Nyiɛkpɔɔ We Waŋgra Leele Ndie Tini
24
O Tafun Nyiɛkpɔɔ paan mbe waŋgra ŋga kla, mbe ki sni ma waara. We tra ŋga yiɛ kna mbe juule, mbe ki leele kro gbun mbe nyina.2 Srawɔfɛɛnlɛ na leele pre,
tinlɛ na pe tafɛɛnlɛ,
tnichiɛlɛ na pe tafɛɛnlɛ,
lɔfɛɛnlɛ na prɛfɛɛnlɛ,
mblɛ pe leele jini,
na mblɛ pe jini pe pan kro,
swafɛɛnlɛ na shianfɛɛnlɛ kro,
wa wa jaa fɛ,
mbe shɔ u kɛɛ ki ble kre.
3 Waŋgra ŋga kro we kla,
mbe sni waara.
O Tafun Nyiɛkpɔɔ u ki yo.
4 Tra ŋga we fooro li,
a ki yirɛ kro we yuwa.
Tra ŋga yira kro we kla,
mbe ki lekpɔɛ kro kla.
5 Tra ŋga leele ki tɔ,
na nɛɛrɛ ni,
ŋga pe Nyiɛkpɔɔ mbra yire taan,
mu u nyu nunu ŋga wra pe,
mbe kra tni nyjila kro nu
kre kla kre ndra na.
6 Ki tia Nyiɛkpɔɔ tra ŋga sun.
A ki tnifɛɛnlɛ na pe pimi,
ŋga pe li kre kanyana nyaa.
Ki tia leele pre shɔ,
mu kro chiɛri plɛ.
7 Tre sɛnyi nyjɛ ni pe simi pini,
yire nyaara,
a simi gbɔwo kee sheli.
Ndro ŋmba yiɛ kra shɔ fa kre,
u yiɛ je fuŋga.
8 A yɛshɔɔrɔ mɛɛ nyjɛ praa koni,
na binyi, na juru gbuun,
yire nyu ku.
9 Sigbɔɔrɔ mɛɛ kɔɔ yire nyu to,
a simi n tna ndro nyu na na.
10 Kakpɔɔ kre yiri mu paari poŋgo,
a leele krɔɛ tɔ peyɛ na,
pe kalonyi nu,
mbe ndro wa jaa le pe kro.
11 Leele gble na tro lete na,
ŋga simi gbɔwo n wa,
kre ndra na.
A yɛshɔɔrɔ fɛ mu fun,
tra kre kro nu.
12 Kakpɔɔ kre kaari kajaa,
a ki jlonwee nyu krɔɛ yire
kuari mu wo.
13 Kre kee ŋga we pe,
waŋgra kro nu tra ŋga na.
Pan kie pe na yirɛ kunyjila yi,
mbe pe olive tinyi sɛnyi gbun,
yi tinyi na kro mbe wo,
ndee imi pie tre sɛnyi kun,
mbe chiɛri yɛ kro tiŋge kre
na kre.
14 Mblɛ pie kro pre,
we yɛshɔɔrɔ mɛɛ kɔ.
A pe mblɛ pee wa,
na shie yila to haa,
pre we o Tafun Nyiɛkpɔɔ,
kpɔɔmu kee yo.
15 A mblɛ pee wa yila fin haa,
pre we u ŋga mɛɛ.
Leele mblɛ pee wa,
mu tni epo nyu na,
pre we o Tafun Israel Nyiɛkpɔɔ
wre ŋga mɛɛ.
16 A leele mblɛ pee wa mu tni,
haalee yɛ nu pre,
oo loo na pe mɛɛ koni,
mu na Nyiɛkpɔɔ
ŋmba u fraka, wre kaan mɛɛ.
La ndaa yo na, “Mi wo kɔ.
Kaan haa n wa ni pan na,
leele mblɛ pe ni woni na kaan,
pre n na laari ni kro,
fuŋga kuraa pe ni woni
na kaan na yaa.”
17 E kro e loo ni pan,
fiɛrɛ na weele,
na pɛɛlɛɛ wa na e sri.
18 Ŋmba fiɛrɛ we ti,
mbe wra feni wre,
we to wee nu,
a ŋmba we yo we yili,
wee kre nu kre,
we sɛ to pɛlɛ kre nu.
Nyjeeri we nyaa,
na tokro pe nyaa,
mbe tra seeri,
mbe sɛ su ki nɔɔ na.
19 Tra we twan, mbe yɔɔlɛ,
mbra seeri kpɔɔ.
20 Tra ŋga we fuula na gbɔgbɔɔ wi,
mbra teele na fuflɛ le pata nu.
Waŋgra ŋga sisam wɛ ki na,
ki tia kia ja mbe yiri na.
21 Kre nyjila kre,
o Tafun Nyiɛkpɔɔ we jaŋga,
nyjɛ yii wa nyjeeri,
na tra ŋga ŋulo kro ndie tini.
22 Nyiɛkpɔɔ we ŋulo kɔɔnri,
mbe ble titɛɛ,
na pe leele yii mu sɛ pe le wee.
We pe yii mbe sɛ pe le nyuŋgo,
mbe krɔ kan pe na mbe sɛ su,
na pe ndie tiniɛ nyjila we da.
23 Kre nyjila kre,
yeŋge we wɔ kprikpri,
a yila wa yili na.
Ŋgi na hin? O Tafun Nyiɛkpɔɔ,
Jaŋgafun wre we pe ŋunu.
We ŋunumu li Jerusalem,
na Zion nyua kre na,
a u leele pre yɛkulo pre,
we u yɛnyiŋge nya.