Nyiɛkpɔɔ Leele We Wi Mbe Yili
26
Kre ble kre, pie kre mɛɛ ŋga kɔ Judah tra nu mbe yo na,Faŋgaa wa o kakpɔɔ ŋga nu.
Nyiɛkpɔɔ wre titi,
u o kakpɔɔ kre fɛ mu kun,
a wre u ki ŋga ŋmaashɔmu.
2 E kakpɔɔ kre jlonwee nyu krɔɛ
yire nyaala,
mbe waŋgra ŋga leele,
mblɛ pe kpra lii pre pan mbe le.
3 Ŋu o Tafun Nyiɛkpɔɔ,
mblɛ pe mu kee jawa
nyjila kro nu,
mu na kaan mu na kre,
mu pe kaan wejinyiŋge titi.
4 E dankna ta o Tafun Nyiɛkpɔɔ wre na nyjila kro nu.
Ŋgi na hin?
Wre wi Dnɛ kpɔɔ ŋga,
kii wa nyjila kro nu kre.
5 Mblɛ praa peyɛ kpɔɔri pre,
u tia pe peyɛ nyjii,
a u pe kakpɔɛ,
nyjɛ nu pra nyi yire kla,
mu tia yi mboe yire juari,
mu wo tra.
6 Mblɛ praa fiŋge kre,
pre pe nyaari
na tro yi na fuŋga.
7 O Tafun Nyiɛkpɔɔ,
ŋu mu frakafɛɛnlɛ,
kolo gbeele pe pan,
a ki pe mbrɛrɛ.
8 O na yire,
mna mu kprakuɔn kre shie,
o chaa mbe ndro kro mu mɛɛ,
na mu kpɔɔrɔm nya.
9 Na ble wɔ, mu la ni nyiɛ ta,
a na nyiŋge se,
ni ŋumu mu haa chaa,
a na mu waŋgra ŋga,
na ki leele kpra kun,
kie ti mbe pe frakaa kolo tuan.
10 Kii wa na mu sisampefɛɛnlɛ dumi,
ande pe n na chaa,
mbe kefrakaa pe.
Hali leele mblɛ pee wa
frakafɛɛnlɛ tra nu kre,
pe je na sisam pini,
pe n na chaa
mbe mu kpɔɔmu le mbe nya.
11 O Tafun Nyiɛkpɔɔ,
mu mu jaŋga kre nyina,
la, pe n ki nya.
Ti pe imi na mu mu leele kori,
mu da kre nya,
mbe nyifɛɛrɛ pe gbo,
ti mbe kanhun ŋga mu tɛɛ,
na mu loŋgoolo sri kre pe shɔ.
12 O Tafun Nyiɛkpɔɔ,
mu tia o wejinyiŋge ta,
o tnimu nu.
Yira ŋga o ja mu pe kro,
ŋu mu yi pe.
13 O Tafun Nyiɛkpɔɔ,
tafɛɛnlɛ plɛ da
mu ŋunumu li o na,
la, ŋu chiin
wi o Tafun Nyiɛkpɔɔ.
14 Fuŋgaami, pe kro ku,
a pia nyi na,
a pe gboolo wa yiri na.
Ŋgi na hin?
Mu pe ndie tini, mu pe kla,
a ndro wa pe sɔɔnri na.
15 O Tafun Nyiɛkpɔɔ,
mu tia o waŋgra kpɔɔ,
mu vala mu sɛ ki kokoe kro na,
a kre kee ŋga mu ŋga yɛnyiŋge.
16 O Tafun Nyiɛkpɔɔ,
mu mu leele ndie tini,
a pe kanyana nyjila nu,
pra yɛjeere tɛɛ mna mu tali.
17 Ŋu o Tafun Nyiɛkpɔɔ,
mu tia o nyɛni,
imi chlɔ siirefun nyɛni,
u se nyjila kre.
18 Biseere wejiwrɛ nu o na nyi,
ande o n se mu ta.
O tra ŋga leele n da,
mu wi mu yili tun.
19 O leele mblɛ pe ku,
pre we nyi na.
Pie yiri na pe wejikaara ni.
Mblɛ pee wa mu sni,
pe fanyi nu kre,
we yiri mbe yɛshɔɔrɔ mɛɛ kɔ.
Imi na mɛŋɛ woni tra na,
mbe ki nyu kre,
pan o Tafun Nyiɛkpɔɔ,
we mblɛ pe ku fafa
pre nyi na.
20 Ni leele, e sɛ le e kalonyi nu,
e krɔɛ tɔ eyɛ na.
E eyɛ ndra nyjila chiɛri,
mbe sɛ su na
Nyiɛkpɔɔ krɔ kɔɔn kre
we tro tun.
21 O Tafun Nyiɛkpɔɔ yiri
u tni haa wa nyjeeri na paan,
mbe waŋgra ŋga leele
ndie tini pe sisam na.
Linku kee nyjɛ yi da mu pe
tra ŋga na mu ndra kro,
we yili fimi na.
A tra wa ja mbe mblɛ pe gbo,
mu le pre ndra na.