Israel Leele N Kpra Ni
3
Nyiɛkpɔɔ na yo Israel pre pan mbo,“Na blɔ u chɔ je,
a chlɔ wre waa sɛ blɔ fɔŋgɔ leŋge,
u plɔ lɔɔ wre we jaa u leŋge naa?
Ɔɔhɔn, na ki ja mu pan ma,
kie tra kre tɔ na nɛɛrɛ ni.
La, Israel leele e sɛɛnlɛ nɛɛ,
mu wɛ chlɔ tɛtiɛrɔɔ
korifɛɛnlɛ na.
Kena e jaa ndru mbe pan
ni paan?
Mi e Tafun Nyiɛkpɔɔ wre
ni e wie.
2 E yiɛ wa e nyambie yire ndrɛ le,
ki ŋgi haa na e n da
mu sɛ sɛɛn sumi,
mu tiɛri wa tun hin?
Kolo mbɛɛlɛ na e jiin na bilɛ sri,
mbe ja na kokɔɔnlɔ lɛ.
E e tiɛrɛɛ na e sisam kepele
yire tɛɛ,
mu tra kre tɔ nɛɛrɛ ni.
3 Yire kee yire ndra na
ni tia wam yire,
a mba ti mbe koo nyiɛ pan.
Nde yire kee nyjɛ krɛrɛ kɔkro ni,
pan e nyi na tɛtiɛrɔɔ nyifɛɛrɛ
lafun gbuntitremfun wi,
nyifɛɛrɛ na u gbo, mbe u yiɛ je.
4 Mu yire e bimi,
kre ma e ni yeeri e lɛ,
na e nunu chichie kree?
5 A yire ma e ni tali na yuu na,
mbaa ti mbe ni krɔ kun na e ni kree?
A nde yaa jaa sisam pee ti.”
Israel Na Judah Fna Mbe Chinɛ
6 Nyjila ŋga nu Ŋunu Josiah na jɔɔn li Judah tra nu kre, kre o Tafun Nyiɛkpɔɔ wre na ni wie mbo, “Jeremiah, mu Israel leele nya na pe sɛ pe na chlɔ ŋmba u yili u plɔ kro wi ŋgaa? Nyambie gedenyi nyjɛ mu chin ŋga kro, na tinyi wrɛ vuu ŋga mu chin ŋga kro, pe tiɛri wa. 7 Yire kee nyjɛ Israel leele pe kre, ndaa jawa na pie laa pe sisam kro mbe ndru mbe pan ni pan, a pe je. A pe wolo Judah leele pre na nya kee nyjɛ Israel leele pre naa pini. 8 Israel tiɛrɛɛ kre ndra na ndaa hlɛ nyunɔ mu pe je, mu pe ni. Nde ndaa nya na fiɛrɛ n pe wolo Judah leele pre yii, a pra yili mu sɛ na tiɛri ma na. 9 Israel leele kee yire nsra pe gbo nyifɛɛrɛ ni, a pra sɛ na tiɛri na tro dnɛ na tinyi sɛɛnlɛ na, mu tra kre tɔ nɛɛrɛ ni. 10 Yire kee nyjɛ krɛrɛ kɔkro kre, Judah leele na pe yɛ pe na pe pan ni pan, nde pe nsra lɛɛ wɔ mu pan ni pan poŋgo.” Pan mi e Tafun Nyiɛkpɔɔ wre yo.
11 O Tafun Nyiɛkpɔɔ wre na yo ni pan mbo, “Israel leele shɔnlie lafɛɛnlɛ, pre kuraa fraka chiɛri mu wɛ Judah leele lɛɛ lafɛɛnlɛ pre na. 12 Nyiɛkpɔɔ na yo mi Jeremiah pan mbo,
Sɛ kee ŋga kpali Israel leele
mblɛ pee wa,
nyjeeri haa wa pre pan na.”
Israel leele mblɛ e n shɔnlie ni kre,
e ndru e pan mi Nyiɛkpɔɔ pan.
Pan mi e Tafun Nyiɛkpɔɔ wre yo.
Mba ti mbe ni jawala ni tɔɔra
e kepele ndra na na,
ŋgi na hin? Ni pe fooro chinfun,
a mba ti mbe ni krɔ kun na e ni
mbe sɛ su nyjila kro nu.
