
gbɔgbɔɔlɔ pre ŋujuulee kre,
ni pe peyɛ kpɔɔri kre,
we ki taanla.
4 Pe yɛkpɔɔmu ŋujuulee,
ŋga nyumu ki klai na toto yi tra taan kre nu kre,
kie pe na fig sɛŋgɛ,
ŋga ki klu na nyinai yi,
ŋmba we klu mbe ki nya kre,
na u ki kun to nyuu we ki wa,
mbe ki jɔli.
5 Kre ble kre, o Tafun Nyiɛkpɔɔ,
Jaŋgafun wre we pe,
na ŋunu juulee chichie,
ŋga pe toto tɛɛ mu pe yi,
u leele chiɛri mblɛ pie,
kro pre pan.
6 We ŋmba u paan mbe tni,
mbe kala li wre ŋga ŋumu,
ŋga ni we kpra kun,
a wre we pe mblɛ pie yire,
kakpɔɔ kre jlonwee nyu na,
mbe wi pre faŋga.
7 Hali Nyiɛkpɔɔ keenyanyofɛɛnlɛ,
pre na srawɔfɛɛnlɛ pre kro,
gbɔ mu to na fuula.
Pe simi shelee gbɔ mu to,
a ki tia tutom wo pe na.
Ki tia Nyiɛkpɔɔ keenyanyofɛɛnlɛ,
pre n na kee nyjɛ Nyiɛkpɔɔ yo,
na pe yo yire nyaa mbe yo,
a pan srawɔfɛɛnlɛ pre gbɔ mu to,
a pia ja mbe kaalɛɛ nyjɛ yi fna,
mbe pe li yire kee ka yo.
8 Pe tuuru mu tebru nyjɛ yii wa,
mna pe jiin yire mana kro,
hali yi lawee ka n wa,
a tuuro n ki mana.
9 Pe taanri ni na na yuu mbo,
“Kena ndro ŋmbi blɔ ŋmba chaa,
mbe nyina kachindɛ ŋga hin?
Ndro ŋmbi pan u u kee kre,
nɔɔ nyinai ŋga hin?
Biile fiɛnfiɛn mblɛ pe
nyinimi kun,
pan u paara ree?
10 U kro mu na mbra leni,
na yaa mbra na,
na yuu na, pe mna chiɛri,
mu sɛ pe mna wa chiɛri.”
11 Na yaa ndie tɛɛ ni pan,
kena Nyiɛkpɔɔ we yire fumblɔ,
mblɛ pe yolo fɔnyi yɛ yuu na,
mbe paara e pan.
12 Wre wra yo pe pan mbo,
“E wuuhaa yi kre,
e ti mbe mblɛ pe fna pre wuu.”
La, e nsra ndie tɛɛ u pan.
13 Ki tia o Tafun Nyiɛkpɔɔ kee
kre we pe pe pan na mbra
u leni, na yaa mbra na,
na yuu pe pan na,
pe pe mna chiɛri,
mbe sɛ pe mna wa chiɛri,
mbe ki ti pe sɛ kro ni,
mbe sɛ to kanyjuula pɛlɛ nu,
mbe kuari, mbe pe pe ta
mbe yii.
14 Yire Jerusalem loplombo,
mblɛ e n yira kro le mu nya kre,
e loo kee ŋga
o Tafun Nyiɛkpɔɔ wre yuu.
15 “E yɛkpɔɔmu kee yuu,
na yire na kumu yira ka,
a e nyu nunu pe
na kuulo ndoo ni.
E shɔ mu li na,
na kala sisaa ka paan,
kia da e na. Ŋgi na hin?
Kafinɛ na fana kee,
na e eyɛ wru mu taa,
na yire yie ja mbe e shɔ.”
16 Fuŋgaami, kee ŋga o Tafun Jaŋgafun Nyiɛkpɔɔ wre yuu yi kre, mbo,
“E le, ni dnɛ ka tɛɛ Zion na,
a ni ki pe mu le.
Kre yi nyuŋgo jenu dnɛ,
ŋga kie ti nyuŋgo kre nɔɔ
faŋga ta.
A ŋmba we u shɔ mbe li kre,
nyifɛɛrɛ wa u gbo fio.
17 Mbe ti kpra pe na maŋa
ŋga ni pe nyuŋgo nɔɔ lehaa
kra kre yi,
mbe frakaa pe na yira ŋga ni,
pe nyuŋgo nɔɔ fraka kre yi.
E yire kafinɛ na,
mu fɛnkaari lawee sin,
ki tia nyiɛsubie na
nyumu we pan,
mbe e ndrahɛɛ yire kla.
18 Nyu nunu ŋga e pe na,
kuulo ndoo ni kre we kun,
a yira ŋga yire na kumu ka kre,
wa jaa yaka pe na.
A na kala sisaa ka paan,
kie e li.
19 Hali na kre kanyana ŋga pan
gbee mni,
ble nyini ŋga pan kie e li.”
Kee ŋga kie yiri Nyiɛkpɔɔ pan
kpan,
ki nɔɔ loo we pan
na fiɛrɛ kpɔɔ ni e nu.
20 Pan ee pe na yomini,
ŋga pra gbun mu wru,
ndro wa haa kre yi na,
u dɛŋglɛ ŋga na u sni,
pe fiɛn mu tro,
a sniyira ŋga ni u uyɛ tɔ kre,
pe fiɛn mu tro.
21 O Tafun Nyiɛkpɔɔ we yiri,
mbe wi imi na wra wi nyua,
Perazim na Gibeon,
nyua mbɛɛ tra lawee yire nu kre.
A ŋga rɛ, kre we pe kawako ni,
mbe yili ki yɛ kuraa.
22 Yaa shia kre jaaraa kee ŋga le,
na titɛɛrɛ kee yi.
Na e waa pe ma,
kie ti mbe sɛɛrɛ nyjɛ pe le,
e na yire sna mbe ya.
Ni o Tafun Nyiɛkpɔɔ Jaŋgafun,
wre jawala ŋga u wru mbe tɛɛ,
mbe waŋgra kre kro kla nya.
Nyiɛkpɔɔ Kachindɛ
23 E ndie tɛɛ,
e kee ŋga ni yuu ŋga loo,
e kee ŋga ni yuu,
e pan ŋga dɔɔ ta chichie.
24 Kre falifun n wa na we yirɛ luu,
mbe kro mbra tra jee suwi.
25 Na u ta mu bru mu kɔ,
kena u yirɛ we luu.
We yua, na bleju luu
sɔnyi yire na,
mbe yirɛ luu ki jenu na mbe tro.
26 Ŋga Nyiɛkpɔɔ u falifun nyina,
kre tnumu ŋga kre,
ki tia u ki tun mu chin.
27 Falifun na fifiire gbun
shunshun na,
la shio u yi suu mbe yi bie wɔ.
Pan chɔɔ wa boŋgrɛ gbun
na kaan ni,
kɛnyi ni we yi jiri
mbe yi bie wɔ.
28 Shɔlɔ nyjɛ nyini ni,
pe paanu pini kre,
yi gbuun n sheli,
ki tia pra yi gbun mu mu.
Chiɛri ka pie yi tuŋgo,
mbe yi bie yire wa juari.
29 Yire kachindɛ nyjɛ kro,
o Tafun Nyiɛkpɔɔ Jaŋgafun wre,
pan yi yiri,
a nyjila kro nu,
kachindɛ jawala u wrui,
a yi kro nyɔɔ.