O Tafun Nyiɛkpɔɔ We Israel Shɔ
27
Ki ble kre, O Tafun Nyiɛkpɔɔwe u brɔfiɛn ŋunu,
ŋga ki pe fiɛrɛ ni,
mu kpɔɔ, mu faŋga ni kre tɛɛ,
mbe wɔɔ badaaŋga,
ŋmba u ŋmaala,
mu glɔma wre ndie tini,
a we epo wɔɔ badaaŋga wre gbo.
2 Kre ble kre,
O Tafun Nyiɛkpɔɔ we yo mbo,
“E na e tre sɛnyi see kre le,
e na mɛɛ koni.
3 Mi e Tafun Nyiɛkpɔɔ wre,
ni ki le na nyumu woni ki na,
mi ni ki le lafo na blee,
mbe ndro wa ki pe yaka.
4 Ni krɔ ma ki kun,
na tre sɛnyi see kre ni.
Na kra pe na wuuro,
na mbrambra yɛ ni mbe wi,
kaa mbe na yi sro peii.
5 La, na ni leele pre loŋgoolo,
pre chaa mbe ni kɛ tɔ pe na,
kena pe pan mbe mi,
na pre tni wejinyiŋge nu.”
6 Ble yɛɛ wa na paan,
mbe Israel leele,
mblɛ lɛ Jacob nanae
pre didinyi kan,
mbe pe na tiŋge yi
mbe totoe pe, mbe sɛ tataara,
mbe waŋgra nyi.
7 O Tafun Nyiɛkpɔɔ n da,
mu Israel leele gbun,
a ki da na mblɛ pe Israel leele,
pre gbuun pre ni tun,
a u n da mu Israel leele pre gbo,
imi na u mblɛ pe pe kuu
pre kuu kre.
8 O Tafun Nyiɛkpɔɔ wre u tii,
mbe pe leele pre yii ŋunɔ,
mbe sɛ na pe ni haka,
pan ki nyi to na fuflɛ ki gbun,
mu yiri yila finhaa,
mu pan mu pe wru mu sɛ.
9 Israel leele we sisam tinkɛɛ ta,
na pe ja mu sɛɛnlɛ
sragbuɛnlɛɛ yire juari,
mu yi tre mbruru na mbuu yi,
mu sɛɛn chlɔ Asherah kɛɛn yire,
na tuwe ndiom tɛɛn
sragbuɛnlɛɛ yire kro kla wala.
10 Kakpɔɔ chichie kre kaari kajaa.
Kii wa mu sni,
na fimi tra waara kre yi,
mu pe na nui kahaa yi,
na lawee ŋga nu pe sni,
mbe wuu, mbe yiri,
mbe ki tinyi klɛ wrɛ ka peii.
11 Tinyi yire klɛ wrɛ nyaara mu wo,
mu kuari, a chiɛlɛ yi koli,
mbe sɛ gbɛɛri. Ŋgi na hin?
Ŋga leele pre n naa kala nɔɔ ndru, kre ndra na,
Nyiɛkpɔɔ, ŋmba wi pe gbeelefun wre wa pe yiɛ le,
mbe pe fooro chin.
12 Kre ble kre, O Tafun Nyiɛkpɔɔ,
we yire Euphrates lɔɔ kre na,
mbe u leele yoori nununu,
mbe sɛ su Egypt sam na,
pan kie pe imi pe yua gbuun,
mbe yi fue wɔ yi yɛ kre.
13 Na ki ble kre waa da, bnɔ kpɔɔ ka we tin mbe Israel leele mblɛ pe kuu na fɔɔn Assyria tra nu, na mblɛ pe yii ŋunɔ mu sɛ Egypt tra nu pre kro we pan mbe o Tafun Nyiɛkpɔɔ wre sumi Jerusalem na, nyua cheche kre na wa.