Pan mi e Tafun Nyiɛkpɔɔ
wre yo.
13 La, ki fna mbe e chin
na e pimi li,
ŋgi na hin? E yiri mu mi
e Tafun Nyiɛkpɔɔ wre taan.
Mu yiri mu sɛ na sɛɛnlɛ sumi
tinyi wrɛ vuu wee jaara.
A e n ndie tɛɛ ni pan.
Pan mi e Tafun Nyiɛkpɔɔ
wre yo.
14 Yire ni leele mblɛ e n shɔnlie ni, e ndru e pan ni pan. Pan mi e Tafun Nyiɛkpɔɔ wre yo. Ŋgi na hin? Mi wi e plɔ. Mbe e nununu wɔ mbe yili e chiɛ yire na, mbe e shiin shiin wɔ mbe yili e jlom yire na, mbe pan na e ni Zion nyua kre na Jerusalem na niyɛ jaara. 15 Kre mbe e ŋga lefɛɛnlɛ mblɛ ni loloŋgo chaa, mblɛ pie kachindɛ na nɔɔloo tɛɛ mbe e le. 16 Kre nyjila kre, na e waa nɛɛ tra kre nu tataara kre, leele wa na ni Nyu-Nunu-Daka kre kee yuu na. Ndro wa ki kee ka jawa, ndee mbe ki kee sɔɔnri na kple, a kia pe keshian yira, mbe ki ti pe ki ka nyini pe na. 17 Na kre nyjila kre waa da, pie Jerusalem yeeri o Tafun Nyiɛkpɔɔ Ŋujɔɔn, a waŋgra kro we pan mbe fni Jerusalem na mbe u mɛɛ kre ŋga buuro. A pia taa pe ndikana sisam kee yire na na. 18 Kre nyjila kre nu Judah, na Israel we chaa nunu, mbe pe kro yili nyjeeri haa tra kre nu pra pe yii mu sɛ kre nu, mbe ndru mbe pan tra ŋga ndaa pe tolɛɛlɛ ŋga na krɔyira yi kre nu.
19 Mi Nyiɛkpɔɔ ni ki yo na,
Mbe yɛshɔɔrɔ tɛɛ mbe e yii
na ni bibilɛ lɛ yire,
mbe e ŋga tra ŋga ki nyu,
tra ŋga nyini ki n wa waŋgra nu.
Ni chaa mbe e ni yeeri e lɛ,
mbe yaa laa ni kro na.
20 La, pan e nyi na chlɔ
ŋmba u yili u plɔ kro wi,
pan yire Israel leele laa ni kro.
Pan mi e Tafun Nyiɛkpɔɔ
wre yo.
21 E gblee loo nyambie yire
ndrɛ na.
Israel leele pe nyɛni
na ni tali ma kre,
ŋgi na hin? Pe mi pe Tafun
Nyiɛkpɔɔ wre wa,
mu ni kee fɛɛ.
22 Mi Nyiɛkpɔɔ ni yuu pe pan na,
Yire mblɛ e laa mi Nyiɛkpɔɔ
kro kre,
e ndru e pan ni pan.
Mbe e tra mbe ki ti
mbe e pe kprafɛɛnlɛ.
E yo na o loo, oo pan, ŋgi na hin?
Ŋu wi o Tafun Nyiɛkpɔɔ wre.
23 Ŋga o sɛ na sɛɛnlɛ yire sumi
nyambie,
na nyuɛ yire ndra na kre,
o n yaka ta yi nu.
Kpra na, o chin na Israel leele
Nyiɛkpɔɔ wre wi
o ŋmaashɔfun.
24 Sɛɛnlɛ nyifɛɛrɛ wee
nyjɛ o naa sumi mu yire
o bimi kre yi o dɔɔya,
mu o yurɛ tataara mblɛ o tolɛɛlɛ
fna mu cha mu tɛɛ o pan,
na o bibilɛ, na o bichiɛlɛ
kro kla o kɛɛ.
25 Mu yire o bimi, kre o sisaa pe,
na o tolɛɛlɛ pre lɛ,
mu o Tafun Nyiɛkpɔɔ wre taan,
a ki tia nyifɛɛrɛ o gbo.