Babylon Too Kee
21
Babylon kee yi kre.Imi na fuflɛ gbaŋgɔ gbuun,
fimi tra nu,
mbe ki pɔ mbe tro kre,
pan kanyana yiri fimi tra,
ŋga leele pee fiɛrɛ ni titi nu,
na paan.
2 Ni ndrashelee kee,
yɛ nya nyiɛlɛ na.
Ni nya na ŋmba we leele wɔ,
mbe ŋga kre, pe woni na kaan,
a klafun wre na klai.
Elam ŋunɔwifɛɛnlɛ,
e yiri e sɛ wi,
Mede ŋunɔwifɛɛnlɛ e yirɛ tɛɛ,
e nduu yi na,
e le kakpɔɛ yire na.
Kanyana nyjɛ ni Babylon paan,
yire krɛrɛ mi Nyiɛkpɔɔ we ti,
mbe yi nyu to.
3 Kee ŋga ni loo,
mu ki nya nyiɛlɛ na,
kre tia fiɛrɛ kpɔɔ ni yii,
a ni lɛɛ na ni yaa,
na se lɛɛ siirefun yaa.
4 Fiɛrɛ tia ndaa seeri,
a gbun na yɔɔlɛ ni na.
Ni chaa mbe yila kɔ nyaanyaa,
la, ŋga yila we kɔ ŋga,
gbun yɔɔlɛɛ na kie ni wa.
5 Ndaa nya nyiɛlɛ na, na pe sro pe,
mu yirɛ chan chan tra,
a fumblɔ tni, na lii, na gboo.
Titɛɛ kre nu to,
a mana ka na yili mbo,
“E yiri, e ŋunɔ wi yirɛ,
nyjɛ ni e wii yire wru.”
6 A o Tafun Nyiɛkpɔɔ na yo ni pan mbo,
“Ti chia shiefun nduu,
mboo kre na,
mbe kee ŋga u nya kpali.”
7 Na waa soolo nduufɛɛnlɛ nya,
pra paan, mu mbra shiin shiin,
a plɛ nduu bubunlɔ na nyuuma na,
ki fna mbe u pe dɔɔ ta chichie.
8 A chia shiefun wre na gble le kpɔɔ mbo,
“Ni tafun, lafo na ble,
lawee ŋga nu, ni yire na sri.”
9 Le, ni ndro nya a u tni sookaa na,
a soolo shiin na u tini na paan.
A wra ndru mu kna mbo,
“Babylon to.
Ki Sɛɛnlɛ nyjɛ pe sumi,
yire kro to tra, mu juari.”
10 Ni leele Israel leele,
pe e gbun imi na pe yua gbuun kre,
la fuŋgaami, ketaan ŋga ni loo,
o Tafun Nyiɛkpɔɔ Jaŋgafun,
ŋmba wi Israel Nyiɛkpɔɔ,
pan kre, ni kpali e pan kre.
Edom Kee
11 Edom kee yi kre. Ndro wa na yire Edom na mu ni yeeri mbo,
“Chia shiefun, nyjila ŋgi nu,
nyiŋge we se hin?
Kena nyisee haa le ra?”
12 A ndaa yo,
“Nyiŋge we se chɔ,
la, ble we ndru mbe wɔ na.
Kena na mu chaa mbakɔ,
pan mu ni wie na.”
Arabia Kee
13 Arabia kee yi kre.
Yire Dedan jafalifɛɛnlɛ,
mblɛ e shie na paan na tuui,
Arabia fimi tra kre nu kre.
14 E mblɛ gbɔɔ ta pre,
ŋga nyumu mbe pe gbɔ.
Yire Tema leele,
e leele mblɛ pe fɛ,
mu pan mu e kaari pre,
ŋga sro mbe pe li.
15 Leele feni mbe shɔ brɔfiɛn ŋunɔ,
na bɛnyi nyjɛ pe kru,
mu kan pe na na kanyana,
nyjɛ yii wa ŋunɔ nu yire kɛɛ.