Israel Leele Nyiɛkpɔɔ Je
Ni sɔɔnri na e yirifum nyjila kre,
e na ni kori na bijɔ na u plɔ wi,
mna taa ni kro tablɔ tra kre nu,
tra ŋga nu ndro nsra sro luu
kre nu.
3 Israel leele, kre nyjila kre na
e pe cheche ni pan,
pan e na nyi na shɔlɔ jle
nyjɛ e kun see yi,
a kra tia leele mblɛ praa e fiŋge kro,
ndaa pe gbun pimi ni,
mna tia pra nyibinyiɛ sisaa nya.
Pan mi e Tafun Nyiɛkpɔɔ
wre yo.
4 Yire Jacob katoo leele,
Israel jlom yire kro leele,
e o Tafun Nyiɛkpɔɔ kee
ŋga u yuu loo.
5 Kee ŋga u yuu yi kre mbo,
Ni kee sisaa ŋgi
e tolɛɛlɛ pre na nya,
mna yire ki na mna laa ni na
mna kaari lewaala,
mu sɛ taa sɛɛnlɛ wɛɛ kro hin?
6 Pe nsra wie na,
Sena o Tafun Nyiɛkpɔɔ
wre nyi hin?
Wre ŋmba wra o wɔ
mu yili Egypt tra nu,
mna yiɛklu o pan tra waara
gbeŋglen kre nu,
tablɔ tra ŋga nu weele sisɛɛ
na nyi,
wam sisaa tra ŋga kee
kraa fiɛrɛ ni,
a ndro nsraa wa mu tni ki nu,
ndee mbe jaa tro ki nu.
7 Mi ndaa pan na e ni
tra taan ŋga nu,
mbe e paan ki sro,
na ki yirɛ chichiele wru mbe li.
La, e pan mu ni tra kre tɔ nɛɛrɛ ni,
mu ni krɔyira kre pe afuŋgo yira.
8 Hali srawɔfɛɛnlɛ pre nsra wie na,
a sena o Tafun Nyiɛkpɔɔ
wre nyi hin?
Pe mblɛ praa ni mbra yire nyina
pre kuraa nsra ni chin,
a pe yɛkulo pre na yiri
mu ni taan.
A sɛɛn Baal kre na
keenyanyofɛɛnlɛ pre naa yire,
na kee nyaa na yuu,
mna taa sɛɛnlɛ wɛɛ yire kro.
9 Ki tia mi na yiree wa
na kala ni mbe li,
Pan mi e Tafun Nyiɛkpɔɔ wre yo.
Mbe kala ta mbe yo
mbe e nanae taan.
10 E lɔɔ kun e sɛ Cyprus
kuyɔɔsu tra kre nu,
e ndro tun Kedar tra nu
yila finhaa wa,
mbe u sɛ wie chichie.
Ee nya na kee sisaa ŋga
e piin ŋga,
ki ka n da mu pe haka tun.
11 Kii wa na waŋgrɛ sɛɛnlɛ yire
n pe yaka yirɛ,
nde waŋgra ka n laa
ki sɛɛnlɛ kro tun.
La, mi ŋmba ni tia ni leele
yɛnyiŋge ta kre, pe ni je,
mu sɛ taa sɛɛnlɛ wɛɛ yire kro.
12 Kena nyjeeri, seeri kpɔɔ
mbe ki pe fiɛrɛ ni,
mbe ki leele fo kpɔɔ.
Pan mi e Tafun Nyiɛkpɔɔ wre yo.
13 Ni leele pre sisam shiin pe ni na,
pan ni nyi na blo ŋga nu
ŋmaa nyumu nyi pe pan,
a pe ni je,
mu sɛ pre titi bloe tuulo,
nyjɛ nu nyumu wa jaa yire.
14 Israel leele, pe nsra e se,
mbe e na leele sumi,
a pe nsra e se tinlɛ,
kena mni ki pe a pe e ta mu foolo,
mu sɛ waŋgra fɔŋgɔ nu hin?
15 Loŋgoolo nyɛni,
na gunu e na, na jirae lɛ.
Pe e waŋgra kre ja,
a ki sni waara,
pe e chiɛ yire sro,
a yi leele fɛ yi na.
16 A ŋunɔwifɛɛnlɛ
mblɛ pe yiri Memphis,
na Tahpanhes chiɛ yire,
na Egypt tra nu kre,
pe ndrɛ chirɛ gbun mu juari.
17 Yire ma e e Tafun Nyiɛkpɔɔ,
ŋmba wra yiɛ klu e pan wre je,
mu yire kee nyjɛ krɛrɛ cha,
mu eyɛ ŋgaa?
18 Na e sɛ gbɔ Egypt lɔɔ Nile kre nu,
yira ŋgi ee ta hin?
A na e sɛ Assyria na,
mu sɛ gbɔ Euphrates lɔɔ kre nu,
tnu ŋgi ee ta ki nu hin?
19 Yire titi sisam nyjɛ e piin,
yie e le kanyana nu.
A ŋga e laa ni na,
kre ki tia e yɛgbɔɔnrɔ ta kre.
E jawa e chin na,
na e mi e Tafun
Nyiɛkpɔɔ wre je,
mu laa ni kro kre,
kena sisam na kanyana kpɔɔ
titi nu e nyi.
