Mboo Ŋgaa Mɛɛ
25
O Tafun Nyiɛkpɔɔ,ŋu wi ni Nyiɛkpɔɔ.
Mbe mu kpɔɔ, mbe mu ŋga mɛɛ.
Mu kawako kee pe,
mu fraka kee nyjɛ mu jawa,
mu tɛɛ fa na mu yi pe kre pe.
2 Mu tia kakpɔɛ kaari kajɛɛ,
mu mboe nyjɛ pe sin,
mu pe chiɛ yire fɛ mu kun,
yire kro kla,
ŋulo kalonyi nyjɛ o loŋgoolo,
na sin yire kro n wa,
a waa yi nya na.
3 Ki tia waŋgrɛ nyjɛ yii jaŋga ni,
yire leele we mu ŋga mɛɛ,
waŋgrɛ ndra shelifɛɛnlɛ pre,
kakpɔɛ yire leele we mu fiɛ.
4 Ŋu shianfɛɛnlɛ, na pɔlɛfɛɛnlɛ,
fɛ mu pan mu kaari,
a mu pe shɔ
pe kanyana nyjila nu.
Mu kɛ tɔ pe na,
fuflɛ sisaa ŋga ki pe waa kre na,
mu nyimi wo pe na.
Yila ŋga ki pe sroi kre ndra na.
Loŋgoolo ndra shelifɛɛnlɛ,
o tɔ na koo nyjila fuflɛ,
nyiɛ wru na woni mboo na,
5 pan pe nyi na,
fimi lawee yila wrɛŋgɛ yi.
La, ŋu o Tafun Nyiɛkpɔɔ,
ŋu mu o loŋgoolo pre nyu nyiŋge.
Leele ndrasheleefɛɛnlɛ pre,
mu tia pe gblee nyu ku,
imi na tlo nyimi woni,
yila wrɛŋgɛ na kre.
Nyiɛkpɔɔ O Shɔ
6 Nyua Zion ŋga na o Tafun,
Nyiɛkpɔɔ Jaŋgafun wre,
we sukpɔɔ taan ka pe,
mbe waŋgra ŋga leele kro ŋga.
Kre ble kre leele we sro taan,
na simi chichie gbɔ.
7 Kre nyua ŋga na we fooro yonyi,
nyjɛ yi waŋgrɛ kro leele tɔ,
yire laala mbe wa.
8 O Tafun Nyiɛkpɔɔ Jaŋgafun,
wre we kumu jaŋga gbo,
ndro wa ki nya na.
We ndro kro yetunyi tlu u nyiɛlɛ,
a we nyifɛɛrɛ nyjɛ yi u leele kuu
yire wɔ,
mbe yili tra na.
O Tafun Nyiɛkpɔɔ wre u ki yo.
9 Kre ble kre, leele we yo mbo,
“O Nyiɛkpɔɔ wi kre.
Wre na o na dankna, a u o shɔ.
Wre wi o Tafun Nyiɛkpɔɔ wre.
Wre na o na dankna,
a ki tia fuŋgaami, o yiɛ shɔ kpɔɔ.
Ŋgi na hin? U o shɔ.”
Nyiɛkpɔɔ We Moab Leele Ndie Tini
10 O Tafun Nyiɛkpɔɔ kɛ tɔ Zion na,
la, we Moab taanla,
mbe mbra tra,
imi na pe nyaa taanla,
mbe chaa nafre nu kre.
11 Pan pie kɛnyi nyaa,
imi na na ndro blu,
mbe u kɛnyi nyaa kre.
Nyiɛkpɔɔ we ti,
mbe pe kpɔɔmu nyu to,
mbe u pe tre tra.
12 Mboe gedenyi nyjɛ pe sin,
mu Moab fɛ mu kun yire,
we yi juari mbe wo tra,
mbe yi kaari bloŋgo.