Tyre Kee
23
Tyre kee yi kre. Yire mblɛ e tnumu tuni Tarshish jafa li krɔɛ badɛnyi yire ni kre,E nyɛni e gble le kpɔɔ.
Ŋgi na hin? Pie Tyre kla,
hali kaloŋgo nunu chom kuraa,
wa kro ki na.
A krɔɛ yirehaa, wa kro ki na.
Na e krɔɛ yire waa da Cyprus na,
bawa ee mandiɛ kre loo.
2 E nyɛni, yire Sidon jafalifɛɛnlɛ.
Yire e leele wɔ mu tun,
3 a pe epo kun mbe sɛ jafa li,
mbe Egypt shɔlɔ lɔ mbe prɛ,
mbe ki ti mbe yire,
na waŋgrɛ yire kro jafa li.
4 Sidon kakpɔɔ, nyifɛɛrɛ mu gbo,
ŋu na leele feni epo yiɛ na,
na paan na ndra.
Epo kre yo mbo,
“Biseere wa ni yaa na,
a pɔ n wa ni pan,
a bibilɛ, ndee bichiɛlɛ,
n wa ni pan mbe ni pɔɔri.”
5 Na Egypt leele waa loo,
na pe Tyre kla kre, kie pe fo,
mbe pe fooro ni pe pan.
6 Yire epo nyu tnifɛɛnlɛ pre,
e gble le e nyɛni,
e epo kre kun e sɛ Tarshish na.
7 Yɛshɔɔrɔ kakpɔɔ Tyre,
ŋga pra kun fafa kre yi ŋgaa?
Kena kakpɔɔ ŋga kraa leele tuni,
mbe pe epo kun mbe sɛ tni,
plɛ tra nu haalee kre yi ŋgaa?
8 A ndro ŋmbi nunu u jawala ta,
na we Tyre kla imi hin?
Kre kakpɔɔ lɛlɛ ŋga ŋulo,
na lɛ jafa lifɛɛnlɛ,
a leele kro naa pe kaan buuro,
tra ŋga na kre.
9 O Tafun Nyiɛkpɔɔ Jaŋgafun wre,
u ki jawa ma.
Wre u chaa mbe ki pe ma,
mbe ki ti kee nyjɛ pe pini,
na pe yɛ kpɔɔri na yi ni,
yire nyu to, mbe ki ti,
pre mblɛ pe kaan buuro,
tra ŋga na pre nyjii.
10 Tarshish leele e sɛ e tra kre fali,
na krɔɛ yirehaa n wa e pan na.
11 O Tafun Nyiɛkpɔɔ,
u jaŋga nyina epo na,
mu tia ŋulo kro na seeri.
Wre u yo na pe Canaan,
jafa li ndoe yire kro kla.
12 Sidon kakpɔɔ,
mu yɛshɔɔrɔ kre nyu to,
a pra mu leele pre fiŋge.
Hali na pe fɛ mu sɛ Cyprus na,
pia shɔ.
13 E Babylon kakpɔɔ kre le,
pe n mɛɛ ka ni na,
Assyria leele tia tra kre kaari,
fimi tra yurɛ tnihaa.
Pe yirɛ gedenyi sin,
mu yire yi na,
mu le chia kre na,
mu ki ja putuu.
14 Yire Tarshish krɔɛ
tnumu tunfɛɛnlɛ,
e gble kun, e nyɛni,
pe kakpɔɔ ŋga na,
e dankna kre kla.
15 Nyjila kaa wa na paan mbe pe Tyre kee fɛɛ yɛlɛ fuloe taarɛ na kɛ, a yɛlɛ nyjɛ ŋunu we li yi. La, na yire yɛlɛ yire waa tro, pan Tyre we pe imi na tɛtiɛrɔɔ wa na u mɛɛ kɔ mbo,
16 “Mu juru bali,
mu nyaari mu tro chia lam,
ŋu tɛtiɛrɔɔ ŋmba kee pe fɛɛ.
Juru kre gbun chiriri,
mu mɛɛ tataara kɔ,
mbe ki ti
mbe pe mu sɔɔnri na.”
17 Na yɛlɛ fuloe taarɛ na kɛ yire waa tro, o Tafun Nyiɛkpɔɔ we ti mbe Tyre ndru mbe ki jafa lɛɛ kre li na. Pan chia kre we pe na chlɔ ŋmba u uyɛ prɛ mu leele ŋga waŋgra kro nu tra yiɛ na wi. 18 Swa ŋga Tyre we ta jafalie nu kre kro we pe o Tafun Nyiɛkpɔɔ wo, mbe pe ki tɛɛ mbe sro na dodonyi chichie lɔ tataara mbe Nyiɛkpɔɔ sumifɛɛnlɛ ŋga.