Pan mi e Tafun Nyiɛkpɔɔ
wre yo.
20 Fa kre e na laa ni na,
mna ni mbra yire je,
mna yo na yaa ni sumi.
Yɛŋgɛ na, e na sɛ
na e sɛɛnlɛ sumi nyambie,
na tinyi wrɛ wee nyimi,
na tiɛri wa.
21 Mi ndaa e luu na
tre sɛŋgɛ tiŋge chichie yi,
la, e le imi na e eyɛ pe,
e eyɛ pe na tre tiŋge
ŋga nu tnu ka n wa yi.
22 Hali na e eyɛ je na
zemna ŋga ki tna titi ni,
nii wa na e sisam yire
nɛɛrɛ nyaa e na.
Pan mi e Tafun Nyiɛkpɔɔ
Jaŋgafun wre yo.
23 Yaa jaa yo na,
e n eyɛ tɔ na nɛɛrɛ ni.
Yaa jaa yo na,
e n da mu sɛɛn Baal sumi.
E sɔɔnri sisam nyjɛ e na pe
landɛɛ kre nu,
yire titi e kee nyjɛ e na pe
yire jawa.
Pan e nyi na nyuuma chlɔ
ŋmba u chaa mbe nduu,
a wa jaa tni titɛɛ wi.
24 Pan e nyi na nyaalam bubnɔ wi,
na u nduu nyjila da,
wa jaa uyɛ yii.
Uu nyaanyaa tablɔ tra kre nu,
mbra mana waa,
mbra blɔ ndiom haa chaa.
Na ki pan na u blɔ nya,
blɔ wre wa fna.
Ŋgi na hin?
Na chlɔ wre nduu nyjila da.
25 Israel leele, yaa taa sɛɛnlɛ kro,
mbe nyaari
mbe e kpawrɛ knumu,
mbe e lagboo jaara yua.
La, ŋga e yuu yi na,
‘Kee ŋga mu yuu kre n shian,
waŋgrɛ sɛɛnlɛ yire o chaa,
a yire kɔŋgɔ oo ni.’
26 Imi na pe juo yiri juuro na,
mbe nyifɛɛrɛ u gbo kre,
pan nyifɛɛrɛ we Israel leele pre,
na pe ŋulo, na pe loplombo,
na pe srawɔfɛɛnlɛ pre,
na pe keenyanyofɛɛnlɛ kro gbo.
27 Pre pe tiŋge kre yeeri ndoo,
mbe dnɛ yeeri maa.
Ŋga e krɔ kna mu wa ni na,
mu laa ni kro,
kre ki tia e na yuu ma.
La, na kala e da,
mbe e na nyɛni mbra ni yeeri,
na ni paan e shɔ.
28 Sena e sɛɛnlɛ nyjɛ e gbeele
eyɛ pan yire nyi hin?
Na kala ka e da,
e nyɛni e yi yeeri,
na yie jaa e shɔ,
kena yi paan e shɔ mbe ni le.
Yire Judah leele,
imi na e chiɛ nɛɛ,
pan e sɛɛnlɛ nyjɛ e pe
yire nɛɛ.
29 Mni a e na taanri ni na,
mu yiri mu ni taan hin?
Pan mi e Tafun Nyiɛkpɔɔ
wre yo.
30 Ni e ndie tini,
mbe ki ti mbe e chinɛ,
a nde e je e n chinɛ,
e ndie tiniɛ kre pe finfin.
E sɛ pe na jira
ŋmba u pɔɔrɔ shɔ wi,
mu e keenyanyofɛɛnlɛ pre gbo.
31 Yire aŋga biile,
e kee ŋga e Tafun wre yuu
kre loo.
Ndaa laa e kro fimi tra kre nu,
ndee mna e ti wɔmu ndoo
ka nu ra?
Kena mni a e na yuu na,
Kee ŋga ki tna o pan
oo na pini,
a e je yaa ndru
mbe pan ni pan hin?
32 Kena bichable ndee bijɔ,
we jaa saanrɛɛ nyjɛ ni
u uyɛ sani fɛɛ ra?
Kia jaa pan ma.
A nde ni leele pre ni fɛɛ,
nyjila tataara nu.
33 Yire e tro kachindɛ kolo na,
na e korifɛɛnlɛ taa,
hali chlɔ ŋmba kepele
ki peere chiɛlɛ nu wre
twan e pan.
34 E shianfɛɛnlɛ,
mblɛ pe n yaka pe gbo finfin,
a pe nyimi e mana,
a nde e n wa yii,
juuro kee ka na.
35 Yire e yuu na, e n sisaa ka pe,
ki tia mi Nyiɛkpɔɔ
krɔ n kun na e ni.
La, mbe e gbun pimi ni,
ŋga e kaala, na e n sisaa pe
kre ndra na.
36 Yira ŋgi ki tia
yaa jaa dunu ta ŋga hin?
Imi na Assyria waŋgra
na e fana kre,
pan Egypt waŋgra we e pe na.
37 Nyifɛɛrɛ ni ee yili
Egypt tra nu wa.
Ŋgi na hin?
O Tafun Nyiɛkpɔɔ kɛ laa
mblɛ na e kaan pre na,
a pia ja mbe ya e na
kolo ka na.”