Jerusalem Kee
22
Nyuɛ lalaa lawee ŋga ndaa nya nyiɛlɛ na kre kee yi kre.Kee ŋgi ki pini ŋga hin?
Yira ŋgi ki pan,
a leele pre kro na feni na ndru,
nyinyi ndrɛ na ŋga hin?
2 Leele gblee kpɔɔ leni,
kakpɔɔ kre na.
Yɛshɔɔrɔ gblee wa,
chia kre na poŋgo.
E leele mblɛ pe gbo pre,
ŋunɔ ma kra pe gbo.
3 E yɛkulo pre kro na fɛ,
a pra pe yii na pe n ta,
mu snimi nunu chom,
kuraa wa tun.
E tataara na fɛ mna da lee,
nde pra e ta mna yii.
4 Kre ki tia ni yo na, “E laa ni na,
mbe ni nyɛni mbe ki ni da,
ndro waa ni bre,
ni leele pre klaa ndra na.”
5 O Tafun Nyiɛkpɔɔ Jaŋgafun,
u tia tutom wo leele na,
a leele taanhaa nyjila da,
a leele wejiŋge na funi pe na,
nyuɛ lawee ŋga pe nya,
nyiɛlɛ na, kre ndra na.
Pe o kakpɔɔ kre mboe yire gbun,
mu juari mu wo tra,
a leele na nyɛni na yafun chaa,
a nyuɛ yire na,
pe gblee kre shio.
6 Ŋunɔwifɛɛnlɛ mblɛ pe yiri Elam,
tra nu tni pe soolo na na paan,
mu pe bɛnyi, na snimi paari.
A ŋunɔwifɛɛnlɛ mblɛ,
pe yiri Kir na peyɛ kna,
mu pe ŋunɔ wiyirɛ wru mu yii.
7 Judah nyuɛ lalaa tra taan kre,
sookɛɛ yi lawee kre nyi,
a ŋunɔwifɛɛnlɛ nduu soolo na,
mu sɛ yire,
Jerusalem jlonwee nyu krɔ na.
8 A Nyiɛkpɔɔ kɛ ŋga ni,
wra Judah tɔ kre,
wra ki laa pe na.
Ŋga kra pan ma kre,
e naa kaan klɔ katoo ŋga nu,
ee sɛ ŋunɔ wiyirɛ bali kre na.
9 E na weele nya,
Jerusalem mboo kre nu,
a yira fna mbe gbeele.
A tapla tapan wo kre nu,
e naa nyumu koori na teeri.
10 A e na Jerusalem kalonyi yire le,
mna yi yɛ juari mna yi tɛɛ,
mna mboo kre gbeele mu sin.
11 E na nyumu le haa kpɔɔ ka pe,
kakpɔɔ kre na,
mbe nyumu na fuu mbra yilii,
tapla lɛɛ kre nu,
mbra paan mbra lee ki nu.
La, e nsra Nyiɛkpɔɔ le mu nya,
wre wra yire kee nyjɛ jawa,
mu tɛɛ fa na yie pe.
12 Kre ble kre o Tafun,
Nyiɛkpɔɔ Jaŋgafun wre,
wra yo e pan na e nyɛni,
mbe fooro li, mbe e ndrɛ klu,
mbe kumu yonyi tɔ.
13 La, yɛshɔɔrɔ e naa lii, na tɛɛ.
Mbaala, na nui e na gbo,
na kaa, na simi gboo.
E naa yuu na,
“E ti mbe o na kaa, mbra gboo,
baŋga imi na o ku.”
14 O Tafun Nyiɛkpɔɔ Jaŋgafun wre na paara ni pan mbo, “Ŋga pee wa na ŋmaa ni ŋga, mba kre sisam ŋga sembremu ti mbe pe kɛ. Mi Nyiɛkpɔɔ Jaŋgafun wre ni ki yo.”
Shebna Jaaraa
15 O Tafun Nyiɛkpɔɔ Jaŋgafun wre na yo ni pan na ni sɛ Shebna ŋmba wi ŋunu katoo lefun lopom wre pan, mbe sɛ yo u pan na,
16 “Yira ŋgi mu pini mna hin?
A ndro ŋmbi u mu ŋga kolo,
a mna muyɛ faŋga wee tru,
nyua dnɛ nyjɛ nu mna hin?
17 Mu kpɔɔ mu yɛ pan,
la, Nyiɛkpɔɔ we mu yii,
mbe mu viŋge,
mbe wa lawee ka nu.
18 We mu bali na fɔɔ yi,
mbe mu viŋge mbe wa,
waŋgra ŋga ki kpɔɔ titi nu.
Bawa mu ku, mu sookɛɛ nyjɛ ni,
mu muyɛ kpɔɔri yire jaara.
A kie ti mbe nyifɛɛrɛ,
mu tafun katoo leele gbo.
19 Mi Nyiɛkpɔɔ we mu wɔ,
mu tnumu ŋga mu tuni kre nu.
A kpɔɔmu yire haa ŋga nu,
mu nyi kre, mbe mu tre tra.”
20 O Tafun Nyiɛkpɔɔ na yo Shebna pan mbo,
“Na ki ble kre waa da,
mbe ni sumifun Eliakim,
ŋmba wi Hilkiah biblɔ,
wre yeeri.
21 Mbe u le mu dodoŋgi titnɔŋɔ kre,
mbe u pɔ mu greree kre,
mbe mu jaŋga kre kna,
mbe le u kɛɛ.
Mbe ki ti u pe Jerusalem leele,
na Judah katoo leele kro lɛ.
22 Wre kɛɛ mbe David katoo,
safwa kre le,
lawee ŋga we nyaa kre,
ndro wa ja mbe ki tɔ.
A lawee ŋga we tɔ kre,
ndro wa ja mbe ki nyaa.
23 Mbe u kan na kaan yi,
mbe u yire gbiŋmbi,
a we ti mbe u lɛ katoo jɔɔn,
kre buuro ta.
24 Wre we na yaa u biile,
na u sele wolo kro na,
imi na pe li yirɛ hlu,
mboo mbɛɛ na,
mbe yi yire kre.
25 Na ki ble kre waa da,
kaan ŋga pe kan,
mboo mbɛɛ na kre,
we kɔ mbe to,
mbe yirɛ nyjɛ pe hlu ki na,
yire to tra mbe kla.”
O Tafun Nyiɛkpɔɔ wre u ki yo.